Read chopi 1 Pedro 3 Bible Online

1 Pedro 3 - chopi bible

1 Pedro 3

¹ Nananu vavasikati vo tekwa, ti vekeni hahatshi ka vamna vanu, kasiku, ngako vamwani vavamna va si engisi dipswi, ve mana kudhanwa ngu mtamo wa mahanyelo a vasikati vawe, i si nga ngu dona dipswi,

²ngu mhaka ya kuwona wutomi wanu wa kutiñola ni wa txithavo.

³Kubomba kwanu ku nga ve ka hahanze dwe, kulukwa timbobo, ku ti tshurisela ngu siketiketi sa nzalama, ni syambalo so hanelwa ngu sona.

⁴Aniko, ku ti bombisa kwanu ku nave ka wuthu wa mndani ka moya, ka wuthu wo sisaleka wa mbilu, i ku kubasa ko mbi guma ka moya wo thutha ni wa kudikha, wu ku ni lisima masoni ka Txizimu.

⁵Ngu tona tiya va nga ti bombisisa tona vavasikati va vo sawuleka va kale, va va nga ti ni likholo ka Txizimu, vona va ti ti engisa vamna vawe,

⁶ kufana ni Sara a nga tiengisa Abrahamu a txi m'dhana ku i nyame wakwe; se konaho, mi vanana vakwe, ngako mi txi maha wunene, mi si thavi kudhukiselwa ngu txilo.

⁷ Kufana ni toneto, na nanu vavamna, hanyani ngu kuengisana ni vasikati vanu, mi txi zumba navo ngu txithavo, nga siya sa kwa mbi tsana, mi txi va xonipha kambe, ngukuva i di vadyi kuloni va thomba ya kateko, yi yi ningako wutomi, kasi ku mikombelo yanu yi si tsivelwi ngu txilo.

⁸Ngu kugwitisa, engisanani motshenu; mi randa vananu ngu moya wa wumbilu, ni kutiveka hahatshi.

⁹Mi nga tshumeteleni wubihi ngu wubihi, hambi txiruko ngu txiruko, aniko, kukatekisa nguko ngu toneto mi nga dhanelwa tona, kasi ku mi txi maha vadyi va thomba ya kateko.

¹⁰Nguko, awule a randako wutomi ni kuwona masiku a kukateka, a na vekele matomu lidimi lakwe, e li hambukisa ka to biha, ni txisofu txakwe a txi txi hambukisa ka mapswi o kanganyisa.

¹¹A na vayilele wubihi, e maha wunene: A na lave kuthutha, e kusimamela.

¹²Nguko, maso a Txizimu ma woneleta va vo lulama, ni tinzeve ta txona tiengisa mikombelo yawe; aniko, khohe ya Mkoma yi thuvikela ava va mahako to biha.

¹³I mani a no mi mahela wubihi, ngako anu mi txi khutalela ta tinene, kani?

¹⁴ Kambe ngako mi txi xaniswa ngu mhaka ya kululama, mi katekile. Mi nga thaveni kudhukisela kwawe, kambe mi nga karatekeni.

¹⁵Dhumisani Mkoma Kristu timbiluni kwanu; mi zumba kambe mi di longile nzila ya kutiangulela, ngu kuthutha ni txithavo, ka wuhi ni wuhi a no lava kuziva mhaka ya themba yanu.

¹⁶Mi fanete kumaha tiya ngu mbilu ya kululama, kasiku, hambi ka tile va wombako kubiha ngu nganu, ve thelwa tingana, avale va wombako kubiha ngu dihanyo danu ka Kristu.

¹⁷Ti ni lisima ngutu kuxaniseka ngu kumaha ti i ku ta tinene, na eto i di kuranda ka Txizimu, kupinda kuxaniseka ngu kumaha tile i ku to biha.

¹⁸Kha ditshuri, Kristu nene a fite ka kumweko ngu mhaka ya sionho sanu, ene i ku wo lulama, a txi fela vale vo mbi lulama, kasi ku mi yisa ka Txizimu. A fite ngu ka mmidi, aniko a hanyisilwe ngu ka moya.

¹⁹Wona moya wu a nga ya txhumayela ngu wona mihefemulo ya vale va nga ti kusekelwani;

²⁰ avale kale ka masiku a Nowa, va nga mbi va ni kuengisisa, mbimo yi Txizimu, ngu kuhonisela ka txona, txi nga verela kuakwa ka ngalava, ayi vathu vavadotho, (va mtxhanu ni vararu) va nga ti hanyisa ngu yona, txitimwi ka mati.

²¹Mati awa, i ti txidinganiso txa txibhabhatiso, atxi konkuwa, se txi mi hanyisako, i si nga ngu kukuwulwa ka nzambwa ya mmidi, aniko ngu kuxolwa ka livhalo ngu Txizimu, ni kuwuka ka Jesu Kristu,

²²wu a nga kwela nzumani, eya zumba txineneni ka Txizimu, ahawa a nga ningwa kufuma tingelozi, vathangeli ni mitamo.