Read chopi 2 Vatesalonika 1 Bible Online

2 Vatesalonika 1 - chopi bible

2 Vatesalonika 1

¹ Paulo, ni Silivhano, ni Timoti, ka Dibanza da Vatesalonika, ava va lumbako Txizimu Tate wathu, ni Mkoma Jesu Kristu.

²Kateko ni kudikha, si nave ni nanu, si si tako ngu ka Txizimu Tate wathu ni ka Mkoma Jesu Kristu.

³Hi fanete kubonga Txizimu yotshe mbimo ngu mhaka yanu, vanathu, nguko eto ti lulamile, nguko likholo lanu la kula ngutu, ni kurandana ka engeteleka mndani ka mmweyo ni mmweyo wanu motshe.

⁴Ngu toneto, ha ti kulisa ngu nganu hagari ka mabanza a Txizimu, ngu mhaka ya kutimisela kwanu ni kukholwa kwanu amu ka sotshe sixaniso ni mihumbo yi mi yi rwalako.

⁵Sotshe siya, njikombiso txa kulamula ko lulama ka Txizimu; si humelela kasiku mi va ni fanelo ya Mfumo wa Txizimu, wu mi xanisekako ngu mhaka ya wona.

⁶Nguko ti lulamile ti to Txizimu txi tshumetela ngu sixaniso ava va mi xanisako.

⁷Kasiku anu mi xaniswako, mi txi ningwa kuhumula ni nathu ditshiku di Mkoma Jesu a nota woneka, a txi ta ngu nzumani kumweko ni tingelozi ta mtamo wakwe,

⁸a di ha mdhikilani ka mndilo, kasiku e pharela ka vale va si txi ziviko Txizimu, ni ka va va si engisiko Evhangeli ya Mkoma wathu Jesu.

⁹Txitsayiso txawe ku nava kulova ko mbi guma, kha va na mbi ka nga yi wona khohe ya Mkoma, hambi kuphatima ka wukoma wakwe,

¹⁰mbimo yi a nota ka edo ditshiku, kasi ku ta dhumiswa hagari ka vasawuleki vakwe, ni ku ta xamalwa hagari ka vale va nga kholwa kwakwe, kufana ni nanu mi nga amukela wufakazi wathu.

¹¹Ha mi kombelela yotshe mbimo, ti to Txizimu txathu txi txi mi maha ava va fanelwako ngu wutomi wu txi nga mi dhanela wona, txi txi thuma ngu mtamo wa txona ti to yotshe mixuvo yanu ya yinene yi txi tatiseka ngu kuenela, ni mthumo wa likholo lanu.

¹²Ngu nzileyo, ditina da Mkoma wathu Jesu Kristu di na dhumiswa kwanu, na nanu mi na dhumiswa, madingano ni kateko ya Txizimu txathu, ni ya Mkoma Jesu Kristu.