Read chopi Vahebheru 4 Bible Online

Vahebheru 4 - chopi bible

Vahebheru 4

¹Ngu toneto, ngako txithembiso txa kuwulela kuhumulani ka Txizimu txi di ngadi tsani, ahi ti woneleni ti to mmwani hagari kwanu asi maneki a di sate msana.

²Nguko, nanathu, hi engisile Evhangeli nga vona; aniko, dipswi di va ngadi engisa kha da va vhuna txilo, nguko kha va namarela ngu likholo avale va ngadi engisa.

³ Aniko, athu hi kholwako hi na wulela kuhumulani, ngako Txizimu txi nga womba txi txi kha txona: “Ni xambanyile kuhenyani kwangu ni txi khani: ‘Kha va na mbi wulela kuhumulani kwangu!’ ” Txizimu txi wombisile toneto, hambiko mithumo ya txona yi nga ti hetisekile kukhukhela kutumbunukani ka mafu.

⁴Nguko, ka wumwani wukhalo ti bhatwe ta ditshiku da wutxhanu ni mambidi taku: “Txizimu txi humute ngu ditshiku da wutxhanu ni mambidi, ka yotshe mithumo yi txi nga yi maha.”

⁵ Mhakeyo ya wombwa kambe: “Kha va na mbi wulela kuhumulani kwangu.”

⁶Ngu konaho ku sate ku vamwani va txi wulela kuhumulanimo, nguko avale va nga thanga vona ve amukela mahungu amanene kha va wulela ngu mhaka ya kukanyisa kwawe.

⁷Txizimu txa engeta txi veka dimwani ditshiku da “Nyamsi,” ngako txi txi womba-womba kale ngu txisofu txa Dhavhidha, nga ti hi nga wombisa tona msana: “Nyamsi, ngako mi txi engisa dipswi da Txizimu, mi nga bangiseni timbilu tanu.”

⁸Ngu toneto, idiku Joxuwa a ti va ningile kuhumula koneko nga Txizimu txi sa engeta txi txi womba-womba ngu dimwani ditshiku msana keto.

⁹Hambi keto, kuhumula ku ngadi ho ku, ku nga siyelwa vathu va Txizimu.

¹⁰ Nguko, awu a nga wulela kuhumulani ka Txizimu, nene wa humula mithumoni kwakwe, kufana ni Txizimu txi humulako mithumoni ka txona.

¹¹Ngu toneto, he khutaleleni kuya wulela kona kuhumulaniyo, kasiku ni wammweyo asi wi, ngu mhaka ya kukanyisa ko fana ni kwawe.

¹²Dipswi da Txizimu da hanya, di ni mtamo. Da hinda kupinda ditxhari do lotwa ka otshe madhawa, dona da milela mndani, kala kuya abanisa mmidi ni moya, kala kuya thola matshanganoni ka marambu ni mndani ka wuluvi, di ya tumbula mialakanyo ni makungo a mbilu.

¹³Kha txi nga ho txiwumbwa ni txa tximwetxo txi sikotako kusisala masoni ka Txizimu, nguko, sotshe si tulekile si txi maneka si di ha kubasani masoni ka wule hi fanelako kuya thethiswa ngu ngene.

¹⁴Aku athu hi ku ni mphaxeli wa hombe, awu a nga dhawula makenekene a txi ya huma nzumani, Jesu Kristu, Mwanana wa Txizimu, hi fanete kuva ni likholo la kutsana.

¹⁵Nguko, Mphaxeli wathu wa Hombe, hi ku nayo, hi nga ene wo sindwa ku hi pfela wusiwana ka sionho sathu, nguko nene a dukilwe ka totshe tinzila, kufana ni nathu, kambe kha maha txionho.

¹⁶Ngu kota yeto, ahi yeni ngu kutsaka txiluveloni ka makatekwa, ahawa hi no ya mana wumbilu ni kateko yi yi no hi vhuna ngu mbimo yi yi fanelako.