Read chopi Joxuwa 23 Bible Online

Joxuwa 23 - chopi bible

Joxuwa 23

¹Ngako ku di pindile mbimo yo lapha, msana ka kuva MKOMA a di humutile Israyeli kulwa ni votshe valala vakwe va nga ti hafuhi nayo, na se Joxuwa a di kumbile ngutu,

²ene Joxuwa a to ramba votshe va ka Israyeli: Madhota awe ni vathangeli vawe, valamuli vawe ni vathangeli vawe va yimbi a txi va gela tiya: “Ani se ni kumbile, ni na ni malembe o tala,

³kambe anu mi ti woni totshe ti MKOMA, Txizimu txanu, a nga maha ka otshe matiko awa ngu mhaka yanu. Kunene, MKOMA, Txizimu txanu, ngene a nga lwa a txi mi vhikela.

⁴Wonani, ani ni mi abanisete, madingano ni dikato da lihunzu ni lihunzu, otshe matiko awa ma nga sala ni otshe matiko awa ni nga ma khozisa, kukhukhela Jordhani kala ka Linene la Hombe, mswa-ditambo.

⁵MKOMA, Txizimu txanu, ene apune a na va girimusa masoni kwanu, a na va honyola ditiko a txi mi ninga, se anu mi na di fuma, nga ti MKOMA, Txizimu txanu, a nga mi thembisa.

⁶Mahani mtamo, mi txi vekisa ni kuxayisa totshe ti ti nga bhalwa amu dibhukuni ka Mlayo wa Mosi, mi si hambuki, mi txi ya txineneni mwendo txibhabha.

⁷Mi nga ti tshanganiseni ni vamatiko vava va nga sala hagari kwanu. Mi nga khumbukeni matina a sizimu sawe, mi nga xambanyeni ngu matina a sona, mi nga si khozeleni ni kambe mi nga khizameni masoni ka sona.

⁸Aniko anu namarelani ka MKOMA, Txizimu txanu, nga ti mi mahako kala ka ditshiku da nyamsi;

⁹Kunene MKOMA a tutumisile, masoni kwanu, mifumo ya hombe ya mtamo, kha nga ho ni wammweyo a mi tsanelako kala ka yiya mbimo.

¹⁰M'thu mmweyo hagari kwanu, a na tutumisa 1.000 wa valala, nguko MKOMA Txizimu txanu, ngene apune a mi lwelako, nga ti a nga mi thembisa.

¹¹Ngu toneto, ti karateni ngutu, kasi ku mi txi randa MKOMA, Txizimu txanu.

¹²Nguko, mi txi hambuka, mwendo kunamarela ka vamatiko va va nga sala hagari kwanu, mi txi tekelana navo vasikati, anu mi teka kwawe, ni vona ve teka kwanu,

¹³ngu ditshuri ti ziveni konako ti to MKOMA, Txizimu txanu, a na leka kututumisa vamatiko vava masoni kwanu: Va na phinduka va txi maha likoka ni litshenga hagari kwanu, va na maha limhika makatani kwanu, ni mipa ka maso anu, kala mi txi fuva mu ka ditiko diya da dinene, adi MKOMA, Txizimu txanu, a nga mi ninga.

¹⁴Wonani, ani ni tsimbila ngu nzila ya votshe vathu ha mafuni. Anu ma tiziva ngu yotshe mbilu yanu ni wotshe moya wanu tito, ka sithembiso sotshe sa sinene, si MKOMA, Txizimu txanu, a nga mi mahela anu, kuwalo ni txa tximwetxo txi nga mbi maheka, sotshe si mahekile kwanu, kuwalo ni dipswi dimwedo di nga wa hahatshi.

¹⁵Se kufana ni kuwa ma nga maheka otshe mapswi ale amanene a nga ma womba kwanu ene MKOMA, Txizimu txanu, nga toneto kambe MKOMA a na mi wuyisela sotshe sile so biha, kala kuza a txi mi fuvisa ka ditiko diya da dinene, adi MKOMA, Txizimu txanu, a nga mi ninga.

¹⁶Ngako mi txi daya txitumelelano txi MKOMA, Txizimu txanu, a nga txi maha ni nanu, mi txi khozela simwani sizimu ni ku si khizamela, konako txiviti txa MKOMA txi na vhutuka txi mi wukela, kambe ngu kukuluveta mi na fuva ka ditiko diya da dinene, adiya ene a nga mi ninga.”