Read chopi Titosi 3 Bible Online

Titosi 3 - chopi bible

Titosi 3

¹Alakanyisa votshe ti to va fanete kutiveka hahatshi ka vafumeli ni ka vakoma, va fanete ku va engisa, ve zumba va di ti lulamisete kumaha mthumo wuhi ni wuhi wo lulama,

²ni ti to kha va nga ni fanelo yo womba kubiha ngu m'thu hambi kuwusa mazunga, aniko va na mahe vathu vavanene, va kombako txithavo ka votshe.

³Nguko nathu kale hi ti sipumbu, ni sikanyisi, ni vatimeli va nzila, ni tikhumbi ta lotshe lixaka la minavelo yo biha, hi txi hanya kubihani ni mu kubavelanani, hi txi zondwa ngu vathu ni kuzondana athu ngu txathu.

⁴Kambe mbimo yi wunene ni lirando la Txizimu Muhanyisi wathu si nga ti wonekisa ka vathu, txona Txizimu txi hi ponisile,

⁵i si nga ngu mhaka ya mithumo yathu ya yinene hi nga yi maha, aniko ngu mhaka ya wumbilu wa txona hi sambisilwe hi phindulwa hi txi maha vavaphya ngu mtamo wa Moya wo Sawuleka,

⁶awu txona Txizimu txi nga wu thela ngu kuenela txitimwi kwathu ngu Jesu Kristu Muhanyisi wathu;

⁷Txizimu txi mahile tiya kasi ku hi txi mahwa valulami ngu mtamo wa kateko ya txona, ni kumahwa vadyi va thomba ya wutomi wo mbi guma, awu hi wu rinzelako.

⁸Di thembekile dipswi diya. Nanani ni lava ku u sunamisa kugondisa mhaka yiya, ti to avale va kholwako ka Txizimu va na khutala amu ka mithumo ya yinene. Atiya tina ni lisima kambe ta vhuna vathu.

⁹Hambana ni timhaka ta kukanetisana ka wupumbu, ni kulondetela txhatxhameto ya sibongo, u txi hambana ni mazunga, ni kukanetisana ngu mlayo, nguko eto kha ti vhuni txilo, kha ti na lisima.

¹⁰M'thu wu a vangako mibhando hagari ka makholwa, mkawuke kamweko mwendo kumbidi; a txi lamba msana keto, u nga mkhatalele;

¹¹nguko se ta zivaneka ti to m'thu wo ngeto a onhekile e ti ningela txionhoni, e ti abanisa apune.

¹² Mbimo yi ni no rumela Artemasi mwendo Tikikusi va txi ta kheyo kwako, ti karate u txi ni tela kheya Nikopoli, ahawa ni no ya zumba kona, yotshe mbimo ya wuxika.

¹³ Ti karate u txi vhunetela kulongela dipfhumba da Zena, m'zivi wa mlayo, ni Apolosi, kasiku va si pwatekelwi ngu txilo.

¹⁴Votshe va ka kwathu va fanete kugonda kukhutalela mithumo ya yinene, kasi kuvhuna amu si pwatekako ngutu, va si mahi sifule so mbi veka mihando.

¹⁵Va kudingula votshe va va ku ni nani. Dingula votshe va va hi randako ngu mu ka likholo. Makatekwa a Txizimu ma nave ni nanu motshe!