Read chopi Joxuwa 16 Bible Online

Joxuwa 16 - chopi bible

Joxuwa 16

¹Txyavelo txa ditiko, atxi txi nga lumba vanana va ka Josefa, txi khukhela mnamboni ka Jordhani, ngu diphambo da wutxani masoni ka Jeriko, ngu wutxani ka sisima sa Jeriko muhingano wa kona wu txi khukhela txiwulani ka Jeriko kala mmangoni ka Bheteli.

²Muhingano wu khukhela Bheteli wu txi komba Luza, wu txi pinda ngu hafuhi ka ditiko da Vaarike, aniya Atarote;

³sekoko wu txi relela ngu diphambo da mswa-ditambo, wu txi komba kuya muhinganoni ka Jaflete, kala muhinganoni ka Bheti-Horoni wa hahatshi, wu txi hoka kala Gazeri, se wu txi ya gwitela lineneni.

⁴Atxiya ngu txona txyavelo txa thomba, va nga txi mana vanana va Josefa, ene Manasi ni Efrayime.

⁵Muhingano wa ditiko di va nga ningwa va ka Efrayime, madingano ni timwaya tawe, ngu wuwa: Muhingano wa thomba yawe ngu diphambo da wutxani i ti Ataroti-Adhari wu txi tsimbila kala Bheti-Horoni ka txitimwi,

⁶sekoko muhingano wu txi komba kuya Makimetati ngu wuphemba, wu txi tenderuka muhingano wuwa, wu txi ya wutxani ka Tahanate-Silo, wu txi tshawunyeta ngu wutxani, wu txi komba kuya Janowa;

⁷se wu txi relela ngu Janowa kala Atarote ni Naharati, wu txi pinda ngu Jeriko, wu txi ya gwitela Jordhani.

⁸Kukhukhela Tapuwa, muhingano wu komba kuya mswa-ditambo, kala ka txinambwana txa Kana, wu txi ya gwitela lineneni. Ayiya i thomba ya lihunzu la vanana va ka Efrayime, madingano ni timwaya tawe.

⁹Vanana va ka Efrayime va ti ni madhoropa awe hagari ka thomba ya vanana va ka Manasi; madhoropa awa ma ti ni sidhoropana sa ona.

¹⁰ Kambe kha va tovela vanana vale va nga ti akile Gezeri; kambe Vakanana va zumbile hagari ka lihunzu la vanana va ka Efrayime kala ka ditshiku da nyamsi, va txi maha Vaisrayeli va ku va thumela.