Read chopi Joxuwa 22 Bible Online

Joxuwa 22 - chopi bible

Joxuwa 22

¹Sekoko Joxuwa a to ramba va ka Rubheni, ni va ka Gadhi ni hafu ya lihunzu la ka Manasi,

²a txi khene: “Mi xayisile totshe ti Mosi, Txithumi txa MKOMA, a nga mi leleta, mi engisile kambe totshe ti ni nga mi gela.

³Anu kha ma va leka vanana, ka mbimo yotshe yi ya hombe, kala ka ditshiku da nyamsi, aniko mi xayisile ati ti fanelako kuxayiswa, i ku kuvekisa Mlayo wa MKOMA, Txizimu txathu.

⁴Se konkuwa MKOMA, Txizimu txanu, a ningile kuhumula ka vananu, akule a nga kuthembisa kwawe. Ngu toneto, tshumelelani matendani kwanu, ka ditiko da thomba yanu adi Mosi, txithumi txa MKOMA, a nga mi ninga, akheya mtxhatuko ka Jordhani.

⁵Ti woneleni dwe, mi txi vekisa ngu kukhutala, sirumo sa milayo, ayi Mosi, txithumi txa MKOMA a nga mi ninga, ngu kuranda ka MKOMA, Txizimu txanu, mi txi tsimbila ngu tinzila takwe ka mbimo yotshe, mi xayisa sirumo sakwe, mi txi namarela kwakwe, ni ku mthumela ngu yotshe mbilu yanu ni wotshe moya wanu.”

⁶Joxuwa a to va katekisa, e va gela ti to ve tsula, se vona va to tshumelela matendani kwawe.

⁷Mosi a ti ningete ka yimweyo hafu ya lihunzu la ka Manasi ditiko aniya Bhasani; kasi ka hafu ya wumbidi, Joxuwa a ningete yimwani thomba, hagari ka vanawe, mtxhatuko ka Jordhani, didhawa da mswa-ditambo. Mbimo yile a nga va gela ti to ve tshumelela matendani kwawe, Joxuwa a to va katekisa,

⁸a txi khene: “Tshumelelani matendani kwanu, kumweko ni tithomba, thomba yayingi ngutu, ni mitxhambi yo tala, ni silivhela, ni nzalama, ni txikete, ni simbi, ni syambalo so tala ngutu; abanelanani ni vananu, asile mi nga handa, ka valala vanu.”

⁹Vanana va ka Rubheni ni vanana va ka Gadhi va to tsula kumweko ni hafu ya lihunzu la ka Manasi, va txi siya vanana va ka Israyeli kona Silo, ditikoni ka Kanana, va txi ya ditikoni ka Gileyadhi, adile i kuthomba yawe, va nga ningwa madingano ni txileleto txi a nga txi maha ngu Mosi.

¹⁰Ngako va di hokile hafuhi ka mnambo wa Jordhani, ditikoni ka Kanana, vanana va ka Rubheni, ni vanana va ka Gadhi, ni vanana va hafu ya lihunzu la ka Manasi, va to aka kona ha mabambe ka mnambo wa Jordhani, txiluvelo txa hombe, atxi txi nga txi woneka ni kule.

¹¹Vanana va ka Israyeli, va to engisa vathu va txi womba va txi kha vona: Wonani, vanana va ka Rubheni, ni vanana va ka Gadhi, ni va hafu ya lihunzu la ka Manasi, va akile txiluvelo txa hombe, txi dingetanako ni ditiko da Kanana, hafuhi ka mnambo wa Jordhani ngu didhawa da vanana va ka Israyeli.

¹²Ngako va di engisile mhaka yiya, vanana va ka Israyeli va to tshanganisa wotshe msengeletano, kasi kuve tsula va txi yalwa navo.

¹³Vanana va ka Israyeli va to rumela ka vanana va ka Rubheni, ni ka vanana va ka Gadhi, ni ka hafu ya lihunzu la ka Manasi, ditikoni ka Gileyadhi, Finiyasi mphaxeli, mwana Eleyazari,

¹⁴a di kumweko ni digumi da vathangeli, ka nyumba yimweyo ni yimweyo ya vatate vawe, mthangeli mmweyo, ka totshe tihunzu ta ka Israyeli; se mmweyo ni mmweyo i ti ti msungo wa nyumba ya vatate vawe, ka magumi a mazana a va ka Israyeli.

¹⁵Va di hokile ka vanana va ka Rubheni, ka vanana va ka Gadhi ni ka hafu ya lihunzu la ka Manasi, va to ya kha vona:

¹⁶Wotshe msengeletano wa MKOMA wu womba tiya: Njionho muni txona txiya mi nga txi maha, txa kuwukela MKOMA, Txizimu txa ka Israyeli, akuwa nyamsi mi tshuralelako MKOMA, mi ti akela txiluvelo, atxiya i ku txiruko txo wukela MKOMA, kani?

¹⁷Ina txionho txi txi nga mahwa ngu Peyori hi nga txilo, atxi txi sinziko kubasiswa, kala ka yiya mbimo, hambiko mtungu wu nga tsayisa msengeletano wa MKOMA kani?

¹⁸Se nyamsi ma tshuralela MKOMA, ati ti kombako to akuwa nyamsi mi wukelako MKOMA, mangwana dikhulo dakwe di na vhutuka di txi wukela wotshe msengeletano wa ka Israyeli.

¹⁹Ngako ditiko da thomba yanu di sa sawuleka, tshawunyetani mi txi ta ka ditiko da thomba ya MKOMA, aha ku ku ni dibhokiso dakwe, mi txi ta zumba hagari kwathu. Aniko mi nga wukeleni MKOMA ni kambe mi nga hambaneni ni nathu, ngu ku ti akela txiluvelo txo hambana ni txiluvelo txa MKOMA, Txizimu txathu.

²⁰Mbimo yi Akane, mwana Zare, a nga maha ta walo ngu kuteka simaha so handwa, txiviti txa MKOMA kha txa tsayisa wotshe msengeletano wa ka Israyeli kani? Hi nga ene ekha Akane a nga fa ngu txionho txakwe.

²¹Sekoko vanana va ka Rubheni, ni vanana va ka Gadhi, ni hafu ya lihunzu la ka Manasi, va to xamula ka misungo ya magumi a mazana a va ka Israyeli, va txi kha vona:

²²Txizimu txa sizimu, MKOMA, Txizimu txa sizimu, MKOMA, Ene wa tiziva, ni Israyeli nene a fanete ku tiziva; ngu didhawa dathu ngako hi di mahile wuhurupha mwendo kueyisa MKOMA wathu, ene a na leke ku hi hulukisa ka ditshiku da nyamsi,

²³ni kungako hi di akile txiluvelo kasi kutshuralela MKOMA, hi txi maha kona mningelo wo hiswa ni mningelo wa sakudya, mwendo hi maha kona mphaxo wa kudikha, MKOMA a na hi thethise!

²⁴Kha ditshuri! Hi ti mahile toneto ngu kuthava ti to ka mbimo yi tako, vanana vanu va nata womba ka vanana vathu va txi kha vona: “Mi ziva txani ngu ta MKOMA, Txizimu txa ka Israyeli, kani?

²⁵MKOMA a vekile mnambo wa Jordhani kasi kumaha muhingano, hagari kwathu ni nanu, va ka Rubheni ni va ka Gadhi. Anu kha mi nga ni txyavelo ka MKOMA!” Ngu mhaka yeto, vanana vanu va ndi na thela dikhodho vanana vathu, va si thavi MKOMA.

²⁶Ngu toneto, athu hi ti khathu: He akeni txiluvelo, na i si nga txiluvelo txa mningelo wo hiswa, hambi yimwani mhamba,

²⁷aniko txi na maha wufakazi hagari kwathu ni nanu ni hagari ka situkulwana sathu, msana kwathu, wufakazi wa ti to ha khozeka MKOMA ngu timhamba tathu to hiswa, ni timhamba ni miningelo yathu yo bonga, kasiku vanana vanu ka mbimo yitako va si ta womba ka vanana vathu va txi kha vona: “Anu kha mi nga ni txyavelo txa MKOMA.”

²⁸Ngu toneto, hi pimisile, hi txi khathu: Ngako dimwani ditshiku va txi ta womba kwathu toneto, mwendo ka vanana vathu, hi nata xamula hi txi khathu: “Wonani wufakazi wa txiluvelo txa MKOMA, awuwa vatate vathu va nga mmahela timhamba to hiswa, mwendo yihi ni yihi yimwani mihingano, aniko mbufakazi hagari kwathu ni nanu.”

²⁹Ma nave kule ni nathu mapimo o wukela MKOMA, mwendo mapimo o leka ku mkhozela, a ha koza hi txi ti akela txiluvelo txa ku mahela kona timhamba to hiswa, mningelo wa sakudya, mwendo timhamba to hambana ni ti ti mahwako ha txiluveloni ka MKOMA, Txizimu txathu, atxi txi ku masoni ka dibhokiso dakwe.

³⁰Mphaxeli Finiyasi, ni vathangeli va msengeletano, ni misungo ya magumi a mazana a ka Israyeli, ava va nga ti nayo, ngako va di engisile mapswi awa, ma nga wombwa ngu vanana va ka Rubheni, ni vanana va ka Gadhi, ni vanana va ka Manasi, ma to va tsakisa.

³¹Koneko Finiyasi mwana Eleyazari, mphaxeli, a to womba ka vanana va ka Rubheni, ni ka vanana va ka Gadhi, ni ka vanana va ka Manasi, a txi khene: “Se ha tiziva nyamsi ti to MKOMA a hagari kwathu, nguko anu kha maonhela MKOMA ngu mhakeyo, aniko, mi hulukisile vanana va ka Israyeli ka txitsayiso txa MKOMA.”

³²Msana keto, Finiyasi, mwana Eleyazari, mphaxeli, ni vathangeli, va to leka vanana va ka Rubheni ni vanana va ka Gadhi, ve khukha ditikoni ka Gileyadhi, va txi tsula ditikoni ka Kanana, ka vanana va ka Israyeli, va txi ya va xawutela totshe timhaketo.

³³Xawutelo yi to tsakisa vanana va ka Israyeli; se vanana va ka Israyeli va to dhumisa Txizimu, ahawa ka kuva kha va nga za va txi pimisa kambe kuxoma yimbi ya ku yalwa navo hambi ni kuya onetela ditiko dile va nga ya aka ka dona vanana va ka Rubheni, ni vanana va ka Gadhi.

³⁴Vanana va ka Rubheni ni vanana va ka Gadhi va to raya txiluvelo txile ditina daku i Edhi, nguko vona va ti kha vona: “Txiluvelo txiya, txi na va wufakazi hagari kwathu, wa tito, MKOMA ngene i ku Txizimu txa ditshuri.”