Read chopi Joxuwa 11 Bible Online

Joxuwa 11 - chopi bible

Joxuwa 11

¹Msana keto, ku to maheka ti taku, mbimo yi Jabhini, mfumeli wa Hazori, a nga engisa timhaketo, a to ruma mitumi ka Jakobe, mfumeli wa Medhoni, ni ka mfumeli wa Sineromi, ni ka mfumeli wa Akisafe,

²ni ka vafumeli vale va nga aka mmangoni ka wuphemba, ni ka libala la wulambwe ka Kineroti, ni ka matiko a libalani ni mikovani ka Dhori ka mswa-ditambo,

³ni ka Vakanana va manekako wutxani ni mswa-ditambo, ni ka Vaamori, ni Vaheti, ni Vaferezi, ni Vajebhusi va mmangoni, ni ka Vahevhi va hafuhi ka Hermoni, ditikoni ka Misipa.

⁴Votshe vava, va to huma ni otshe masotxhwa awe, vathu votala ngutu, nga mtxhefa wu ku likasani ka linene, ni mahantxhi ni sikotxikani so tala ngutu.

⁵Votshe vafumelivo va to tshangana, ve ta gova hafuhi ni mati a Merome, kasi kutalwa ni va ka Israyeli.

⁶Se MKOMA a to khene ka Joxuwa: “U nga thave masoni kwawe, nguko mangwana, ka yona yiya mbimo, ani ni nata va ningela votshe va txi dawa masoni ka Israyeli; u nata wilela misiha ya mahantxhi awe, kambe u nata hisetela sikotxikani sawe.”

⁷Se Joxuwa ni votshe vathu va yimbi, va to ta ngu kukuluveta veya va mana hafuhi ka mati a Merome, va va txilwa navo.

⁸Se MKOMA a to va ningela manzani ka va ka Israyeli; vona va to va khozisa, va txi va tutumisa, kala ka Didhoropa da Hombe da Sidhoni, ni Mezerefoti-Mayimi, ni mkovani ka Misipa, ngu didhawa da wutxani. Va to va dayetela, va si siyi ni wammweyo.

⁹Se Joxuwa a mahile nga ti MKOMA a nga m'gelisa tona; a to wilela misiha ya mahantxhi awe, e hisetela ni sikotxikani sawe kambe.

¹⁰Se ka yona mbimo yile ya yimweyo, Joxuwa a to tshumela e ta khozisa Hazori, a txi daya mfumeli wa kona ngu ditxhari. Hazori i ti m'zinda wa yotshe mifumo yiya.

¹¹Se va to dayela ngu ditxhari, sotshe sivangwa so hanya, kha va nga siya ni txa tximwetxo txo hanya; kambe va to hisa ni didhoropa da Hazori.

¹²Se Joxuwa a to teka otshe madhoropa a vafumelivo, a txi daya votshe vafumeli va kona ngu ditxhari, e va lovisa, nga ti Mosi txithumi txa MKOMA, a nga ti leletete tona.

¹³Aniko madhoropa otshe ma nga ti aketwe mimangoni, va ka Israyeli kha va ma hisa, hahanze ka didhoropa da Hazori, adi Joxuwa a ngadi hisa.

¹⁴Se sotshe si va nga handa ka ona madhoropayo, kumweko ni sifuyo, vanana va ka Israyeli va si tekile va txi phakelana ngu sona; se va to dayela votshe vavamna ngu ditxhari, va txi za ve va fuvisa; kha va nga leka ni txa tximwetxo txo hanya txi txi sala.

¹⁵Nga kule MKOMA a nga ti leletete ka Mosi, txithumi txakwe, nene Mosi a leletisile toneto ka Joxuwa; se Joxuwa a to ti maha totshe eto; asi siyi dipswi ni da dimwedo ka ale MKOMA a nga leleta ka Mosi.

¹⁶Ngu toneto, Joxuwa a to teka dotshe ditiko dile, mimango, ni dotshe da Wulambwe, ni dotshe ditiko da Goxeni, ni tibala, ni mikova, ni mimango ya ka Israyeli, ni tibala ta kona;

¹⁷kukhukhela mmangoni ka Halake, wu pindako ngu Seyiri, kala Bhahali-Gadhe, mkovani ka Libhanoni, makhatoni ka mmango wa Hermoni; kambe a to ñola votshe vafumeli va kona, a txi va daya.

¹⁸Joxuwa a lwite ni votshe vafumeli vale, ka mbimo yo lapha ngutu.

¹⁹Di walo didhoropa di nga maha txitumelelano txa kudikha ni vanana va ka Israyeli, hahanze ka Vahevhi, avale va nga ti akile Gibheyoni; otshe madhoropa va ma tekile ngu mtamo wa yimbi.

²⁰ Nguko MKOMA ngene a nga bangisa timbilu ta vathu vale, ti to ve huma va txi yalwa ni Israyeli, kasi ku a txi va lovisa do gwita, asi va tsetsi, aniko e va lovisa votshe, nga tile MKOMA a nga leleta ka Mosi.

²¹Ka yona yile mbimo, Joxuwa a tile e ta lovisa va ka Anaki va mimangoni ka Hebroni, va Dhebhiri, va Anabhi, ni va yotshe mimango ya ka Judha, ni va yotshe mimango ya ka Israyeli; Joxuwa a to va lovisa, kumweko ni madhoropa awe.

²²Kha ka nga sala ni wammweyo wa ka Anaki, ditikoni ka vanana va ka Israyeli, kumaneka vo sala dwe kona didhoropani ka Gaza, ni Gati, ni Asidhodhe.

²³Ngu kumaha keto, Joxuwa a to teka dotshe ditiko diya, nga tona ti MKOMA a nga ti wombile ka Mosi; se Joxuwa a to di ningela di txi maha thomba ya vanana va ka Israyeli, madingano ni kuabanelana kwawe, ngu tihunzu tawe; se ditiko di to humula yimbi.