Read chopi Vahebheru 7 Bible Online

Vahebheru 7 - chopi bible

Vahebheru 7

¹ Melkisedheki wuwa, mfumeli wa Salema, mphaxeli wa Txizimu Nyatxitimwi, a to hingeta Abrahamu, awu a nga ti wuya ngu kuxulani ka vafumeli; se e mkatekisa.

²Ngene wuwa Abrahamu a nga ya mninga wugumi wa sotshe. Kambe ditina dakwe, kukhata, di womba ku “mfumeli wa kululama.” Ka wumbidi, mfumeli wa Salema ti womba ku “mfumeli wa kudikha.”

³Ene kha nga ni tate, hambi mame, hambi lihunzu, kha nga ni makhato a masiku akwe, hambi magwito a kuhanya kwakwe, aniko a fana ni Mwanana wa Txizimu, i mphaxeli kala kupinduka.

⁴Hi ngani wona wuhombe wa m'thu wuwa, awu hambi Abrahamu, i ku kokwani wathu wa hombe, a nga mninga wugumi wa sile sa sinene, asi a nga si mana yimbini:

⁵Se vanana va Levhi, ava va nga ningwa mthumo wa wuphaxeli, va tumelelwa ngu mlayo kuamukela wugumi wa si si humiswako ngu vathu va i ku vanawe, kasi ni vona mba lixaka la Abrahamu.

⁶Aniko, Melkisedheki, hambiko i ku si nga wa lixaka la Levhi, a amukete sa wugumi ka Abrahamu e tshumela e mkatekisa, ene a nga ti ni sithembiso.

⁷Ku walo kukanakana ka ti to m'dotho a katekiswa ngu wa hombe.

⁸Txitimwi keto, ava va amukelako sa wugumi ahawa, mbathu va va fako, kasi i di haleya, kuwombwa ngu m'thu wu a ku ni wutomi.

⁹Se hi nga womba ti to nene Levhi awu vanana vakwe va amukelako sa wugumi, asi humisile nene sa wugumi ngu ka Abrahamu.

¹⁰Nguko, Levhi a ti ngadi ka titsho ta kokwani wakwe Abrahamu, mbimo yi ene a nga tshangana ni Melkisedheki.

¹¹Ngu toneto, idiku wuphaxeli wa Levhi i ti wo hetiseka, ngako vathu va nga amukela mlayo hahatshi ka wona wuphaxeli wonewo, ti mahisa kutxani kulaveka wumwani wuphaxeli madingano ni wa mlayo wa Melkisedheki, i si nga madingano ni mlayo wa Aroni, kani?

¹²Nguko, wu txi txitxwa wuphaxeli, mlayo ni wona wu fanete kutxitxwa.

¹³Nguko awule mapswi ma wombako ngu mhaka yakwe, a lumba lixaka la limbe, ali ni wammweyo ka lona asi khaliko kuthumela ha magandeloni.

¹⁴Nguko, ti ha kubasani ti to Mkoma wathu a humete ka lixaka la Judha, ali Mosi asi wombiko txilo ngu lona ka timhaka ta wuphaxeli.

¹⁵Kambe ti ha kubasani ngutu, ngako ku txi huma mphaxeli mmwani wo fana ni Melkisedheki,

¹⁶awu a nga mbi vekwa ngu mlayo wa mtumbuluko, aniko a vekwa ngu mtamo wa wutomi wakwe wo mbi guma.

¹⁷ Nguko, Mibhalo yo Sawuleka yi mahile wufakazi wa tito: “Awe u mphaxeli kala kupinduka madingano ni mlayo wa Melkisedheki.”

¹⁸Ngu toneto, mlayo wa kale wu fuvisilwe, ngu ku wu nga ti sina mtamo, wu nga ti si vhuni txilo.

¹⁹(Kha ditshuri, Mlayo wa Mosi kha wa maha txilo txo hetiseka), se ku txi wulela txithembo txa txinene atxi txi hi ningako kutshuketela hafuhi ka Txizimu.

²⁰Se, atiya kha ta mahwa hahanze ka txixambanyo; nguko, ava va nga mahwa vaphaxeli kale va ningilwe mthumowo, ku si nga ni txixambanyo.

²¹ Aniko, Jesu a mahilwe Mphaxeli ngu kuxambanya ka wule a nga khene: “Mkoma a xambanyile, kambe kha na mbi txitxa makungo akwe: Awe u Mphaxeli kala kupinduka.”

²²Ngu toneto, Jesu i mtsanisi wa txitumelelano txa txinene ngutu.

²³Vaphaxeli va Txitumelelano txa Kale va ve vavangi, nguko va si sikoti kuhanya kala kupinduka, ngu kukomiswa masiku ngu lifo.

²⁴Aniko Jesu, ngako wutomi wakwe wu si gumiko, wuphaxeli wakwe ni wona kha wu nga ni magwito.

²⁵Ngu kota yeto, ene wa sikota kuhanyisa, ka mbimo yihi ni yihi, votshe vale va tshuketelako ngu ngene ka Txizimu, nguko ene wa hanya yotshe mbimo kufela ku va kombelela.

²⁶Kha ditshuri, ngene mphaxeli wa hombe wu a hi fanelako: Wa kusawuleka, a si nga ni mnandu, wa kubasa mbilu, wa kuhambana ni vaonhi, wa kuguletwa txitimwi ka tinzuma.

²⁷Kwakwe kha kulaveki ti to ditshiku ni ditshiku a txi wuyelela kuphaxa mhamba ya sionho sakwe kukhata, ngu msana a txi tshumela e phaxa yimwani mhamba ya sionho sa vathu, nga ti va mahako vamwani vaphaxeli vahombe. Ene a to phaxa mhamba yimweyo dwe ya kuenela, ngu hawa a nga ti ningela ene apune.

²⁸Kha ditshuri, mlayo wu vekile vaphaxeli va i nga ti vathu va dikhodo. Aniko, dipswi da txixambanyo di nga humelela msana ka Mlayo wa Mosi, di vekile Mwanana wu i ku Mphaxeli wa kuhetiseka ngu ha ku si gwitiko.