Read chopi 1 Timoti 6 Bible Online

1 Timoti 6 - chopi bible

1 Timoti 6

¹Votshe va va ku hahatshi ka dikange da wukhumbi va na wone vanyamne vawe nga vathu va va fanelako kuvekelwa txithavo, kasiku ditina da Txizimu ni gondo ya txona si si solwi.

²Ava va ku ni vanyamne va i ku makholwa, va nga va kanyise, ngu kuziva ti to i vanawe, aniko va na va thumele ta tinene, nguko evo i makholwa ni vanathu vo randeka, va vhunwako ngu mithumo yawe ya yinene. Ngu toneto, u fanelako kugondisa ni kuleleta tona.

³Ngako mmwani a txi gondisa to hambana, asi londeteli gondo ya Mkoma wathu Jesu Kristu ni gondo ya wukhongeli,

⁴a maha eto ngu mhaka ya kutikulisa, kha zivi txilo, i m'thu wo lwala a tsimbilako a txi wusa mazunga ni kukanetisana ka mapswi. Ngu konaho ku tumbulukako livengo, mazunga, kuruketela Txizimu, kualakanyela vamwani to biha,

⁵kubhongelana ko mbi guma hagari ka vathu va mapimo o hambaneka, ava va ku si nga ni ditshuri, nguko va pimisa ti to wukhongeli njisima txa dibhindu.

⁶Ina, wukhongeli njisima txa dibhindu ka wu a zivako kutipimela.

⁷Nguko kha ha ta ni txilo ha mafuni, kambe kha hi na mbi teka txilo txa ha mafuni, ngako hi txi khukha.

⁸Ngu toneto, ngako hi di ni sakudya ni sakuambala, he tsakeleni soneso.

⁹Se ava va lavako kumaha vanyatithombe, va wa kudukwani ni kuriyelwani ni minavelo yo tala ya wubhemba ni ya kuyisa tiphangoni, yi yisako vathu kulovani, ni kumwalatwani.

¹⁰Nguko kuranda ngutu male, ngu wona mkoloti wa totshe tixaka ta wubihi; ngu mhaka ya kona kunavela kuwa ko mbi na mpimo, vamwani va hambani ni likholo, ve ti nemeta vapune ngu kuvilela ko tala.

¹¹Aniko awe u ku m'thu wa ka Txizimu, si vayilele sotshe siya. U fanete kukhutalela kululama, kukhongela, kukholwa, lirando, kutimisela, kuthutha.

¹²Lwana yimbi ya yinene ya likholo ñolisisa wutomi wo mbi guma, awu u nga dhanelwa wona, awu u nga wu fakazela ngu nzila yo tshura masoni ka timwani tifakazi ta tingi.

¹³ Ani na kulaya, masoni ka Txizimu, txi ningako wutomi ka sotshe simaha, ni masoni ka Kristu Jesu, awu a nga fakaza masoni ka Ponsio Pilato ngu mafakazelo o tshura a kukholwa:

¹⁴Gonga mlayo wuwa, wu si nga ni dibawu, hambi dikhwiti, kala kutiwonekisa ka Mkoma Wathu Jesu Kristu,

¹⁵akuwa ku nota kombisa, ka timbimo ti ti nga emiswa, ene nyamne wo dhumiseka ni wammweyo ekha, Mfumeli wa vafumeli, Mkoma wa vakoma;

¹⁶awu i ku ekha wa wutomi wo mbi guma, a zumbako kuwonekelani ko mbi manelwa, awu a nga mbi wonwa, kambe asi sikotiko kuwonwa ngu m'thu ni wammweyo; kwakwe ku nave ni txithavo ni wukoma wo mbi guma. Amen!

¹⁷Ka vanyatithombe va ha mafuni muwa, va laye ti to va si ti kulisi, va si veki kuthemba kwawe ka thomba yo mbi tsana, aniko ve themba Txizimu, txi hi wuyiselako sotshe ngu ku hi tatela, kasiku hi tsaka.

¹⁸Va na mahe wunene, va nave vanyatithombe ngu mithumo, va nave ni wuha, ve ziva kuabana ni vamwani.

¹⁹Va txi mahisa eto, va na va va txi ti vekela txuma txo tshura, txo tsana, txa mbimo yi yi tako, kasiku ve mana wutomi wa ditshuri.

²⁰Awe Timoti, veketa si u nga vekelwa manzani kwako, tsimbilela kule ni siwombawomba sa walo, ni kukanetisana ngu timhaka ta wuzivi wa makuhu.

²¹Ngu kulondetela toneto, vamwani va mwalatile likholo. Makatekwa ma nave ni nanu!