Read chopi Vakolosa 4 Bible Online

Vakolosa 4 - chopi bible

Vakolosa 4

¹ Anu vanyamne, hanyani ni sithumi sanu ngu nzila yo lulama ni fanelo, na mi txi ziva ti to nanu mina ni Mkoma wanu a ku nzumani.

²Simamani mi khongela, mi txi khutalela kona mikombeloni, na mi txi bonga,

³mi txi hi kombelela nathu, kasiku Txizimu txi hi tulela nzila ya kutxhumayela kwathu, hi sikota kuhuwelela msisalo wa Kristu, ani ni maneka mkorani ngu mhaka ya wona msisalowo.

⁴Ni kombeleleni kasiku ni sikota ku wu txhamusela ngu kuwomba ngu tifanelo ti ti lavekako.

⁵ Hanyani ngu wuzivi ni va va ku hahanze, mi txi londola ta tinene mbimo yi mi ku ka yona.

⁶Kuwomba-womba kwanu ku nave ko tsakisa yotshe mbimo, na ku di lungilwe ngu m'nyu, ti to mi ziva ti mi fanelako kuxamulisa tona m'thu ni m'thu.

⁷I di mahungu a ti ni hanyisako tona, a nata mi xawutela totshe ene Tikiko mwanathu wo randeka, txithumi txo thembeka, txithumi kulothu mthumoni ka Mkoma.

⁸Ni mi rumela ene, ngu mhaka ya toneto, to ta mi xawutela mahungu a wutomi wathu ni ku ta tsanisa timbilu tanu.

⁹Kumweko ni Onesimu, mwanathu wo thembeka ni kurandeka ngutu, awu i ku wa lixaka la ka kwanu. Vona va nata mi xawutela totshe ti ti mahekako kheno.

¹⁰ Wa mi dingula Aristarkusi i ku txibotxhwa kulothi, kumweko ni Marku mtukulu wa mwanawe Bharnabhasi, awu mi nga ziviswa timhaka takwe; ngako a txi mi endela, mu amukeleni.

¹¹Jesu, awu a dhanwako ku i Justo, wa mi dingula nene. Ava va nga ya wukwerani, ngu vona vava dwe va thumako kumweko ni nani, ka mthumo wa mfumo wa Txizimu; ngu vona va ni thavelelako.

¹² Wa mi dingula Epafrasi, i ku mmweyo wanu, txithumi txa Kristu Jesu, txi lwako yotshe mbimo ngu nganu mikombeloni kwakwe, kasiku mi zumba mi di va kuhetiseka, mi di va kutsana amu ka kumaha totshe ti Txizimu txi ti randako.

¹³Kha ditshuri ani na mu fakazela ka mhaka yiya: Ene wa ti karata ngutu ngu nganu, ngu va Laodhikheya, ni va Hiyerapoli.

¹⁴ Wa mi dingula nene Luka, mngana wathu wa ñanga, wa mi dingula nene Dhemasi.

¹⁵Dingulani vanathu va Laodhikheya, ni mame Ninfa, ni Dibanza di di sengeletanako m'tini kwakwe.

¹⁶Msana ka kuva di di gondilwe hagari kwanu dipapilo diya, di ningeleni di gondwa kambe Dibanzani ka Laodhikheya; na nanu lavani kugonda adi di tako ngu Laodhikheya.

¹⁷ Gelani kambe Arkipo mi txi khanu: “Tsimbitisa kha kwati mthumo wu u nga wu amukela manzani ka Mkoma; wu thume ngu tifanelo ta tinene.”

¹⁸Madingulisa awa ni bhala ngu txanza txangu: Ani Paulo. Mi nga divaleni ti to ni ku khotelwani. Kateko yi nave ni nanu.