Read chopi 2 Pedro 1 Bible Online

2 Pedro 1 - chopi bible

2 Pedro 1

¹Ani Simoni Pedro, txithumi ni mpostoli wa Jesu Kristu, ni bhalela vale va nga amukela likholo la lisima kufana ni lathu, ngu kululama ka Txizimu, ni Muhanyisi wathu Jesu Kristu.

²Makatekwa ni kudikha si nave ni nanu ngu kutala ka sona, ngu konaho ka wuzivi wa Txizimu, ni Jesu, Mkoma wathu.

³Mtamo wa wuzimu wakwe wu hi ningile sotshe si si lavekako ka wutomi ni wukhongeli ngu ku hi ninga kateko ya kuziva awule a nga hi dhana, ngu kupfaliswa kwakwe ni mtamo wakwe;

⁴ngu mhaka ya sona, hi mani txyavelo mndani ka sithembiso sa hombe ni sa lisima ngutu, kasi ku nanu mi txi mana txyavelo txa wuzimu, mi txi huluka ka lifo li li nga vangwa ha ditikoni ngu minavelo yo biha.

⁵Ngu mhaka ya totshe tiya, khutalani nga ti mi ti kotisako tona, mi txi tsanisa wunene ngu wuzivi;

⁶mi txi tsanisa wuzivi ngu kutipimela, mi txi tsanisa kutipimela, ngu kuhonisela, mi txi tsanisa kuhonisela ngu wukhongeli,

⁷mi txi tsanisa wukhongeli ngu kudhundana ka wuxaka, mi txi tsanisa kudhundana ka wuxaka ngu lirando.

⁸Nguko, yotshe mitamo yiya, yi txi maneka kwanu ngu kutala ka yona, kha yi na mbi mi leka mi di mikara mwendo sifule amu ka kuziva Jesu Kristu Mkoma wathu.

⁹Nguko, awu a ku si nga naso siya sotshe, ndibhofu, kha woni kule, kambe a divate ti to a basisilwe ka sionho sakwe sa kale.

¹⁰Ngu toneto, va ka kwathu, khutalani mi txi ya masoni, kasi ku mi txi sikota kutsanisa kudhanwa kwanu ni kusawulwa kwanu. Nguko, mi txi mahisa eto, kha mi na mbi thuka mi txi khuvekiswa.

¹¹Ngu yoneyo nzila, mi na tulelwa diphango da wukoma wo mbi guma wa Mkoma wathu ni Muhanysi wathu Jesu Kristu.

¹²Ngu konaho, otshe masiku ni navela kuzumba ni txi mi alakanyisa timhaka tiya, hambiko mi ti zivako, ni kuwa mi nga tsaniswa ka dona ditshuri diya mi ku nado.

¹³I fanelo yangu, ni di ngadi ni txi hanya ka ditenda diya da ha mafuni ku mi wusa, kasi ku mi zumba mi txi wonelela.

¹⁴Nguko kunukunukuwa ni na huma ka ditenda diya, madingano ni txiziviso txiya ni nga mahelwa ngu Mkoma wathu Jesu Kristu.

¹⁵Hambi keto, ni na ti karata kasiku hambi ni txi fa, mi na sala mi txi ti alakanya totshe tiya.

¹⁶Nguko, ku mi gondisa kwathu timhaka ta mtamo ni kuta ka Mkoma wathu Jesu Kristu, kha ta khukhela ka mabhulo o sikwa ngu wutxhari wa m'thu, aniko hi mi gondisile ngu ku hi nga wona wuhombe wakwe ngu maso athu mapune.

¹⁷ Nguko, ene a amukete manzani ka Txizimu Tate, wudhumo ni kupfaliswa, mbimo yi di nga ta dipswi ngu kuphatimani ko xamalisa di txi ta kha dona: “Awuwa i Mwanana wangu wo randeka ngutu, awu ni tsakiswako ngutu ngu ngene.”

¹⁸Athu hipune hi di engisile dipswi diya di txi ta ngu nzumani, mbimo yi hi nga ti kumweko nayo ha mmangoni ko sawuleka.

¹⁹Se kambe, hi ngadi ni dipswi do tsana ngutu da vaprofeti, adi mi mahako ta tinene ngu ku di engisa, nga liwoningo li phatimako ha wukhaloni ka txidema, kala mbimo yi ditambo di nota woninga ni nyezi yi yi nota humelela timbiluni kwanu.

²⁰Aniko, masoni ka totshe, zumbani mi txi tiziva ti to kuwalo dipswi da vaprofeti, adiya m'thu a sikotako ku di txhamusela ti txi khukhela ha msungo kwakwe.

²¹Nguko, kuwalo dipswi ni da dimwedo da wuprofeti adi di nga wombwa ngu kuranda ka m'thu. Aniko vathu vo sawuleka va va nga susumetwa ngu Moya wo sawuleka, ngu vona va va nga womba-womba ngu ditina da Txizimu.