Read chopi 2 Timoti 4 Bible Online

2 Timoti 4 - chopi bible

2 Timoti 4

¹Na ku xambanyisa masoni ka Txizimu ni ka Jesu Kristu, awu a nota lamula vohanya ni vofa ngu kutiwonekisa kwakwe ni mfumo wakwe:

²Txhumayela dipswi, khutala ka mbimo yi yi fanelako ni ka mbimo yi yi si faneliko; kawuka, laya, gondisa ngu kuhonisela ni wuzivi.

³Nguko yi nata mbimo yi vathu va no mbi dhunda kuengisa gondo ya yinene, aniko, madingano ni mixuvo yawe ni kulava kutsakisa tinzeve tawe, ti nyakatelwako, va na ti lavela mtengo wa vagondisi.

⁴Vona va na hambukisa tinzeve tawe ka ditshuri, se va na rendekela mabhulo awalo.

⁵Aniko, awe, zumba u di tsani yotshe mbimo, timisela amu ka sixaniso, ti ningetele ka mthumo wa Evhangeli, hetisa mthumo wako.

⁶Nguko ani se ni hafuhi ni kuningelwa nga mhamba ya kubhawa; txikhati txa kurura kwangu txi hokile.

⁷Ni lwite yimbi ya yinene, ni hetile mnava wa kututuma kwangu, ni veketile likholo.

⁸Konkuwa ni lulamisetwe m'bhoti wo lulama, awu ni nota ningwa ngu Mkoma, mlamuli wo lulama, ka ditshiku da hombe, i si nga ani nokha, aniko ni ka votshe vale va no va va di rinzete ngu lirando kuhumelela kwakwe.

⁹Zama kuta kheno kwangu ngu kukuluveta.

¹⁰ Nguko Dhamasi, ngu kuranda sa mafu awa, a ni thavile e tsula Tesalonika, Kreseka a tsute Galatiya, ni Titosi a tsute Dhalmatiya.

¹¹ Luka ngene ekha a ku ni nani. Ngono ni Marku nguko wa ni vhuna ngutu mthumoni.

¹²Ani Tikikusi ni mrumete Efesu.

¹³ Ngako u txi ta, neha dijasi diya ni ngadi siya Trowasi ka Karpusi, kumweko ni mabhuku, ngutu-ngutu mapapilo a madhowo.

¹⁴ Alexandre mtshuli, a ni mahete tshofu yo biha ngutu. Mkoma a na mtshumetele madingano ni mithumo yakwe.

¹⁵Nanawe ti wonele ngu ngene, nguko ene a tshurarete mapswi athu ngu mtamo.

¹⁶Kutiangulelani kwangu ko khata, kuwalo ni wammweyo a nga ni emela, votshe va ni lekile ha mpfhukani. Kambe va nga thuke va txi ningwa mnandu ka mhaka yiya.

¹⁷Aniko Mkoma a ni emete, a txi ni tsanisa, kasiku dipswi di txi txhumayelwa ngu ngani, ngu kuhetiseka, ti to di txi mana kuengiswa ngu votshe vamatiko. Ani ni hulukisilwe ka txisofu txa ngonyamo.

¹⁸Mkoma a na ni hulusa ni ka yotshe mithumo yo biha; a na ni ponisa kasiku e ni yisa ka Mfumo wakwe wa nzumani. Kupfaliswa ku nave kwakwe ngu malembe ni malembe. Amen.

¹⁹Dingula Priskila ni Akila, kufana ni mwaya wa Onesiforo.

²⁰ Erasto a sate Korinto. Ni site Trofimo a txi lwala didhoropani ka Mileto.

²¹Kuluveta u txi ta kheno wu sinzi kuhoka wuxika. Va kudingula: Eubhulusi, ni Pudhente ni Lino ni Klawudhiyo ni votshe vanathu.

²²Mkoma a nave ni moya wako! Kateko yi nave ni nanu motshenu!