Read chopi Filimoni 1 Bible Online

Filimoni 1 - chopi bible

Filimoni 1

¹Ani Paulo, txibotxhwa ngu mhaka ya Jesu Kristu, ni mwanathu Timoti, hi bhalela awe Filimoni, m'vhuneteli wathu wo randeka ngutu,

² ni ndiyathu Afiya, ni ndena kulothu Arkipo, ni ka Dibanza di di sengeletanako nyumbani kwako.

³Kateko ni kudikha si nave ni nanu, si txita ngu ka Txizimu Tate wathu, ni ka Mkoma wathu Jesu Kristu.

⁴Yotshe mbimo na bonga ka Txizimu txangu, na ni txi kualakanya mikombeloni kwangu.

⁵Nguko, na engisa va txi womba-womba ngu lirando lako, ni likholo li li ku ningako mtamo masoni ka Mkoma Jesu ni ka votshe vasawuleki.

⁶Ani ni kombela ti to likholo li u sengelako ka lona ni vamwani li na ku ninge kuziva totshe ti hi fanelako ku ti maha ngu lirando ka Kristu.

⁷Kha ditshuri, mwanathu, ni mani kutsaka ka hombe ni kuthavelelwa ngu mhaka ya lirando lako, nguko, mwanathu, timbilu ta vasawuleki ti tsanisilwe ngu ngawe.

⁸Ngu konaho, hambiko ni ku ni yotshe fanelo ngu ka Kristu, ya ku ku kurumeta ati ti lavekako,

⁹ni randa kumaha ngu ku kukombela ngu lirando. Ani Paulo, wo kumba nga tiya, na kambe ni di ku khotelwani konkuwa ngu mhaka ya lirando la Jesu Kristu,

¹⁰ na ku kombela ngu mwanana wangu Onesimu, awu ni nga m'veleka ni di mkorani.

¹¹Awu, kale a nga ti si vhuni txilo kwako, kambe, konkuwa, a vhunako ngutu, kwako ni kwangu.

¹²Na mtshumeta e wuya kwako; ati ti fanako ni ku kurumela mwanana wo veleka nipune.

¹³Ani ni ti navela ku m'zumbisa kheno ni nani, a txi kutsiveta ka mthumo wa ku ni vhunetela, ku khotelwani muwa ni ku kona, ngu mhaka ya Evhangeli.

¹⁴Aniko, kha na lava kumaha txilo, na ni sa thanga ngu kuengisana ni nawe, kasiku mthumo wako wa wunene wu si fananiswi ni wo kurumetwa, kambe u txi wonwa awe ti to u wu mahile ngu kuranda ka mbilu.

¹⁵Nguko, tximwani txikhati a tekilwe kwako ngu mbimonyana ya yidotho, kasiku u txi tshumela u mmana do gwita,

¹⁶na i si nga ngadi khumbi, aniko a txi va i di wu a pindako khumbi, mwanathu wo randeka, kambe ene mbwo randeka ngutu kwangu, ngutu-ngutu kwako nawe, a na va i di wo randeka ngu ka wuthu ni ka Mkoma.

¹⁷Ngu konaho, ngako u txi ni maha mngana-kuloni, mu amukele nga wo ni amukela ani nipune.

¹⁸Ngako ene a di ku luzisile txokari, mwendo kutxeneka txomaha, eto ti veke ka sikweneti sangu.

¹⁹Ani Paulo, ni ku bhalelako ngu txyanza txangu, ngani ni no dihela. Kha ni ku alakanyisi ti to na nawe u na ni txikweneti kwangu, txikweneti txa kona ngu ngawe ngu wutumbu wako.

²⁰Ina, mwanathu, ni na mane kutsakiswa ngu ngawe ka Mkoma. Thavelela mbilu yangu ngu ka Kristu.

²¹Ni kubhalela na ni di ni kuthemba ko tsana ti to wa engisa, ni kuziva ti to u na maha to pinda ati ni ku kombelako.

²²Seni kambe, ni lulamisele wukhalo wo nata zumba ka wona, nguko ngu konaho ka mikombelo yanu, na themba ti to ni na tshumetwa ni txi wuya kheyo kwanu.

²³Wa kudingula Epafrasi txibotxhwa kulothi ngu ka Kristu Jesu.

²⁴ Kumweko ni Marku ni Aristarkusi, ni Dhemasi ni Luka, sithumi kulothi.

²⁵Kateko ya Mkoma wathu Jesu Kristu, yi nave ni moya wanu.