Read chopi Joxuwa 7 Bible Online

Joxuwa 7 - chopi bible

Joxuwa 7

¹Aniko vanana va ka Israyeli va to ti mahela mnandu, ngu kunavela asi si nga yiliswa; nguko Akane, mwana Karimi, mwana Zabhedhi, mwana Zera, wa lihunzu la ka Judha, a to teka simaha si si nga yiliswa, se kuhenya ka MKOMA ku to vhutuka, a txi wukela vanana va ka Israyeli.

²Joxuwa koko a di Jeriko, a to rumela vavamna vokari va txi ya Ayi, ku ku hafuhi ni Bheti-Avheni, ngu didhawa da wutxani ka Bheteli, a txi va gela tiya: “Tsulani mi txi ya xola ditiko.” Vavamna vale koko, va to tsula kuya xola ditiko da Ayi.

³Se va va wuya ka Joxuwa, va to ta m'gela tiya: “Va nga tsule votshe vathu, ku na tsule 2.000 mwendo 3.000 wa vavamna, va txi ya xasela ditiko da Ayi; u nga karata votshe vathu, nguko valala mbadotho.”

⁴Ngu toneto, ku to tsula 3.000 wa vavamna, evo va nga tutuma masoni ka vavamna va ditiko da Ayi.

⁵Se vavamna va ditiko da Ayi va to daya hafuhi ka magumi mraru ni mtxhanu ni mmweyo ka valala vawe, va txi va tutumisa kukhukhela ha txikeni, kala Sebharime, se va to va dayela mkovani; aniko timbilu ta vathu ti to nyeka, ti txi fanana ni mati.

⁶Sekoko Joxuwa a to vharula syambalo sakwe, a txi namisa khohe yakwe ha mafuni, masoni ka dibhokiso da MKOMA, kala ni minova, ene ni madhota a ka Israyeli; kambe va to ti vhungela dikhuma ha misungoni kwawe.

⁷Se Joxuwa a to khene: “Yowe! MKOMA Txizimu! Ngu kutxani u nga txhatukisa vathu vava mnambo wa Jordhani, kasi ku ta hi ningela manzani ka Vaamori, va txi ta hi lovisa kani? I di txhuko hi ti ko zumba mtxhatuko ka Jordhani!

⁸O! MKOMA! Ni na womba txani, aku va ka Israyeli va nga tshembereka va txi tshuralela valala vawe kani?

⁹Va txo tiengisa eto Vakanana, ni votshe vaaki va ditiko, va na hi ranganyeta, va txi fuvisa ditina dathu ha mafuni; sekoko u na maha txani ngu ditina dako da hombe kani?”

¹⁰“Sekoko MKOMA a to khene ka Joxuwa: Khukha! Ngu kutxani u txi namisa khohe yako kani?”

¹¹Vathu va ka Israyeli va onhile, kambe va lekile txitumelelano txangu, atxi ni nga va leleta, va txi za ve teka ni sile so yiliswa, va pite, ni kuwomba makuhu, kala va txi si veka hahatshi ka tithundu tawe.

¹²Ngu mhaka yeto, vanana va ka Israyeli, kha va sikota kutsana masoni ka valala vawe; va to tutuma masoni ka valala vawe, ngako va nga ti nyenyezisa; kha ni na mbi va ni nanu, ngako mi si thavisi sile si nga yiliswa hagari kwanu.

¹³Khukha u txi ya sawulekisa vathu, u txi khawe kwawe: Ti sawulekiseleni ditshiku da mangwana, nguko MKOMA, Txizimu txa Israyeli, a womba tiya: Kurukwa kuho hagari kwanu va ka Israyeli; kha mi na mbi sikota kutsana masoni ka valala vanu, kala kuza mi txi thavisa txiruko hagari kwanu.

¹⁴Mangwana koko, mi na tshuketa hafuhi kwangu madingano ni tihunzu tanu; se ku na maheka taku, lihunzu li a no li sawula MKOMA li na tshuketa, madingano ni timwaya ta lona; se mwaya wu MKOMA a no wu sawula, wu na tshuketa madingano ni tinyumba ta wona; se nyumba yi yi no sawulwa ngu MKOMA yi na tshuketa madingano ngu m'thu ni m'thu.

¹⁵Se ku na maheka tito, wule a no manwa a di ni sile so yiliswa, a na hiswa ngu mndilo, ene ni sotshe sile a ku naso, nguko a nga leka txitumelelano txa MKOMA, a txi maha wubihi ka Israyeli.

¹⁶Sekoko Joxuwa a to wuka ni mabimbi-kutxa, e tshuketisa hafuhi va ka Israyeli, madingano ni tihunzu tawe; se ku to sawulwa lihunzu la ka Judha.

¹⁷Se a di tshuketisile hafuhi lihunzu la ka Judha, a to sawula mwaya wa ka Zera; se a di tshuketisile mwaya wa ka Zera, ngu m'thu ni m'thu, ku to sawulwa Zabhedhi;

¹⁸se a di tshuketisile nyumba ya Zabhedhi, ngu m'thu ni m'thu, ku to sawulwa Akane, mwana Karimi, mwana Zabhedhi, mwana Zera, wa lihunzu la ka Judha.

¹⁹Sekoko Joxuwa a to khene ka Akane: “Mwanangu, na ku kombela, dhumisa MKOMA, Txizimu txa ka Israyeli, u txi ti sola masoni kwakwe; womba kwangu kona kuwa ati u nga maha, u nga ni sisele.”

²⁰Se Akane a to xamula ka Joxuwa, a txi khene: “Ngu ditshuri, ni onhete MKOMA, Txizimu txa ka Israyeli, ni mahile ti ni ti.

²¹Mbimo yile ni nga wona dijasi do tshura hagari ka sile so handwa, ni 200 wa maxekele a silivhela, ni dibwinzi da nzalama ya mtxhanu wa magumi a maxekele, ni to si navela ni txi si teka, wona taku, ni si sisile hahatshi ka mafu, hagari ka ditenda dangu, se silivhela yi ngu hahatshi ka sotshe.”

²²Sekoko Joxuwa a to ruma mitumi yi txi tutuma yi tsula ditendani, wona taku sotshe si ti sisilwe ditendani kwakwe, ni silivhela, hahatshi ka sona.

²³Va to ya si teka koko simaha sile hagari ka ditenda, va txi si tisa ka Joxuwa, ni ka votshe vanana va ka Israyeli, va txi ta si thela masoni ka MKOMA.

²⁴Sekoko Joxuwa ni votshe va ka Israyeli, va to teka Akane, mwana Zera, kumweko ni silivhela ni dijasi, ni dibwinzi da nzalama, ni vanana vakwe va mazambi ni vamahorana, ni tihomu takwe, ni timbongola takwe, ni tinvuta takwe, ni ditenda dakwe, ni sotshe sile a nga ti ti naso, va txi tsula naso mkovani ka Akori.

²⁵Se Joxuwa a to khene: “Ngu kutxani u txi hi tisela dikhombo kani? Se nyamsi, MKOMA a na tisa dikhombo txitimwi kwako!” Se votshe va ka Israyeli va to va balisela ngu marigwi, va txi va hisa ngu mndilo.

²⁶Se va to maha mmumbu wa hombe wa marigwi txitimwi kwakwe, kala ka ditshiku da nyamsi; ngu kumaha keto, MKOMA a to boxa kuhenyani kwakwe; ngu mhaka yeto wukhalo wule wu to dhanwa ku mkova wa Akori, kala ka ditshiku da nyamsi.