Read chopi 2 Vatesalonika 3 Bible Online

2 Vatesalonika 3 - chopi bible

2 Vatesalonika 3

¹Ngu kugwitisa, vanathu, hi khongeleleni, kasiku dipswi da Mkoma di txi ya masoni ngu kutxhumeyelwa ka otshe makhalo ngu kukuluveta, di txi amukelwa ngu txithavo kota nga ti di nga amukeliswa tona ngu nganu,

²Hi kombeleleni kambe ti to hi txi poniswa manzani ka vathu vo soholoka, ni vo biha, nguko hi nga votshe va ku ni likholo.

³Aniko, Mkoma mbwo thembeka: Ene a na mi ninga kutsana, a na mi vhikela ka m'bihi.

⁴Athu ha mi themba ditinani ka Mkoma: Anu ma veketa, kambe mi na zumba mi txi veketa ti hi mi rumako.

⁵Mkoma a na tsimbitise timbilu tanu a txi ti yisa ka lirando la Txizimu, ni kutimiselani ka Kristu.

⁶Ha mi leleta, vanathu, ngu ditina da Mkoma Jesu Kristu, ti to mi txi hambana ni mwanathu wuhi ni wuhi asi londiseliko nzila ya mlayo, a hambanako ni tigondo ti hi nga mi ninga tona.

⁷Anu ma tiziva ati mi fanelako ku ti maha, kasi kulondetela ati athu hi hanyisako tona.

⁸Hagari kwanu, kha ha hanyisa wukara, kambe kha ha dya sakudya sa m'thu mahala, aniko hi thumile wusiku ni mitshikari, ngu kukhutala ni kukarateka, kasiku hi si nemeti ni wammweyo kwanu.

⁹Na i si nga ti to kha hi nga ni fanelo yeto, aniko hi mahisile tiya, kasi ku mi vekela txikombiso.

¹⁰Mbimo yi hi nga ti ni nanu, hi ti mi gela ta tinene, hi txi khathu: Awu asi ti laviko kuthuma, kha nga ni fanelo ya kudya.

¹¹Se hi ti pfite ti to hagari kwanu, ku ni vathu va hanyelo ya ku ti hunda, ava va ti ningetelako ka so mbi nyawula, va txi leka kuthuma.

¹²Ka vonavo, ha va ruma ni ku va laya ngu ditina da Mkoma Jesu Kristu, ti to va txi thuma ngu kuthutha, kasiku ve mana kudya sakudya si va nga si thumela.

¹³Kambe anu, vanathu, mi nga karaleni ngu kumaha ta tinene.

¹⁴Ngako m'thu a txi kanyisa ati hi bhalako ka dipapilo diya, muwonisiseni, mi nga khataleni txilo ngu ngene, kasiku a na wiswa tingana.

¹⁵Hambi keto, mi nga m'woneni nga mlala wanu, aniko mlayeni nga mwananu.

¹⁶Mkoma wa kudikha a na mi ninge kudikha yotshe mbimo ni otshe makhalo. Mkoma a nave ni nanu motshe.

¹⁷Madingula awa, ngani Paulo, ngu txanza txangu ni nga bhala. Ngu txona txitsaniso txangu. Ngu tona ti ni bhalisako tona ka otshe mapapilo angu, ni bhalisa tona tiya.

¹⁸Kateko ya Mkoma wathu Jesu Kristu, yi nave ni nanu motshe!