Read chopi 1 Timoti 4 Bible Online

1 Timoti 4 - chopi bible

1 Timoti 4

¹Aniko Moya wa womba ngu kutsanisa ti to ka masiku awa ma tako vamwani va na hambana ni likholo, ve londeta mimoya yo kanganyisa ni tigondo ta vasathane.

²Ngu mhaka ya kukanganyiswa ngu vamakuhu, avava livhalo lawe li nga vekwa txibawa ngu simbi yo hiswa:

³Vona va na tsimbisa kutekana; va na tsimbisa kudya sakudya sokari na kasi Txizimu ngu txona txi nga si va nga kufela ku si txi amukelwa ngu kubonga ngu va va kholwako ni kuziva ditshuri.

⁴Nguko sotshe si Txizimu txi nga si va nga nza sinene; kuwalo txi txi fanelako kunyenywa, ngako hi txi txi amukela ngu kubonga.

⁵Ngu konaho ka mkombelo ni dipswi da Txizimu, sotshe si sawulekisilwe.

⁶Ngako u txi txhamusela timhaka tiya ka vanathu, u na va u di m'dhiyakoni wamnene wa Jesu Kristu, awu a dyiswako ngu mapswi a likholo ni gondo ya yinene, ayi u yi londetelako ngu kale.

⁷Kambe nyenya mabhulo o hambana ni likholo i ku sihunga tiso sa sikosana. Ti tolovete wukhongeli.

⁸Nguko ku ti toloveta ka mithumo ya mmidi kuvhuna ka kudotho, kasi ku ti toloveta ka mithumo ya wukhongeli kuvhuna ka totshe, nguko ku na ni txithembiso txa wutomi wa konkuwa ni wa mbimo yi yi tako.

⁹Dipswi diya di tsani, kambe di ni fanelo ya kuamukeleka ka votshe.

¹⁰Nguko txivangelo txa kuthuma kwathu ni kulwa kwathu ngu ti to hi vekile kuthemba kwathu ka Txizimu txi txi hanyako, atxi i ku Muhanyisi wa votshe vathu, ngutu-ngutu avale va ku ni likholo.

¹¹Atiya ngu tona u fanelako kuleletela ni kugondisa.

¹²Ku nga ve ni m'thu wo dhelela wuzambi wako, aniko, kuhambana nito, kulaveka u va txikombiso masoni ka makholwa, amu ka kutxhumayela dipswi, amu ka mahanyelo, amu ka lirando, amu ka likholo, amu ka kubasa mbilu.

¹³Na u txi verela kubwaka kwangu, ti ningetele amu ka kugonda dibhuku, amu ka kulaya, amu ka kugondisa.

¹⁴U nga sakane ngu txiningo txi u ku natxo, atxi u nga amukeliswa ditshiku diya vahombe va dibanza va nga womba mapswi a ku kuphaxa, ve kusanzeka manza.

¹⁵Atiya ngu tona u fanelako ku ti veketa hakhana. Atiya ngu tona u fanelako kutsanisela ka tona. U txi hanyisa tiya, kukula kwako ka mithumo ya yinene ku na tikomba ka votshe.

¹⁶Ti wonele upune, u txi xola ni gondo yi u gondisako. Tsana ka sona, nguko ngako u txi maha toneto, u na ti hanyisa awe ni va va ku engisako.