Read chopi Joxuwa 20 Bible Online

Joxuwa 20 - chopi bible

Joxuwa 20

¹MKOMA a to womba kambe ka Joxuwa a txi khene:

²“Gela vanana va ka Israyeli u txi khawe: Sawulani madhoropa a wuthavelo, aawa ni nga mi gela ngu txisofu txa Mosi:

³Kasi ku a txi thavela kona, awule a dayako m'thu ngu phango, i si nga ngu kumaha khakwenye, a txi ti hulukisa ka mphoteli wa mnoha.

⁴Se a txi thavela ka dimwedo da ona madhoropa awa, a na ya bwaka a txi ema ha txikeni ka didhoropa, a txi xawutela mhaka yakwe hagari ka madhota a dona didhoropedo. Se vona va na mu amukela didhoropani kwawe, va txi mkomba wukhalo wu a no zumba ka wona hagari kwawe.

⁵Ngako mphoteli wa mnoha a txi mlondeta, vona kha va na mbi mningela manzani kwakwe, nguko kha daya muakelani wakwe khakwenye, kambe kha thanga ngu ku mvengela ka masiku ma nga pinda.

⁶A na zumba ka dona didhoropedo, kala kuza a txi yiswa masoni ka msengeletano a txi ya lamulwa, a na simama e zumba ka dona didhoropedo, kala kuza a txi fa mphaxeli wa hombe, wa txonetxo txikhati. Se ngu kona a no tshumela e tsula didhoropani kwakwe, ni nyumbani kwakwe, ka dona didhoropa dile a nga thavela ka dona.”

⁷Sekoko va to sawula Kedhesi, ditikoni ka Galileya, mmangoni ka Naftali, ni Sikemi, mmangoni ka Efrayime, ni Kiriyati-Aribhe, i ku Hebroni, mmangoni ka Judha.

⁸Se ngu mtxhatuko ka Jordhani ngu wutxani ka Jeriko, va to sawula didhoropa da Bhezeri, txiwulani, libalani ka lihunzu la ka Rubheni, ni didhoropa da Ramoti da Gileyadhi, ka lihunzu la ka Gadhi, ni da Golani wa Bhasani, da lihunzu la ka Manasi.

⁹Aawa ngu ona madhoropa ale ma nga sawulwa kasiku, votshe vanana va ka Israyeli, kumweko ni votshe valuveli vale va zumbako hagari kwawe, ngako mmweyo wawe a di date m'thu ngu phango, a na mana ko thavela kona, asi dawi ngu manza a mphoteli wa hombe, kala kuza a txi ya lamulwa ngu msengeletano.