Read chopi Vahebheru 9 Bible Online

Vahebheru 9 - chopi bible

Vahebheru 9

¹Kha ditshuri, txitumelelano txile txo khata txi ti ni mlayo wa maphaxelo a timhamba, ni dithepele da kuakwa muwa mafuni.

² Nguko, ku akilwe ditenda: Ditenda do khata di dhanwako ku wukhalo wo sawuleka, amuwa ku nga ti vekilwe dilambu, ni meza ni mapawu a miphaxo.

³Ngu msana ka m'jiyo wa wumbidi, ku ti ni dimwani ditenda, di nga ti dhanwa ku Wukhalo wo Sawuleka ngutu.

⁴Amuwa ku nga ti ni digandelo do mahwa ngu nzalama, do hisela kona dibaselo, ni dibhokiso da txitumelelano, wa kukopolwa wotshe ngu nzalama, mtundu wu wu ti ni txikadyana txa nzalama, txi nga ti ni manna, ni ndonga ya Aroni, yi yi nga ti mite mazokoro, ni sileti sa simbidi sa txitumelelano.

⁵ Ngu txitimwi ka mtundu ku ti ni sivangwa so hanya si dhanwako ku makerubhima, asi si nga ti kombisa wudhumo wa Txizimu, si txi fenengeta txikhalo txa wumbilu ngu mtsudi wa sona. Aniko, kha hi nga ni mbimo ya kuxawutela sotshe tximwetxo ngu tximwetxo.

⁶Ngako si di lulamisilwe sotshe, vaphaxeli va ti wulela ka ditenda do khata ka mbimo yihi ni yihi, va txi thuma mthumo wawe wa wuphaxeli.

⁷Aniko, ka ditenda da wumbidi ku ti wulela mphaxeli wa hombe ekha, kumweko ngu dilembe, aniko atiya, a ti si ti mahi a sa thanga ngu kumaha mningelo wa mnoha wa kuhiselwa sionho sakwe ni sa vathu.

⁸Moya wo Sawuleka wu lavile kukombisa, ka toneto, ti to nzileyo ya wukhalo wo sawuleka kha yi nzi kutuleka, ngako ditenda do khata di di ngadi emile.

⁹Totshe tiya njikombiso txa tile ti mahwako ka masiku a nyamsi: Vathu va mahako miningelo ni timhamba, asi si sikotiko kubasisa mbilu ya wule a phaxako.

¹⁰Nguko, va phaxa ngu sakudya ni sakusela ni ku ti sambisa ka tinzila to tala dwe. Asiya nziheno sa vathu si nga thuma kala ditshiku da kuhindulwa ka sotshe.

¹¹Aniko Kristu, i ku Mphaxeli Wahombe wa silo sa sinene si si tako, a humelete ka ditenda da hombe da kuhetiseka, adiya di nga mbi mahwa ngu manza a m'thu, adiya i ku si nga da mtumbuluko wa ditikoni muwa.

¹²Ene a wulete kumweko dwe ka wukhalo wo Sawuleka ngutu. Ene kha phaxa ngu mnoha wa tiphongo mwendo wa tihomu, aniko a phaxile ngu mnoha wakwe wupune, a txi hi ninga kuhanya ko mbi guma.

¹³Se ti di ngeto, kota nga ti mnoha wa tiphongo ni wa tihomu, ni dikhuma da marole va nga ti ti xwayelwa ngu wona vaonhi, se ve mana kubasiswa mmidi,

¹⁴ngutu-ngutu mnoha wa Kristu, awu a nga ti ningela apune, na a si nga ni txionho, ngu Moya wo Sawuleka, ka Txizimu txi txi hanyako, ngu wona wu ku ni mtamo wa kubasisa timbilu tathu ka mithumo ya lifo, ti to hi sikota kuthumela Txizimu txa kuhanya.

¹⁵Ngu toneto, Ene i muemeli wa txitumelelano txa txiphya. Kufa kwakwe ku mahekile, kasi ku sionho si txi basiswa si si nga nga mahwa ka mbimo ya txitumelelano txo khata; se avale va nga dhanwa, va amukela thomba yo mbi guma, ayi va nga thembiswa.

¹⁶Ngu toneto, ahawa ku ku ni dipapilo da thomba, ta laveka kuziva ta tinene ti to m'bhali wa dona a fite.

¹⁷Nguko, dipapilo da thomba kha di vhuni txilo, ngako m'bhali wa dona a di ngadi a txi hanya.

¹⁸Se, hambi txitumelelano txo khata txi ti si thumi kusanzi kutheketwa mnoha.

¹⁹Kha ditshuri, Mosi msana ka kuva a di huwelete ka vathu sotshe sirumo sa mlayo, a to teka mnoha wa marole ni wa tiphongo kumweko ni mati ni matoya o bhilivila ni mazokoro a hisopo e xwayela ngu wona dibhuku ni vathu,

²⁰a txi khene: “Awuwa i mnoha wa txitumelelano txi, Txizimu txi nga maha ni nanu.”

²¹Msana, a to xwayela ditenda ni sotshe siya si si thumiswako magandeloni.

²²Madingano ni kuruma ka mlayo, sotshe simaha si fanete kubasiswa ngu mnoha; se hahanze ka mnoha, kuwalo divalelo ya sionho.

²³Ngu toneto, ngako sifananiso sa simaha sa nzumani si basiswako ngu miphaxo yo nga toneto, ta laveka ti to sona simaha siya sa nzumani si basiswa ngu miphaxo yo pinda yile.

²⁴Se, Kristu kha wulela ka wukhalo wo sawuleka wo mahwa ngu manza a m'thu, txifananiso txa wukhalo wo sawuleka wa ditshuri. Aniko a wulete nzumani kupune, kasi ku a txi ya hi emela konkuwa masoni ka Txizimu.

²⁵Ene kha wulelela ku ti ningela sikhati so tala, nga ti a mahisako tona mphaxeli wa hombe dilembe ni dilembe, a wulelako txiluveloni ko basa, a txi tisa mnoha wo va i si nga wakwe.

²⁶Idiku a to mahisa toneto Kristu a ndi na fanekela kuxaniseka sikhati sasingi kukhukhela makhatoni ka kuvangwa ditiko; aniko a humelete kumweko dwe, kuhetisekani ka timbimo, a ta fuvisa txionho ngu mhamba ya mmidi wakwe wupune.

²⁷Se ngako vathu va nga sikelwa ti to ve fa kumweko dwe, ngu msana ku txi londeta kulamulwa;

²⁸ngu toneto, Kristu a ti ningete kumweko basi, kufela kufuvisa sionho sa vathu vavangi. A na woneka da wumbidi, i si nga ngu mhaka ya txionho, aniko ngu mhaka ya ku ta hanyisa avale va m'verelako.