Read chopi 2 Timoti 2 Bible Online

2 Timoti 2 - chopi bible

2 Timoti 2

¹Ngu toneto, awe, mwanangu, tsana ka tikateko ti ti ku ka Kristu Jesu.

²Ati u nga tiengisa kwangu masoni ka tifakazi ta tingi, ti veke manzani ka vavamna vo thembeka, ava va sikotako kugondisa vamwani.

³Nawe, xaniseka kumweko ni nani, nga disotxhwa da dinene da Jesu Kristu.

⁴A walo m'thu wu, a ku, a di yimbini, a txi ti ningetela ka mithumo ya kuhanya kuwa, ngako a txi lava kutsakisa awule a nga mramba ku ta yimbini.

⁵Kufana ni toneto, amu ka mapalisana a kulwa, ndena ya kulwa kha yi amukeli m'bhoti, ngako yi sa lwa ngu tifanelo ti ti lavekako.

⁶Mdimi wu a thumako ngu kutikarata, ngene a fanelako kuthanga a txi amukela mihando.

⁷Engisa ti ni wombako, se Mkoma a na kuninga kuziva totshe timhaketo.

⁸Alakanya Jesu Kristu, a nga wuka ka vakufa, ene wa lixaka la Dhavhidha, madingano ni Evhangeli yi ni yi txhumayelako,

⁹ayi ni xanisekako ngu mhaka ya yona, ni za ni sungwa ngu tingomondo nga no va txigevenga, kambe dipswi da Txizimu kha di na kusungwa ngu tingomondo.

¹⁰Ngu konaho ni timiselako ka totshe, ngu mhaka ya vasawulwa, kasiku ni vona ve mana kuhanyiswa kuwa kuhumako ngu ka Kristu Jesu, kumweko ni kupfaliswa ko mbi guma.

¹¹Di thembekile dipswi di di ku kha dona: “Ngako hi txi fa kumweko nayo, hi na wuka kumweko nayo kambe;

¹² ngako hi txi xaniseka kumweko nayo, hi na fuma kumweko nayo. Ngako hi txi mlamba, nene a na hi lamba;

¹³ngako hi si thembeki, ene a na zumba a di thembekile, nguko kha na ku ti kaneta apune.”

¹⁴Va alakanyise timhaka tiya, u txi ti fakaza masoni ka Txizimu, ti to kulaveka va si kanetisani ngu mapswi, nguko kuphikizana kha kuvhuni txilo, tsena kuthuma kutimeta ava va ti engisako.

¹⁵Khutalela kumaneka masoni ka Txizimu u di m'thu wu a nga dukwa, txithumi txi txi si faneliko kutelwa ngu tingana, awu a gondisako dipswi da ditshuri ngu nzila yo lulama.

¹⁶Hambana ni mabhulo awalo, o mbi na wukhongeli, nguko ava va ma dhundako, va na ya masoni ngu kunyenya Txizimu,

¹⁷mapswi awe ma fana ni nyamakazi, a sakatako mmidi. Hagari kwawe ku na ni Himenewu ni Filetusi.

¹⁸Vona va hambanile ni ditshuri ngu kuwomba ti to ta kuwuka ka vafi ti pindile kale, ve khuvekisa vamwani amu ka kukholwa.

¹⁹Hambi keto, makhato o tsana ma nga vekwa ngu Txizimu ma ngadi zumbisekile, ma nyathetwe txitambu txa dipswi diya di ku: “Mkoma wa va ziva ava va mlumbako.” Ni tiya kambe taku: “Wuhi ni wuhi a fakazako ngu ditina da Mkoma a na hambane ni wubihi.”

²⁰Ka nyumba ya hombe kha ku maneki siya sa nzalama ni sa silivhela dwe, aniko sa maneka kambe ni sa mavato ni sa dibumba; simwani sina ni mthumo wa lisima la hombe, simwani kha si na mthumo wa lisima la hombe.

²¹Ngu konaho, awu a ti basisako ka sihoxo siya a na va i di txiya txa hombe, txo sawuleka, txa kuvhuna ka nyamne wa txona, atxi txi nga lulamiselwa wotshe mthumo wa wunene.

²²Vayilela minavelo yo biha ya vavaphya. Tsimbila ngu nzila yo lulama, ya likholo, ya lirando, ya kudikha, kumweko ni vale va khongelako ngu ditina da Mkoma, ngu mbilu yo basa.

²³Nyenya kukanetisana ka wuphukuphuku, ku si vhuniko txilo. Wa tiziva ti taku eto ti va nga mazunga.

²⁴Kasi awu i ku txithumi txa Mkoma kha faneli kulwa mazunga. A fanete kuhanya ngu kuthutha ni votshe vathu, a txi ziva kugondisa, a txi honisela amu ka sixaniso.

²⁵U fanete kulaya kha kwati ava va kanetako, ngu kurinzela ti to Txizimu txi na va ninga mtamo wa kuhunduluka,

²⁶ni kuvaninga kambe kutshumela ve wuya ka wuzivi, txi va ponisa ka mlawu wa Sathani, a nga ti va bzwetile ngu wona, kasiku ve maha kuranda kwakwe.