Read chopi Vahebheru 6 Bible Online

Vahebheru 6 - chopi bible

Vahebheru 6

¹Ngu toneto, ahi lekeni tigondo ta makhato a dipswi da Kristu, hi ya masoni ka tigondo to hetiseka, hi si tshumeli hi gondela timhaka ta makhato: Ta kutisola ka mithumo ya kufa ni ta likholo ka Txizimu,

²ni tigondo ta kubhabhatisa, ni ta kusanzeka ka manza, ni ta kuwuka ka vafi, ni ta kuabaniswa ko gwita.

³Ngu ti hi fanelako ku ti thuma ngako Txizimu txi txi hi tumelela.

⁴Ngu toneto, kha ti koteki ka vathu va va nga amukela liwoningo, ava va nga danza txiningo, ava va nga mana txyavelo txa Moya wo Sawuleka,

⁵ava va nga danza kutshamba ka dipswi da Txizimu, ni mitamo ya timbimo ti titako,

⁶se ve wa, ti to ve tshumela ve hinduka da wumbidi, nguko vona va tshumete ve bethela ha txihambanoni Mwanana wa Txizimu, ve mmaha txiruko.

⁷Nguko, mafu awa ma selako mati a nzumani ayawa ma wako ngu mtalo, aya ma milisako similwa sa sinene, asi si vhunako va va ti dimelako, mafuyo ma mana kukatekiswa ngu Txizimu.

⁸Aniko, mafu awa ma humisako mipa ni tikwakwati ma na rukwa, me gwita ngu kuhiswa.

⁹Kambe i di athu, vo randeka ngutu, hambi hi txi wombisa eto, ha themba ngu kutsana ti to mi ka didhawa da dinene, adi da kuhanyiswa.

¹⁰Nguko, Txizimu kha txi nga ni tshofu. Kha txi na kudivala mthumo wanu, ni lirando li mi nga li kombisa ka ditina da txona anu mi nga thumela vasawuleki va txona, avava ni konkuwa, mi va thumelako.

¹¹Kambe athu hi navela ti to mmweyo ni mmweyo kwanu e kombisa kukhutala konako kala magwito, kasiku txithembo txanu txi hetiseka.

¹²Athu kha hi lavi ku mi txi hinduka mi maha mikara, aniko, londetelani avale va amukelako thomba ya sithembiso ngu likholo ni kutimisela.

¹³Nguko Txizimu, ditshiku di txi nga maha txithembiso ka Abrahamu, ngako ku nga ti si nga ho mmwani wa hombe kupala txona, awu txi nga ti fanela kuxambanya ngu ngene txi xambanyile ngu ditina da txona txipune,

¹⁴ txi txi kha txona: “Kha ditshuri, ni na kukatekisa ngu sikatekiso so tala, ni na kuandisa ngu mtengo wawungi.”

¹⁵Se Abrahamu, ngu kutimisela kwakwe, a to mana si a nga thembiswa sona.

¹⁶Vathu va xambanya ngu ditina da wu i ku wa hombe kwawe, kotshe kukanetana kuguma ngu kuxambanya ko tsana.

¹⁷Se, ngu kulava kukombisa ta tinene ka vadyi va thomba, ti to txithembiso txa Txizimu kha txi na mbi tshumelela msana, txona Txizimu txi to tsanisa txithembiso ngu kuxambanya.

¹⁸Ku ni simaha simbidi so tsana. Ka sona si sa simbidi, kha ti koteki ti to Txizimu txi hi kanganyisa. Ngu toneto, athu hi txi thembako, hi fanete kunamarela ngu kutsana ka txithembiso txi txi nga vekwa masoni kwathu.

¹⁹Txithembiso txiya, kwathu, txi fanana ni hangi ya moya, ayi i ku ya kutsana ni kuthembeka, ayi yi dolako nguwo ya txitshingelelo ya dithepele yi txi wulela mndani ka txiluvelo txa Txizimu.

²⁰ Ahawa a nga wulela kona Jesu ngu mhaka yathu, kota mthangeli, e mahwa Mphaxeli wa Hombe, madingano ni mlayo wa Melkisedheki.