Read chopi Joxuwa 13 Bible Online

Joxuwa 13 - chopi bible

Joxuwa 13

¹Ngako Joxuwa a di kumbile, na a di ni tanga ya malembe amangi, MKOMA a mgete a txi khene: “Se awe u kumbile ngutu, u wa tanga ya malembe o tala na kuve ku ngadi sate ditiko da hombe, adi di fanelako kukhoziswa.

²Ditiko di di ku ngadi sate ngu diya: Yotshe mihingano ya Vafilista ni dotshe ditiko da Gexure,

³kukhukhela Xihori ku ku masoni ka Egipta, kala mihinganoni ka Ekroni ka wuphemba, ditiko di va ku kha vona nda Vakanana, mtxhanu wa vathangeli va Vafilista, i ku vava: Mthangeli wa Gaza, wa Asihodhe, wa Asikaloni, wa Gati ni wa Ekroni; ni Vahevhi;

⁴kukhukhela wulambwe, ni dotshe ditiko da Vakanana ni Meyara, i ku da Vasidhoni kala Afeka, m'hinganoni ka Vaamori;

⁵kumweko ni ditiko da Vagedhali, ni dotshe ditiko da Libhanoni, kala wutxani, kukhukhela Bhahali-Gadhi, hafuhi ka mmango wa Hermoni kala ha ditimbani ka Hamati.

⁶Votshe vaaki va mmangoni, kukhukhela Libhanoni kala Misirefoti-Mayimi, votshe Vasidhoni; ani nipune ni na va tutumisa, masoni ka vanana va ka Israyeli. Awe u na phakela ditiko diya, di maha thomba ya vanana va ka Israyeli, nga ti ni nga ku leletisa tona.

⁷Konkuwa koko, abanisela ditiko di txi maha thomba ya mtxhanu wa tihunzu ni mune, ni hafu ya lihunzu la ka Manasi.”

⁸Yimwani hafu ya lihunzu la ka Manasi, kumweko ni va ka Rubheni ni va ka Gadhi, evo va amukete thomba yawe, ayiya Mosi txithumi txa MKOMA, a nga va ninga, mtxhatuko ka Jordhani, ngu diphambo da wutxani,

⁹kukhukhela Aroweri, ku ku likasani ka txinambwana txa Aroweri, ni didhoropa dile di ku hagari ka mkova, ni lotshe libala la Madhebha kala Dhibhoni;

¹⁰ni madhoropa otshe a Seyoni, mfumeli wa Vaamori, awule a nga ti fumile Hesibhoni, kala muhinganoni ka vanana va ka Amoni:

¹¹Ni Gileyadhi ni ditiko da Gesuri ni da Mahakate, ni wotshe mmango wa Hermoni, ni dotshe ditiko da Bhasani kala Salika;

¹²ditikoni ka Bhasani, wotshe mfumo wa Oge, a nga ti fuma matiko a Axitaroti ni Edreyi, nguko i ti msalela wo gwitisa, wa ka Refayime. Mosi a xute kambe a tutumisile vona vafumelivo vavambidi.

¹³Ti di ngeto, vanana va ka Israyeli, kha va tutumisa va ka Gesuri, hambi va ka Mahakate; ngu toneto va ka Gerusi ni va ka Mahakate, va ngadi ho kala nyamsi hagari ka va ka Israyeli.

¹⁴Lihunzu la ka Levhi ngu lona lokha li nga mbi ningwa thomba; nguko thomba ya lona ngu timhamba ti ti mahelwako MKOMA, Txizimu txa ka Israyeli, madingano ni ti txona txi nga womba.

¹⁵Ngu kumaha keto, Mosi a ningile ka lihunzu la vanana va ka Rubheni, txyavelo txawe, ngu mwaya ni mwaya.

¹⁶Se wu to maha muhingano wa kona, wu khukhela Aroweri, mabambe ka txinambwana txa Arnoni, ni didhoropa di di ku hagari ka mkova, ni lotshe libala, kala Medhabha,

¹⁷Hesibhoni ni otshe madhoropa a kona, ma manekako libalani: Dhibhoni, Bhamoti, Bhahali, Bheti-Bhahali-Meyoni,

¹⁸Jaza, Kedhimote, Mefahati,

¹⁹Kiriyatayimi, Sibhima ni Sereti-Xahari ka mmango wa mkovani;

²⁰Bheti-Peyori, ni Asidhote-Pisiga, ni Bhati-Xerimoti,

²¹ni otshe madhoropa a libalani ni ditiko dotshe da Seyoni, mfumeli wa Vaamori, awule a nga fuma Hesibhoni, awu a nga khoziswa ngu Mosi, kumweko ni vathangeli va Midhiyani, Evhi, Rekemi, Zuri, Huri, ni Rebha, vathangeli va Seyoni, va nga ti akile kona ditikonimo.

²²Nene Bhalamu, mwana Bheyori, awu i nga ti nyamsoro, vanana va ka Israyeli va mdate, ngu ditxhari, kumweko ni vale va nga dawa.

²³Ngu toneto, muhingano wa ditiko da vanana va ka Rubheni, i ti mnambo wa Jordhani. Eyo ngu yona thomba ya vanana va ka Rubheni, ngu timwaya tawe, ni madhoropa a kona ni miti ya kona.

²⁴Se Mosi a to ninga ka lihunzu la ka Gadhi, thomba yawe, madingano ni timwaya tawe.

²⁵Ditiko da kona i Jazeri, ni madhoropa otshe a Gileyadhi, hafu ya ditiko da vanana va ka Amoni, kala Aroweri, masoni ka Rabha,

²⁶ni kukhukhela Hesibhoni kala Ramati-Misipa ni Bhetomima; ni kukhukhela Mahanayime kala ditikoni ka mihinganoni ka Dhebhiri;

²⁷ni mkova wa Bheti-Aramu, Bheti-Nimra, ni Sukote, ni Safoni, avale va nga sala ka mfumo wa Seyoni, mfumeli wa Hesibhoni, se Jordhani i ti muhingano wawe, kala magwito ka Linene la Kineroti, mtxhatuko ka Jordhani ngu wutxani.

²⁸Eyo ngu yona thomba ya vanana va ka Gadhi, ngu mtengo wa timwaya tawe, ni madhoropa a kona ni miti ya kona.

²⁹Mosi a ningete kambe thomba ka hafu ya lihunzu la ka Manasi, yi nga salela hafu ya vanana va ka Manasi, lihunzu lawe, madingano ni timwaya tawe;

³⁰mhingano wawe wu ti khukhela Mahanayime, kotshe Bhasani, ditiko dotshe da Oge, mfumeli wa Bhasani, otshe madhoropa a Jayiri ale ma ku Bhasani, i ti mtxhanu wa magumi ni dimwedo a madhoropa.

³¹Hafu ya Gileyadhi, ni Asterote, ni Edreyi, madhoropa a mfumo Oge wa Bhasani, ma ningetwe ka vanana va ka Makira, mwana Manasi, a ti ti wombwako ku ma ningetwe ka hafu ya vanana va ka Makira, madingano ni timwaya tawe.

³²Atiya ngu tona tithomba ti Mosi a nga abanisela tibalani ka Mowabhi, mtxhatuko ka Jordhani, masoni ka Jeriko ngu diphambo da wutxani.

³³Kambe lihunzu la ka Levhi, Mosi kha nga li ninga thomba; nguko MKOMA, Txizimu txa ka Israyeli ngene i kuthomba yawe, nga ti va nga va gelisa tona.