Read chopi Vahebheru 12 Bible Online

Vahebheru 12 - chopi bible

Vahebheru 12

¹Ngu toneto, akuwa hi nga randelwa ngu mtalo wa hombe wa tifakazi ta likholo, nanathu hi fanela kutshotsha kule sotshe si si hi nemelako kumweko ni txionho txi txi hi namarelako, hi txi tutuma ngu kutsanisela mnava wu hi nga sikelwa wona.

²Na hi txi wonetela Jesu, m'vangi ni muhetisekisi wa likholo lathu, awu a nga leka litsako li a nga velekwa ka lona, a txi langa sixaniso sa kurwala txihambano, asi khatali ngu kurukwa. Se konkuwa, a maneka a di khalahatshile txineneni ka txikhalo txa wukoma txa Txizimu.

³Ngu toneto, alakanyani ene wuwa a nga timisela kuxaniswa ko ngeto, ngu mhaka ya vaonhi, kasiku mi si rereki, mi si gumi mtamo timbiluni kwanu.

⁴Anu kha mi nzi kulwa ni txionho, aha koza mi theketa mnoha.

⁵Kasi mi divate mapswi awa mi khongotelwako ngu ona, nga kule ka vanana, aawa ma ku: “Mwanangu, u nga kanyise kulaywa ngu Mkoma: U nga khuveke, ngako a txi kukawuka.

⁶Nguko Mkoma a kawuka m'thu wu a mrandako, ni kutsayisa mwanana wuhi ni wuhi, a mu amukelako.”

⁷Anu mi tsayiselwa kugondiswa. Txizimu txi mi wona kota nga vanana va txona. Nguko, kasi ngu wuhi mwanana asi kawukwiko ngu tate wakwe, kani?

⁸Ngako mi si gondiswi ati votshe vanana va gondiswako tona, tikomba ti to mi mirembwa, kha mi nga vanana va ditshuri.

⁹Hahanze ka toneto, hi ni vatate vathu va mmidi, avava va nga hi gondisa, vona ha va xonipha. Ina kha hi faneli kuthava ngutu Tate wa mimoya, kasi ku hi na hanya kani?

¹⁰Nguko, vona va hi gondisile txikhati txa txidotho, madingano ni mawonelo awe. Aniko, Txizimu txa hi laya kasiku txi txi hi vhuna, ti to hi fana natxo amu ka wusawuleki wa txona.

¹¹Kha ditshuri, kotshe kutsayiswa kha ku tekeli kuwoneka ti to njimaha txo tsakisa, aniko kuwonekisa ku nga ngu xaniswa. Kambe msana ka mbimo, ka vale va nga gondiswa toneto, kuninga mihando ya kudikha ni ya kululama.

¹²Ngu toneto, guletani manza anu a kukarala ni mazolo anu a kurereka.

¹³ Lulamiselani mikondo yanu tinzila ta tinene, kasiku txihango txi txi nga limala, txi si khuduki, aniko txi na hanyiswa.

¹⁴Zumbani ngu kudikha ni votshe, mi lava wusawuleki; nguko, hahanze ka wona, awalo wu a sikotako kuwona Mkoma.

¹⁵Ti woneleni kha kwati, kasi ku ni wammweyo kwanu asi kelelelwi ngu mathomo a Txizimu. Ku nga ve ni m'thu a milako hagari kwanu nga mkoloti wo bava, awu wu vangako kukarateka ni kunyeta votala.

¹⁶Ku nga ve ni wammweyo wa wugango mwendo awu a nyenyezisako sa kusawuleka nga Esawu, awu a nga xavisa wutiwula wakwe ngu mbiya ya sakudya.

¹⁷ Ma tiziva kambe ti to mbimo yi a nga lava thomba ya kukatekiswa, a nyenyilwe nguko kha mana nzila yo hunduluka ngu yona, hambiko a nga ti kombela ngu kudila mirongo.

¹⁸Kha ditshuri, anu kha ma tshuketela, kufana ni vanana va Israyeli, ka mmango wu wu sikotako kugweswa, awu wu ku ni mndilo wo tura, ni txidema, hunguva, ni txingulu.

¹⁹Anu kha ma pfa kuvetwa ka mpundu ni kukwangula ka dipswi. Ava va nga pfa dipswi da kona va zile ve kombela ti to va si engeti ve di pfa kambe.

²⁰Nguko, va ti xuleka kulondetela ati va nga ti rumwa ngu dona, ti taku: “Hambi i di txifuyo, ngako txi txi gwesa mmango wuwa, txi na fayetelwe ngu marigwi.”

²¹Kha ditshuri, mhaka yiya i ti yo thisa ngutu, ahawa Mosi a nga za a txi womba ku khene: “Na dhudhumela ngu kuthava,”

²²Aniko, anu mi tshuketete ka mmango wa Siyoni, didhoropani ka Txizimu txi txi hanyako, Jerusalema wa nzumani, ka tingelozi ta mazana ni mazana, ati ti ku hagari ka msaho.

²³Anu mi tshuketete ka Dibanza da vanana va matiwula, ava matina awe ma nga bhalwa nzumani, ni ka Txizimu Mlamuli wa votshe, ni ka mimoya ya valulami va va nga hoka kuhetisekani;

²⁴ni ka Jesu muemeli wa txitumelelano txa Txiphya, ni ka mnoha wa kuxwayela, wu wu ku ni lisima lo pinda mnoha wa Abhele.

²⁵ Ti woneleni ti to mi si lambi kuengisa wu a wombawombako. Nguko, akuwa va nga mbi huluka kutsayiswani avale va nga lamba kuengisa awule a nga ti va kawuka ha mafuni, ngutu-ngutu athu kha hi na mbi huluka, ngako hi txi lamba kuengisa awu a hi kawukako a di nzumani.

²⁶Ene wu dipswi dakwe di nga zinginisa mafu, konkuwa a huwelela a txi khene: “Ni na tshumela ni txi zinginisa kambe, i si nga mafu dwe, aniko ni yona nzuma na yi zinginisa.”

²⁷Mapswi awa kambe ma zivisa ka wumbidi ti to si na fuviswa sotshe siwumbwa so dekadeka sa ha mafuni, kasiku si txi sala dwe asi si si dekadekiko.

²⁸Ngako hi nga amukela mfumo wo mbi dekadeka, he ñolisiseni ta tinene kateko yiya. Ngu yona, a hi khozeleni Txizimu ngu nzila yi yi amukelekako, ngu kutiveka hahatshi, ni txithavo.

²⁹Nguko, Txizimu txathu, i mndilo wu wu hisako.