Read chopi Vahebheru 3 Bible Online

Vahebheru 3 - chopi bible

Vahebheru 3

¹Ngu toneto, vanathu va vakusawuleka, anu mi nga mana txihiwa txa kudhanwa ngu Txizimu: Alakanyani Jesu, mpostoli ni Mphaxeli wa Hombe wa kukholwa kwathu.

²Ene a thembekile ka wu a nga msawula, nga Mosi nene a nga ti thembekile mndani ka yotshe Nyumba ya Txizimu.

³Nguko, ene a manekile a di ni wudhumo wa hombe kupinda Mosi, kambe muaki wa nyumba a mana kudhumiswa ka kupinda nyumba ya kona.

⁴Nguko, nyumba yihi ni yihi yi ni muaki wa yona, kambe awu a nga aka sotshe i Txizimu.

⁵Se Mosi, a ti thembekile mndani ka yotshe Nyumba ya Txizimu, kota txithumi, kasi ku e maha fakazi ya totshe ti ti nga ti fanete kuwombwa.

⁶Aniko Kristu, a thembekile kota Mwanana, nyumbani ka txona Txizimu. Se Nyumba ya Txizimu ngu ngathu, ngako hi txi vekisa kutsana ko hetiseka ni kuthemba ko tsakisa.

⁷ Ngu toneto, Moya wo Sawuleka wa womba wu txi kha wona: “Nyamsi, ngako mi txi engisa dipswi da Txizimu,

⁸mi nga bangiseni timbilu tanu, nga ati ti nga maheka kudukwani ngu ditshiku da txiduko;

⁹Ahawa vatate vanu va nga ni duka kona, kasiku va txi ni xola, ve wona mithumo yangu, mndani ka mune wa magumi a malembe.

¹⁰Ngu toneto, ni nga henyela livelekolo, ni txi khani: ‘Yotshe mbimo, timbilu tawe ta hambuka, vona kha va ti zivi tinzila tangu.’

¹¹Ngu toneto, ni xambanyile kuhenyani kwangu ni txi khani: ‘Kha va na mbi wulela kuhumulani kwangu.’ ”

¹²Wonani, vanathu, ti to ku si thuki ku txi va ni wammweyo hagari kwanu, wa mbilu yo biha, ni ya ku ambi kholwa, yi txi mi hambanisa ni Txizimu txi txi hanyako.

¹³Ngu toneto, layanani masiku otshe, na ku di ngadi ku txi wombwa ku “Nyamsi” amu ka mibhalo, ati ti wombako athu kasiku ku si vi ni wammweyo hagari kwanu wo ti bangisa, ngu kukanganyiswa ngu txionho.

¹⁴Nguko, hi vamwevo ni Kristu, ngako hi txi vekisa ngu kutsana kala magwito kuthemba kwathu, aku hi nga va nako kukhatani,

¹⁵ ngako ku txi wombwa ku; “nyamsi, ngako mi txi engisa dipswi da Txizimu, mi nga bangiseni timbilu tanu, kufana ni ti ti nga maheka kudukwani.”

¹⁶Mba mani va va nga engisa dipswi da Txizimu se ve txi duka kani? Hi nga vona va va nga huma Egipta, va txi thangelwa ngu Mosi, kani?

¹⁷Mba mani va Txizimu txi nga va henyela mndani ka mune wa magumi a malembe, kani? Ina hi nga vava va nga onha, avava sirumbi sawe si nga sala txiwulani kani?

¹⁸Mba mani kambe ava Txizimu txi nga va xambanyela ti to kha va na mbi wulela kuhumulani ka txona, i si nga va va kukanyisa kani?

¹⁹Se ngu toneto, ha ti wona ti to va tandekile kuwulela ngu mhaka ya ku ambi kholwa kwawe.