Read chopi 1 Timoti 5 Bible Online

1 Timoti 5 - chopi bible

1 Timoti 5

¹U nga kawuke ngu mtamo awu i ku wa hombe kwako; aniko mkhongotele nga tate wako; vafana va kawuke nga vananda vako;

²vavasikati va hombe va khongotele nga vamame vako, mahorana ma angule nga tindiyako ngu kotshe kubasa ka mbilu.

³Vekela txithavo tinoni, atile i ku tinoni kha ditshuri.

⁴Nguko, ngako msikati wa noni a di ni vanana mwendo vatukulu, ti lumba vona kuthanga ve komba txithavo ka vaveleki vawe, ni ku va tshumetela asi va nga si amukela kwawe. Atiya ngu tona ti tsakisako masoni ka Txizimu.

⁵Se ka wule i ku noni kha ditshuri, awu a nga sala ekhalela, eyo a vekile txithembo txakwe ka Txizimu, a zumba a txi khongela ni kukombela wusiku ni mitshikari.

⁶Kasi awule a lavako ku ti mahela kuranda, eyo hambi a txi hanya, a fite.

⁷Atiya ngu tona u fanelako ku va laya ka tona, kasiku ve zumba va si nga ni txisolo.

⁸Awu asi khataleliko maxaka akwe, ngutu-ngutu ava i ku va mwaya wakwe, eyo a kanetile likholo, a bihile ngutu kupinda dihedheni.

⁹Wamsikati wa noni a na bhalwe dibhukuni ka tinoni dwe ngako a di ni tanga yi yi ku si nga hahatshi ka mtxhanu wa magumi ni dimwedo a malembe, na i di wu a nga ti tekilwe ngu mwamna mmweyo.

¹⁰Ta laveka ti to e ziwa ngu mithumo yakwe ya yinene; kufana ni kuwunja vanana ngu nzila ya yinene, kuamukela vapfhumba, kukuwula mikondo ya vasawuleki, kuvhuna ava va xanisekako, ni kutiningetela ka yotshe mithumo ya yinene.

¹¹Se vavasikati va va nga felwa i di ngadi vaphya, evo zumbela kule navo. Nguko minavelo yawe, ngako yi txi va hambanisa ni Kristu, va na lava kutshumela ve tekwa;

¹²se ve mana mnandu ngukuva ve wila kutiñola kwawe ko khata.

¹³Hahanze keto, vavasikati va va nga felwa i di ngadi vaphya, ngako va si thumi txilo, va gonda kurenzelekela ni miti, i si nga ngu mhaka ya wukara dwe, aniko kambe va ti ningetela mu ka siwombawomba sa kulenga vamwani, ve ti maha valanduli va timhaka ta wutomi wa vane, ve womba-womba ngu ti ti si faneliko kuwombwa.

¹⁴Ngu toneto, ni navela ti to tinoni ti ku ngadi tiphya ti tekwa, ti veleka vanana, ti wonda mwaya, ti si tuleli mlala nzila yo womba kubiha ngu wukhongeli.

¹⁵Nguko ti ho timwani tinoni, ti nga ti hambanisa ni mlayo ti txi londeta Sathani.

¹⁶Ngako wamsikati wa dikholwa a di ni tinoni m'tini kwakwe a na ti vhune; dibanza di nga nemetwe ngu tona, kasiku di sikota kuvhuna ava hakunene i ku tinoni ta ditshuri.

¹⁷Madhota awa ma tsimbitisako ta tinene mthumo wa wuthangeli, ma fanetwe ngu kutshungulwa kambidi, ngutu-ngutu aawa ma thumelako kutxhumayela dipswi ni kugondisa;

¹⁸ Kunene Mibhalo ya womba yi txi: “U nga sunge txisofu txa homu yi yi hulako,” ni tiya kambe taku: “Txithumi txi fanetwe ngu muholo wa txona.”

¹⁹ U nga amukele mhaka ya kumangalela mthangeli, hahanze ka wufakazi wa vathu vambidi mwendo vararu.

²⁰Kawuka avale va onhako masoni ka votshe kasiku ve telwa ngu kuthava.

²¹Na kulaya masoni ka Txizimu ni ka Jesu Kristu, kumweko ni ka tingelozi to sawuleka, ti to u veketa sileleto siya, u nga lamule ngu kuwona khohe ya m'thu, u nga mahe txilo ngu kulondisela wuxaka.

²²U nga tutumele kusanzeka manza m'thu kasiku u si rwali sionho sa mmwani. Awe upune ti ñole, u txi zumba u di basile mbilu.

²³U nga ye masoni ngu kuzumba u txi sela mati dwe, selanyana vhinya ya yidotho, ngu mhaka ya mndani kwako, ni mhaka ya kukhala ngu kulwalalwala.

²⁴Va ho vathu vava sionho sawe si wonekako ha kubasani, va sinzi kulamulwa, kasi sa vamwani si woneka msana keto.

²⁵Kufana ni toneto, mithumo ya yinene ya ti wonekisa; hambi yile hi si yi woniko kha yi sikoti kuzumba kusisalani.