Read chopi 2 Timoti 3 Bible Online

2 Timoti 3 - chopi bible

2 Timoti 3

¹Kambe, ziva tiya: Ka masiku a kugwitisa ku na hoka timbimo to karata.

²Nguko vathu va na va vo ti randa vapune, vanyatimbiti, va ku ti mahisa, va kutikulisa, varuketeli, vaeyisi va vaveleki, vo mbi ziva kubonga, va vo mbi khongela,

³ava vo mbina lirando, vo mbina kutsetselela, valumbeti, vo mbi ti ñola, va tshofu, valala va ti i ku to lulama,

⁴vaningeli va vakwawe, vathu vo mbina txithavo, vo ti guleta, ava va randako ngutu so tsakisa nyama kupinda kuranda Txizimu.

⁵Va na nga vo va ni wukhongeli, kasi va lamba mtamo wa wona wukhongeli. Va vayilele evo ni vona.

⁶Hagari kwawe kumaneka avale va wulelako mitini ka vathu, ve bzweta vavasikati vo mbi tsana, ava va nemelwako ngu sionho, va ndindwako ngu totshe tixaka ta minavelo yo biha,

⁷va gondako yotshe mbimo, aniko va si sikotiko kumana wuzivi wa ditshuri.

⁸ Kufana ni kuwa Janesi ni Jambresi va nga eyisa Mosi, ngu toneto ni vona vava va kanetako ditshuri. I vathu va va nga onheka mapimo, va likholo lo mbi tsana.

⁹Kambe vona kha va na mbi ya kule ngutu, nguko wuphukuphuku wawe wu na ti kombisa ka votshe, kufana ni wuphukuphuku wa vona vale vavambidi.

¹⁰Kambe awe u ni londisete ngu hafuhi amu ka kugondisa, amu ka mahanyelo, amu ka makungo, amu ka likholo, amu ka lihoniselo, amu ka lirando, amu ka kutimisela,

¹¹amu ka sixaniso, ni kuxupheka kuwa ni nga kuziva ni di Antiyokiya, Ikoniyo, ni Listra. Eso sixaniso ni nga si wona! Kambe Mkoma a ni ponisile ka sotshe.

¹²Kha ditshuri, votshe va va lavako kuhanya ngu wukhongeli ngu ka Kristu Jesu, va na xaniswa.

¹³Kasi vathu va tshofu ni vaxengeteli, vona va na ya masoni ngu kumaha wubihi, va txi kanganyisa vamwani ni ku ti kanganyisa vapune.

¹⁴Aniko awe, zumba u di tsani ka tiya u nga gonda, u txi ti tumela ngu kuva i di ta ditshuri.

¹⁵Kukhukhela ha wananani kwako, wa yi ziva Mibhalo yo sawuleka, yona yina ni mtamo wa ku kuninga wuzivi, awu wu yisako kuhanyiswani ngu kukholwa ka Kristu Jesu.

¹⁶Yotshe Mibhalo yi pimisilwe ngu Txizimu, ya vhuna kugondisa, kulaya, ni kukawuka ni kutolovetisa tinzila to lulama;

¹⁷kasiku m'thu wu i ku wa ka Txizimu a txi va a di hetisekile, a txi lulamiselwa ka yotshe mithumo ya yinene.