Read chopi 1 Timoti 3 Bible Online

1 Timoti 3 - chopi bible

1 Timoti 3

¹Di thembekile dipswi diya di ku: Awu a navelako kuva mthangeli wa dibanza, a navela mthumo wa wunene.

² Ngu toneto, kulaveka ti to mthangeli e va i di m'thu wu a ku si nga ni txisolo, i di m'thu wu a ku ni msikati mmweyo, i di wa kutiñola, wa mapimo, a di ni nduma ya yinene, wa kuziva kuamukela vapfhumba, wa kusikota kugondisa;

³i si nga disela mwendo m'thu wa mazunga, aniko a nave i di wo dikha, a si nga ni wukhuxu ni timbiti.

⁴Kulaveka a txi ziva kuxayisa ta tinene m'ti wakwe apune, a txi ziva kugondisa vanana vakwe kuengisa ngu fanelo yi yi lavekako.

⁵Nguko, kungako m'thu asi zivi kuxayisa mwaya wakwe, a na sikotisa kutxani kuxayisa Dibanza da Txizimu kani?

⁶Kulaveka i si nga wu i ku ngadi kwakwe kuhunduluka, kasiku asi ti kulisi, se e wela mu kuabaniswani ka Sathani.

⁷Hahanze keto, ta laveka ti to i di m'thu wu vamwani va hahanze va mmahelako wufakazi wa wunene, kasiku asi soleki ni kubzwetwa ngu milawu ya Sathani.

⁸Vadhiyakoni ni vona, kulaveka i di vathu vo xonipheka, i si nga va makuhu, va si ti ningeteliko wusukeni, i si nga vathumeli va mabhindu a tingana,

⁹ve veketa msisalo wa likholo ngu livhalo lo basa.

¹⁰Nivona kulaveka i di vathu va va nga thanga ngu kudukwa, se ngu msana, ngako va txi maneka va si nga ni txisolo, va na thume mthumo wawe.

¹¹Vavasikati ni vona, kulaveka i di vo ti ñola, vo thembeka ka totshe tinzila.

¹²Vadhiyakoni kulaveka i di va va nga teka msikati mmweyo dwe, ve xayisa ta tinene vanana vawe, ni m'ti wawe wupune.

¹³Nguko avale va thumako ta tinene mthumo wa wudhiyakoni va na mana txhatxhazelo ya txikhunja txa kuxonipheka ni kutsaniswa ka hombe ka likholo ka Kristu Jesu.

¹⁴Na themba ti to kunukunukuwa ni na va kumweko ni nawe konkheyo, aniko ni kubhalela timhaka tiya,

¹⁵kasiku ngako ni txi thuka ni txi swela, u na ziva ti u fanelako kuhanyisa tona nyumbani ka Txizimu, i ku Dibanza da Txizimu txi txi hanyako: Ngu dona i ku phande ya hombe ni txihiketo txa ditshuri.

¹⁶Na tsanisa ti to msisalo wa wukhongeli wathu mbwa hombe: “A wonekisilwe nga m'thu, a wombilwe wo lulama moyani, a wonwi ngu tingelozi, a nuwetwe hagari ka matiko, a tumetwe ha mafuni, a kwetisilwe txitimwi kudhumiswani.”