Read chopi Joxuwa 19 Bible Online

Joxuwa 19 - chopi bible

Joxuwa 19

¹Txyavelo txa wumbidi txi ningilwe va ka Simiyoni, ka lihunzu la vanana va ka Simiyoni, madingano ni timwaya tawe: Thomba yawe yi maneka ngu hagari ka thomba ya vanana va ka Judha.

² Amu ka thomba yawe va amukete madhoropa awa: Bherisebha, Xabhani ni Moladha,

³Hazari-Xwali, Bhala ni Ezeme,

⁴Elitoladhe, Bhetule ni Horma,

⁵Zikilage, Bheti-Markabhoti ni Hazari-Suza,

⁶Bheti-Lebhahoti ni Xaruweni; i digumi da madhoropa ni mararu ni miti ya kona.

⁷Ayini, Bhinomi, Eteri ni Axane: I mune wa madhoropa ni miti ya kona.

⁸Ni yotshe miti yile yi manekako madhawani ka ona madhoropayo, kala Bhahalati-Bheyeri i ku Roma wa Negebhe. Eyo i thomba ya lihunzu la vanana va ka Simiyoni, madingano ni mtengo wa timwaya tawe.

⁹Thomba ya vanana va ka Simiyoni yi manekile amu ka tyiavelo txatxidotho txa vanana va ka Judha, nguko didhawa da vanana va ka Judha i ti da hombe ngutu kwawe; ngu mhaka yeto vanana va ka Simiyoni, va amukete thomba yawe hagari ka thomba ya vanana va ka Judha.

¹⁰Txyavelo txa wuraru txi ningilwe va ka Zebhuloni, madingano ni timwaya tawe: Muhingano wa thomba yawe wu ti ti hoka kala Saridhe.

¹¹Muhingano wa kona wu ti ti kwela ngu diphambo da mswa-ditambo, wu txi ya Marala, wu pinda ngu Dhabhexete wu txi hoka ka txinambwana txi txi ku masoni ka Jokeniyame.

¹²Muhingano wu ti ti khukhela Saridhe wu txi komba kuya wutxani, aha di humelako kona ditambo, kala muhinganoni ka Kisiloti-Tabhori, wu txi longoloka ngu didhawa da Dhabherati wu txi pinda wu txi kwela kuya Jafiya.

¹³Ngu koneyo wu pinda wu txi komba kuya wutxani, wu txi ya Gati-Heferi ni Eti-Kazini, wu txi hoka Rimoni, se wu txi jika wu txi ya Neya.

¹⁴Muhingano wu tenderuka Hanatoni ngu didhawa da wuphemba, wu txi ya gwitela mkovani ka Jifitaheli;

¹⁵kupata ni Kateki, ni Nahalali, ni Simitoni, ni Jidhala, ni Bhetlehema: Digumi da madhoropa ni mambidi ni miti ya kona.

¹⁶Eyo i thomba ya vanana va ka Zebhuloni, madingano ni timwaya tawe: Eyo madhoropa ni miti ya kona.

¹⁷Txyavelo txa wumune txi ningilwe ka Isakari, ka vanana va ka Isakari, madingano ni mtengo wa timwaya tawe.

¹⁸Ditiko dawe di patanisa madhoropa awa: Jezrayeli, ni Kasiloti, ni Sunamu,

¹⁹ni Hafarayime, ni Seyoni, ni Anaharati,

²⁰ni Rabhiti, ni Kixoni, ni Abhezi,

²¹ni Rameti, ni Eni-Ganime, ni Eni-Hadha, ni Bheti-Pasesi.

²²Muhingano wu ti ti hoka Tabhori, Xakazima ni Bheti-Xamexe, se muhingano wu tsimbila kala Jordhani, i ku digumi da madhoropa ni dimwedo ni miti ya kona.

²³Eyo i thomba ya vanana va ka Isakari, madingano ni timwaya tawe, i ku madhoropa ni miti ya kona.

²⁴Txyavelo txa wutxhanu txi humete lihunzu la vanana va ka Aseri, madingano ni timwaya tawe.

²⁵Muhingano wawe ngu wuwa: Helikate, ni Hali, ni Bheteni, ni Akixafa;

²⁶Elmeleki, ni Amadhi, ni Mixali; wu longoloka wu hoka Karmeli ka mswa-ditambo, ni Siyori-Libhinati.

²⁷Ka didhawa da wutxani muhingano wu ti ti hoka kala Bheti-Dhagoni, kambe wu ti ti longoloka kala Zebhuloni, mkovani ka Jifitaheti ngu wuphemba ka Bheti-Emeki, ni Neyeli, wu txi longoloka kala hafuhi ka Kabhuli ngu wuphemba,

²⁸ni Hebroni, ni Rahobhi, ni Hamoni, ni Kana kala Sidhoni-wa-Hombe. Ngu msana muhingano wu tshumela wu ya Rama kala ka didhoropa da mkhokhola wa Tiro.

²⁹Muhingano wuwa wu ti ti tshumela wuya Rama, kala ka didhoropa do tsana da Tiro; sekoko muhingano wuwa wu ti ti tshumela wuya Hosa, wu txi ya humela lineneni, kukhukhela ka txyavelo txatxidotho ya mafu, kala Akizibhe,

³⁰va ningilwe ni Uma, ni Afeki, ni Rehobhi: Magumi mambidi a madhoropa ni mambidi, ni miti ya kona.

³¹Eyo i thomba ya lihunzu la vanana va ka Aseri, madingano ni timwaya tawe: Madhoropa oneyo ni miti ya kona.

³²Ka vanana va ka Naftali ku humelete txyavelo txa wutxhanu ni tximwetxo, ka vanana va ka Naftali, madingano ni timwaya tawe.

³³Muhingano wawe wu khukhela Helefi ni kukhukhela ka Zahananime, wu pinda ngu Adhame, Nekebhi ni Jabhinaheli, kala Lakumu, wu txi ya gwitela mnamboni ka Jordhani.

³⁴Muhingano wu ti ti tshumela wu txi ya mswa-ditambo, wu txi pinda ngu Azenoti-Tabhori, kala Hukoka ni Zebhuloni ngu wulambwe wu txi hoka Aseri ngu mswa-ditambo ni Judha ni Jordhani ngu wutxani.

³⁵Madhoropa a mikhokhola ngu awa: Sidhime, ni Zera, ni Hamati, ni Rakati, ni Kineroti,

³⁶Adhama, Rama ni Hazori,

³⁷Kedhesi, Edreyi ni Ene-Hazori,

³⁸Jeroni, Magdhaleli, Horemu, Bheti-Anati, ni Bheti-Xemexe: Digumi da madhoropa ni mtxhanu ni mune, ni miti ya kona.

³⁹Eyo i thomba ya lihunzu la vanana va ka Naftali madingano ni timwaya tawe: Madhoropa oneyo, ni miti ya kona.

⁴⁰Txyavelo txa wutxhanu ni simbidi txi humete lihunzu la vanana va ka Dhani, madingano ni timwaya tawe.

⁴¹Muhingano wa thomba yawe ngu wuwa: Zore, Estawoli ni Iri-Xamexe;

⁴²Xalabhini, Ajaloni, ni Itila,

⁴³Eloni, Timna, ni Ekroni,

⁴⁴Elteke, Gibhetoni ni Bhahalati,

⁴⁵Jehudha, ni Bheni-Bheraki, ni Gati-Rimoni;

⁴⁶ni Me-Jarkoni, ni Rakoni, ni muhingano wule wu ku ngu masoni ka Jope.

⁴⁷Ditiko da vanana va ka Dhani di ti si va eneli votshe, ngu mhaka yeto, vanana va ka Dhani va to huma va txi yalwa ni didhoropa da Lexemi, va txi di khozisa ni kudayela vathu va kona ngu matxhari, ve teka didhoropa di txi maha dawe, va txi aka kona, ni ku di ninga ditina daku i Dhani, ditina da tate wawe.

⁴⁸Eyo i thomba ya lihunzu la vanana va ka Dhani, madingano ni timwaya tawe: Madhoropa oneyo ni miti ya kona.

⁴⁹Ngako va di gwitile ku abanisela ditiko ngu mihingano ya kona, vanana va ka Israyeli va to ninga Joxuwa, mwana Nune, txyavelo txa thomba hagari kwawe;

⁵⁰madingano ni ti MKOMA a nga leleta, va to mninga didhoropa dile a nga kombela dona, i ku Timnati-Sera, mmangoni ka va ka Efrayime; ene a to aketa didhoropa e zumba ka dona.

⁵¹Aawa ngu ona matiko a thomba yi Eleyazari mphaxeli ni Joxuwa, mwana Nune, ni vathangeli va tihunzu ta vanana va ka Israyeli, va nga abanelana ngu kuxaxuva, aniya Silo, masoni ka MKOMA, ha txikeni ka ditenda da msengeletano. Ngu tiya va nga gwitisa tona ku abanelana ka ditiko.