Read chopi 1 Vatesalonika 5 Bible Online

1 Vatesalonika 5 - chopi bible

1 Vatesalonika 5

¹Ngu didhawa da mhaka ya masiku ni sikhati sa kona, vanathu, kha kulaveki ti to hi mi bhalela txilo ka tona.

² Nguko anu ma tiziva ta tinene taku ditshiku da Mkoma di na tisa ku nga dikhamba ahawa ka wusiku.

³Mbimo yi vathu va no kha vona: “Ka ho kudikha ni kukhaliseka,” nguyo mbimo ku no humelela dikhombo ngu txidhukisa hagari kwawe, kota nga wamsikati, ngako a txi lumwa; kha va na mbi sikota kupona.

⁴Aniko anu, vanathu, kha mi nga mtemani ahawa koza mi txi nata maha ngu kukanganyiswa ngu ditshiku da kona nga kule ka dikhamba.

⁵Nguko anu motshenu mi vanana va kuwonekela, mi vanana va mitshikari. Athu kha hi nga vanana va wusiku mwendo txidema.

⁶Ngu kota yeto, hi nga oteleni nga vamwanyani, aniko a hi ti woneleni, hi txi hanya ngu kutipimela.

⁷Ava va otelako, va otela ni wusiku; ava va levako, va leva ni wusiku.

⁸Aniko, athu hi ku va mitshikari, he hanyeni ngu kutipimela, he ambaleni txikatawu txa txikete txa likholo ni lirando, hi txi ambala txithembo txa kuhanyiswa, txi txi maha txidgoko txathu.

⁹Ngu toneto, Txizimu kha txa hi tumbulukisela ku hi henyela, aniko txi hi mahete kasi kumana kuponiswa ngu Mkoma wathu Jesu Kristu,

¹⁰a nga hi fela, kasiku athu, mwendo ha wonelela mwendo ha otela, hi hanya hi di patani kumweko nayo.

¹¹Ngu toneto, thavelelanani mi txi akisana, nga tona ti mi mahisako tona ni konkuwa.

¹²Ha mi kombela, vanathu, ti to mi txi vekela txithavo avale va mi khutalelako ngu mikaralo hagari kwanu, na i di vahombe vanu ni vathangeli vanu ngu ka Mkoma.

¹³Va xonipheni ngu lirando la hombe, ngu mhaka ya mthumo wawe. Hanyani navo ngu kudikha.

¹⁴Ha mi laya, vanathu, kawukani sindaka-milayo. Tsanisani ava va ku ni dizowa, vhunani ava va ku ni dikhodho, mi va ni kuhonisela ka votshe.

¹⁵Ti woneleni kasiku ni wammweyo kwanu asi tshumeteli wubihi ngu wubihi; otshe masiku duketani kumahelana ta tinene, mi txi maha toneto ni ka votshe.

¹⁶Tsakani yotshe mbimo.

¹⁷Khongelani mi si karali.

¹⁸Zivani kubonga ka totshe ti ti mi humelelako. Nguko, ngu tona tiya txi ti dhundako Txizimu kwanu, ngu ka Kristu Jesu.

¹⁹Mi nga timeni moya.

²⁰Mi nga kanyiseni siprofeto.

²¹Kambe wonisisani sotshe, mi ñolisisa asi i ku sa sinene.

²²Vayilelani sotshe so biha.

²³Txizimu txa kudikha ngu wutumbu wa txona txi na mi basise ka sotshe, se wotshe wuthu wanu, m'hefemulo, moya, ni mmidi, zumbani mi di si veketile ngu fanelo kala kuwuyani ka Mkoma wathu Jesu Kristu.

²⁴Awule a nga mi dhana a thembekile, ene a na ti thuma totshe tiya.

²⁵Hi kombeleleni, vanathu.

²⁶Losani votshe vanathu ngu kupswopswana ko sawuleka.

²⁷Na mi kombela ngu ka Mkoma ti to dipapilo diya, di gondwa ka votshe vanathu.

²⁸Kateko ya Mkoma wathu Jesu Kristu, yi nave ni nanu!