Read chopi Joxuwa 17 Bible Online

Joxuwa 17 - chopi bible

Joxuwa 17

¹Lihunzu la ka Manasi awule i nga ti matiwula a Josefa, li ningilwe ni lona txyavelo txa lona, Makiri, matiwula a Manasi, awule i ku tate wa Gileyadhi ni Bhasani.

²Vamwani vanana va amukete ni vona thomba yawe madingano ni timwaya tawe; vanana va Abhiyezeri, ni vanana va Heleke, ni vanana va Asiriyeli, ni vanana va Sekumi, ni vanana va Heferi, ni vanana va Semidha. Avava mbanana va mazambi va ka Manasi, mwana Josefa, madingano ni timwaya tawe.

³Zelofehadhi, mwana Neferi, mwana Gileyadhi, mwana Makiri, mwana Manasi, a ti si nga ni vanana va mazambi, aniko i ti vamahorana dwe; avale matina awe i ku awa: Mahala, Nowa, Hogila, Milika ni Tiriza.

⁴Vona va to ya masoni ka mphaxeli Eleyazari, ni masoni ka Joxuwa, mwana Nune, ni masoni ka vathangeli va txi ya kha vona: “MKOMA a to leletela ka Mosi ti to hi ningwa thomba hagari ka tindiya tathu.” Konako va to ningwa thomba madingano ni kuwomba ka MKOMA, hagari ka va ka kwawe.

⁵Se Manasi a to ningwa digumi da sipande hahanze ka ditiko da Gileyadhi ni da Bhasani, aale ma manekako mtxhatuko ka Jordhani,

⁶nguko vanana vamahorana va ka Manasi va to ningwa thomba hagari ka vanana vakwe va mazambi. Ditiko da Gileyadhi di to lumba vamwani vanana va mazambi va ka Manasi.

⁷Muhingano wa ka Manasi wu khukhela Aseri kala Makimetati, ngu masoni ka Sikemi, se wu txi longoloka wu txi ya didhawa da wulambwe ngu txineneni ka kuya Eni-Tapuwa.

⁸Manasi a ti ti lumbwa ngu ditiko da Tapuwa, kambe didhoropa da Tapuwa, di ku muhinganoni ka Manasi, i ti da vanana va ka Efrayime.

⁹Sekoko muhingano wuwa wu ti ti relela wu txi ya txinambwanani ka Kana; ngu wulambwe ka txinambwana, madhoropa a Efrayime ma ti ti hagari ka madhoropa a ka Manasi, i ti a ka Efrayime; muhingano wa ka Manasi wu ti ti pinda ngu wuphemba ka txinambwana, wu txi ya gwitela lineneni.

¹⁰Didhawa da wulambwe di ti lumba Efrayime ani da wuphemba di ti lumba Manasi, linene i ti muhingano wa kona; muhingano wa wuphemba i ti ti Aseri, ani wa wutxani i ti Isakari.

¹¹Mu ditikoni ka Isakari ni ka Aseri, Manasi a to ningwa Bheti-Xayani ni madhoropa a kona, Jeblehamu ni madhoropa a kona, vathu va Dhori ni madhoropa a kona, vathu va Tahanake ni madhoropa a kona, ni vathu va Megidhu ni madhoropa a kona; i ku madhoropa a mimango.

¹² Aniko nguko vanana va ka Manasi va nga mbi sikota kukhozisa madhoropa awa, Vakanana va to tsana va txi aka ditikonimo.

¹³Mbimo yi vanana va ka Israyeli va nga maneka va di ni mtamo, ve fumela Vakanana va to va ninga mithumo yo nemela, aniko kha va va tutumisa.

¹⁴Sekoko vanana va ka Josefa, va to ya ka Joxuwa va txi ya kha vona: “Ngu kutxani u txi hi ninga thomba ya txyavelo txatxidotho txa ditiko dimwedo ni wukhalo wumwewo dwe, kuve athu hi vathu vavangi, nga ti MKOMA a nga hi katekisa kala nyamsi kani?”

¹⁵Se Joxuwa a va gete a txi khene: “Ngako anu mi ku vathu vavangi, tsulani mi txi ya sakata txitinga txa kudingana wukhalo wu mi lavako wona, txitinga txa ditiko da Vaferezi ni ditiko da Varefayime, ngako mmango wa ka Efrayime i di wudotho kwanu.”

¹⁶Vanana va ka Josefa va xamute va txi kha vona: “Mmango wuwa mbudotho, kha wu hi eneli, ni kambe hahanze ka toneto, Vakanana votshe, avale va nga aka amu libalani, va na ni makalitxhi a tisimbi, kumweko ni vathu va Bheti-Xayani, ni va madhoropa a kona, ni va va ku libalani ka Jezrayeli.”

¹⁷Sekoko Joxuwa a to womba ka vanana va ka Josefa, i ku va ka Efrayime ni va ka Manasi a txi khene: “Anu mi vathu vavangi, ni mtamo wanu mbwa hombe; kha mi na kuenela ngu txikhwemu tximwetxo txa ditiko dwe;

¹⁸ngu toneto, mimango i nava yanu, hambiko i ku txitinga, mi na txi sakata, ni tinzila ta kona ti na mi lumba. Kambe mi na tutumisa Vakanana, hambiko va ku ni makalitxhi a tisimbi ni kambe hambiko va ku ni mtamo.”