Read chopi Joxuwa 9 Bible Online

Joxuwa 9 - chopi bible

Joxuwa 9

¹Se ku to maheka taku, mbimo yile va nga tipfa votshe vafumeli va va nga ti ti mtxhatuko ka Jordhani, mimangoni ni tibalani, ni kotshe mabambe ka Linene la Hombe, ni masoni ka Libhanoni, Vaheti ni Vaamori, ni Vakanana, ni Vaferezi, ni Vahevhi, ni Vajebhusi,

²va to patana ka txitumelelano tximwetxo, kasi kulwisa Joxuwa ni va ka Israyeli.

³Aniko vaaki va Gibheyoni, ngako va di pfite ti Joxuwa a nga maha kona Jeriko ni Ayi,

⁴va to maha wurindi, ve tsula, va txi nga sirumwa, va di sanzekile masaka a kale aha ka timbongola tawe, ni misava ya kale ya vhinya, yo sakala, yo rungetetelwa;

⁵se mikondoni va di ni tikathula ta kale, to rungetetelwa, va di ambate simaha sa kale; totshe timbuva ti va nga ti nato, ti di omile, na ti di furile.

⁶Se va to ta wugoveloni ka Joxuwa, kona Giligali, va txi ya gela Joxuwa ni va ka Israyeli, va txi kha vona: “Hi ta ngu ditikoni ka kule, mahani koko konkuwa txitumelelano ni nathu.”

⁷ Se va ka Israyeli va to xamula ka Vahevhi, va txi kha vona: “Kutilava mi akile hagari kwathu; hi nga mahisa kutxani koko txitumelelano ni nanu kani?”

⁸Sekoko va to kha vona ka Joxuwa: “Athu hi sithumi sako.” Se Joxuwa a to va wotisa ku khene: “Kasi anu nganu vamani, ni kumita ngu hani kani?”

⁹Se va ka Gibheyoni va to mxamula, va txi kha vona: Sithumi sako sita ngu ka ditiko da kule ngutu, ngu mhaka ya ditina da MKOMA, Txizimu txako, nguko hi pfite nduma yakwe, ni totshe ti a nga maha kona Egipta;

¹⁰ni totshe ti a nga maha ka vafumeli vambidi va Vaamori, va nga ti mtxhatuko ka Jordhani, ka Seyoni, mfumeli wa Hesibhoni, ni ka Oge, mfumeli wa Bhasani, a nga ti akile Axitaroti.

¹¹Ngu kumaha keto, madhota athu ni votshe vaaki va ditikoni kwathu, va hi gete va txi kha vona: “Tekani timbuva ta nzila manzani kwanu, se tsulani mi txi va hingeta, mi txi va gela tiya: Athu hi sithumi sanu, mahani koko konkuwa txitumelelano ni nathu!”

¹²Timbuva tiya tathu hi ti tekile mitini kwathu ti txi nge hisa, ka ditshiku di hi nga khukha kasi ku ta kheno kwanu; se konkuwa, ndite ti omile ni ku fura;

¹³kambe misava yi hi nga ti thete ka yona vhinya i ti ti ya yiphya, se ndiye yi sakate; kambe syambalo sathu ni tikathula tathu se nza kale, ngu mhaka ya nzila yathu yo lapha.

¹⁴Sekoko va ka Israyeli va to teka timbuva ta va ka Gibheyoni, aniko kha va kombela wusungukati ka MKOMA.

¹⁵Se Joxuwa a to engisana navo e maha txitumelelano kumweko navo, txa ku a na va hulukisa; se vathangeli va msengeletano va to va mahela txixambanyo.

¹⁶Se ku to maheka taku, ku di gumile masiku mararu, na va di mahile txitumelelano navo, va pfite taku, i ti ti vaakelani vawe, ni ti to va ti ti hanya hagari ka va ka Israyeli.

¹⁷Nguko mbimo yi va nga khukha vanana va ka Israyeli, va to hoka madhoropani kwawe ngu ditshiku da wuraru; se madhoropa a kona ngu awa: Gibheyoni, Kefira ni Bheherote, ni Kiriyate-Jeyarimi.

¹⁸Se vanana va ka Israyeli kha va va daya, nguko vathangeli va msengeletano va va mahete txixambanyo ngu MKOMA, Txizimu txa Israyeli; ngu kumaha keto, wotshe msengeletano wu ti ti ngungurukela wu txi sola vathangeli.

¹⁹Sekoko votshe vathangeli va wombile ka msengeletano wotshe, va txi kha vona: “Athu hi va mahete txixambanyo ngu ditina da MKOMA, Txizimu txa Israyeli; ngu mhaka yeto, kha hi sikoti ku va maha txilo.

²⁰Ati hi no maha ka vona ngu tiya: Hi na va leka ve hanya, kasi ku hi si ti ndindeli kuhenya, ngu mhaka ya txixambanyo txi hi nga txi maha kwawe.

²¹Se vathangeli koko va to va gela ku kha vona: Va na hanye. Se va to maha valavi va tikhuni, ni vareki va mati a wotshe msengeletano, nga ti vathangeli va nga ti ti va gelisile tona.”

²²Se Joxuwa a to va dhana a txi va gela ku khene: “Ngu kutxani mi nga hi xenga mi txi khanu: Hi akile kule ngutu ni nanu, na kuve anu mi akile hagari kwathu kani?

²³Konkuwa koko, mi ruketetwe, kambe kha mi na mbi leka ku va tikhumbi, hambi valavi va tikhuni, mwendo vareki va mati, kasi kuyisa nyumbani ka Txizimu txangu.”

²⁴Sekoko va to xamula ka Joxuwa, va txi kha vona: “Ngako kha ditshuri ku nga ziviswa ka sithumi sako taku, MKOMA, Txizimu txako, a leletete Mosi, txithumi txakwe, ti to a txi mi ninga dotshe ditiko diya, ni kufuvisa votshe vaaki va ditiko masoni kwanu, hi ni kuthava ngutu ka wutomi wathu ngu mhaka yanu. Ngu mhaka yeto, hi mahile tiya.

²⁵Se konkuwa wona taku hi manzani kwako, maha ti u ti wonako i di ta tinene kwako, na ti di lulamile ku u txi hi maha.”

²⁶Ngu kumaha keto koko, a to va maha e va txhatxhisa manzani ka vanana va ka Israyeli; kambe kha va va daya.

²⁷Se ka dona ditshiku dile, Joxuwa a va mahile valavi va tikhuni, ni vareki va mati a msengeletano, ni a txiluvelo txa MKOMA, kala ka ditshiku da nyamsi, ka wukhalo wu a nga wu sawula.