Read chopi Jakobe 1 Bible Online

Jakobe 1 - chopi bible

Jakobe 1

¹ Ani Jakobe, txithumi txa Txizimu ni txa Mkoma Jesu Kristu, ka tihunzu ta digumi ni timbidi ti nga hangalaka ni otshe matiko, ni mi navelela wutomi.

²Vanathu, yi woneni i di mhaka ya kutsakisa ngutu, amukelani ngu mbilu yo tsaka sotshe siduko si mi si manako,

³ngu kuziva ti to txiduko txa likholo lanu, txi ninga kuhonisela.

⁴Aniko, ta laveka ti to kuhonisela ku txi veka mthumo wo hetiseka, kasi ku mi txi maneka mi di vathu vo hetiseka, vo lulama, mi si nga ni txisolo ni txa tximwetxo.

⁵Se ngako mmweyo wanu a txi pwata wutxhari a na wu kombele ka Txizimu, atxi txi ningako votshe vathu ngu wunene, na txi si feleli, a na ningwa.

⁶Aniko a na kombele ngu likholo, asi kanakani; nguko awule a kanakanako, a fana ni divimbi da linene, di rethwako ni kuvhiluswa ngu moya di tshotshwa khe ni khe.

⁷M'thu wo ngeto, a nga pimise ti to wa ningwa txihi ni txihi ngu Mkoma.

⁸Nguko, eyo i m'thu wa mipimiso yimbidi, wa kana-kana ka totshe tinzila takwe.

⁹Mwanathu wu a ku wusiwanani, a na tsake ngako a txi guletwa.

¹⁰Kambe nene nyatithombe a na tsake ngako a txi vekwa hahatshi; nguko ene a na pinda kufana ni txiluva txa mwasi.

¹¹Nguko, neti ditambo di txi huma ni kuhisa ka dona, di omisa mwasi, se siluva sa wona si txi mora, kutshura ka wona ka mwalala; ngu tona ti a gwitisako tona nyatithombe ni mabhindu akwe.

¹²A katekile m'thu wu a amukelako txiduko ngu kutimisela; nguko, a di gwitile kudukwa, a na amukela m'bhoti wa wutomi, awu Mkoma a nga wu thembisa ka vale va mrandako.

¹³Ni wammweyo a dukwako, a nga thuke a txi khene: “Txiduko txangu txi ta ngu ka Txizimu,” nguko Txizimu kha txi na kusikota kudukwa ngu wubihi, se kambe kha txi duki m'thu.

¹⁴Aniko, m'thu ni m'thu a dukwa ngu kunavela kwakwe ko biha, ku m'ndindako, ku txi mu yisa kubihani.

¹⁵Msana keto, kunavela ko biha, ka mana txirumbu, kuveleka txionho, se txionho txa vitwa txi veleka lifo.

¹⁶Vanathu vo randeka ngutu, mi nga ti kanganyiseni.

¹⁷Sotshe sihiwa sa lisima, sotshe siningo sa kuhetiseka, si ta ngu txitimwi, si txi txhika ngu ka Tate wa liwoningo, awu a ku si nga ni kutxitxa, awu kuwoninga kwakwe ku ku si nga ni kutxitxa ku txi maha txidema.

¹⁸Ngu kuranda kwakwe ene, a hi velekile ngu dipswi da ditshuri, kasi ku hi txi maha matiwula a siwumbwa sakwe.

¹⁹Ti ziveni tiya, vanathu vo randeka; m'thu wuhi ni wuhi a na kuluvete kuengisa, a txi swela kuwomba, a txi swela kuhenya.

²⁰Nguko, kuhenya ka m'thu kha ku mahi kululama ka Txizimu.

²¹Ngu konaho, thavisani yotshe nzambwa ni wubihi wu wu pindako, mi txi amukela ngu kudikha dipswi di di nga phaywa timbiluni kwanu, adi di nga sikotako ku mi hulukisa.

²²Aniko, mahani valondeteli va dipswi, mi nga ti maheni vaengisi va dona dwe, nguko eto mo ti kanganyisa mipune.

²³Kha ditshuri, ngako m'thu a txi lumbela kuengisa dipswi asi di mahi, a fana ni m'thu wu a wonako khohe yakwe ya mtumbuluko amu ka txibuko;

²⁴a ti wonile, e khukha e tsula, a txi kuluveta e divala ati a nga zumbisa tona.

²⁵Kasi awu a khutalako ngu kugonda mlayo wa kuhetiseka wa wuthuseki, e wu simamela, asi ti mahi muengisi wo divala, aniko a veketako ati wona wu rumako, eyo a katekile ka tile a ti mahako.

²⁶Ngako, m'thu a txi pimisa ti to dikholwa, kambe a si ñoli lidimi lakwe, a txi ti kanganyisa apune, a na ti zive ti to wukholwa wakwe, kha wu vhuni txilo.

²⁷Nguko, wukholwa wa ditshuri wo mbi na dikhwiti masoni ka Txizimu, Tate wathu, ngu kudingula va vo felwa ngu vaveleki, ni vale i ku tinoni, kuxanisekani kwakwe, ni ku ti vhikela kambe ka nzambwa ya ditiko.