Read chopi 1 Vatesalonika 1 Bible Online

1 Vatesalonika 1 - chopi bible

1 Vatesalonika 1

¹Paulo, ni Silivhano, ni Timoti, ka Dibanza da Vatesalonika, ava va lumbako Txizimu Tate, ni Mkoma Jesu Kristu. Kateko ni kudikha si nave ni nanu!

²Ha ninga kubonga yotshe mbimo ka Txizimu ngu kota yanu motshenu, na hi txi mi alakanya, mikombeloni kwathu.

³Ha khumbula mithumo yanu ya likholo, kukhutala kwanu ka lirando, ni kutimisela kwanu ka txithembo txi mi ku natxo ka Mkoma wathu Jesu Kristu, masoni ka Txizimu, Tate wathu.

⁴Ha tiziva, vanathu, ti to anu mi dhundwako ngu Txizimu, mi sawutwe ngu txona.

⁵Nguko, Evhangeli yathu kha ya hoka kwanu ngu mapswi dwe, aniko yi fakazetwe ngu mtamo wa Moya wo Sawuleka, ni mahanyelo o kholwisa. Ma tiziva ti hi nga hanyisa tona ni nanu ngu mhaka ya lirando kwanu.

⁶ Se na nanu mi ti mahile vaeteteli vathu ni va Mkoma, ngu ku mi nga amukela dipswi hagari ka kuxaniseka ka hombe, na mi txi tsaka ngu litsako la Moya wo Sawuleka;

⁷ahawa ka kuza mi va mi di txikombiso ka otshe makholwa a ditiko da Makedhoniya ni da Akaya.

⁸Kha ditshuri, Dipswi da Txizimu, di di nga engiswa di txi khukhela kwanu, kha da engiswa dwe ngu Vamakedhoniya ni va Akaya, aniko likholo lanu ka Txizimu li tshanganisile otshe makhalo; se ngu kota yeto, kha kuswi ku txi laveka ti to hi ngadi hi txi womba-womba ngu mhakeyo.

⁹Nguko, ngu vona vapune va xawutelako ati mi nga hi amukelisa tona, ni ti mi nga hindukisa tona, mi txi leka sithombe, mi txi namarela ka Txizimu, kufela ku mi txi thumela Txizimu txi txi hanyako, na i di txa ditshuri;

¹⁰mi txi verela Mwanana wa txona, wa kuta ngu nzumani, a nga wuka ngu ka vo fa, Jesu wu a nga hi hulukisa ha kuhenyelwani ka timbimo ti titako.