Read chopi 1 Vatesalonika 3 Bible Online

1 Vatesalonika 3 - chopi bible

1 Vatesalonika 3

¹ Ngu toneto, ngu ku ambi ngadi hi sikota kuhonisela, hi woni i di ta tinene kusala hokha Atena.

²Hi rumela Timoti mwanathu ni txithumi txa Txizimu, txa kuthumela Evhangeli ya Kristu, kasiku a txi ta mi tsanisa ni ku mi ninga mtamo amu ka likholo lanu.

³Kasiku, ni wammweyo asi vi ni kukarateka ngu mhaka ya sixanisoso, nguko ma tiziva ti to ngu yoneyo nzila yathu.

⁴Kha ditshuri, mbimo yi hi nga ti ni nanu, hi txi mi gela ti to hi fanete kuxaniswa, se toneto ti mahekile, nga ti mi ti zivisako tona.

⁵Ngu toneto, ani ngu ku ambi sikota kuhonisela, ni mrumete kasiku ene e ta ziva ti mi hanyisako tona mu ka likholo, kasi kuwona ti to mwendo kha ma dukwa ngu mduki, ni ti to mwendo hi nga va hi di luzile mbimo yathu.

⁶ Se konkuwa, Timoti i ngadi kwakwe kubwaka a txi ta ngu kheyo kwanu, a txi neha mahungu amanene a likholo lanu ni lirando lanu. Ene a hi zivisile ti to mi ngadi mi txi hi alakanya yotshe mbimo ngu moya wa wunene, na mi txi navela ku hi wona, kufana ni nathu hi xuvako ku mi wona.

⁷Ngu toneto, vanathu, hi mani kuthavelelwa ngu nganu, ngu konaho ka likholo lanu, hagari ka sotshe sixaniso sathu ni siduko sathu.

⁸Konkuwa ha hanya nguko mi ngadi tsani ka Mkoma.

⁹Ngu bonga muni hi no kukomba ka Txizimu ngu lotshe litsako li hi li pfako ngu nganu masoni ka Txizimu txathu kani?

¹⁰Ha khongela, wusiku ni mitshikari, ngu kusimamisa ti to Txizimu txi hi ninga kutshumela hi mi wona, kasi kueneta ati ti nga kelela, ka likholo lanu.

¹¹Ha kombela ti to Txizimu Tate wathu, ni Mkoma wathu Jesu Kristu, va txi hi tulela nzila yo ta kheyo kwanu.

¹²Mkoma a na kulise ni kuandisa lirando li mi randanako ngu lona anu, ni lirando la kuranda votshe vathu, nga ti athu hi mi randisako tona.

¹³Mkoma a na tsanise timbilu tanu amu ka wusawuleki wo mbina dikhwiti masoni ka Txizimu, Tate wathu, ngu mbimo ya kuta ka Mkoma wathu Jesu, kumweko ni votshe vasawuleki vakwe.