Read chopi 1 Johani 2 Bible Online

1 Johani 2 - chopi bible

1 Johani 2

¹Sivananananu sangu, ni mi bhalela timhaka tiya kasi ku mi si onhi; se ngako mmweyo wanu a txi onha, hi na ni Mthaveleli masoni ka Tata, Ene Jesu Kristu, M'lulami.

²Ene ngene i ku mhamba ya kudihela sionho sathu, kambe hi nga sionho sathu kugwita, aniko ni sa dotshe ditiko.

³Hi komba ti to ha m'ziva Tate, ngako hi txi veketa milayo yakwe.

⁴Awu a wombako ti to “ani na m'ziva,” na asi veketi milayo yakwe, a womba makuhu, kambe kha nga na ditshuri.

⁵Aniko ni wuhi a veketako dipswi dakwe, kha ditshuri lirando la Txizimu li hetisekile kwakwe; ngu tona tiya ni ti zivisako tona ti to hi ka Txizimu.

⁶Awule a wombako ti to a ka Txizimu, a fanete kutsimbila ti Jesu a nga tsimbilisa tona.

⁷ Vorandeka ngutu, hi nga txirumo txa txiphya ni mi bhalelako, aniko njirumo txa kale, ni nga txi amukela kukhukhela makhatoni: Txirumo txa kale ngu dipswi diya mi ngadi engisa.

⁸Kambe njirumo txa txiphya ni mi bhalelako txona, atxiya kwakwe Kristu ni kwanu i ku txa ditshuri, nguko txidema txa pinda, se liwoningo la ditshuri la woninga.

⁹Awule a wombako ti to a liwoningoni, na a txi vengela mwanawe, a ngadi txidemani ni kona kuwa.

¹⁰Awu a randako mwanawe a zumba liwoningoni, se kwakwe kha ku nga ni txikhuvekiso.

¹¹Kambe awu a vengelako mwanawe, a txidemani, a tsimbila txidemani, kha zivi mu ayako kona, nguko txidema txi fayile maso akwe.

¹²Ni bhalela anu, sivananananu nguko, sionho sanu si divaletwe ngu ditina da Kristu.

¹³Ni bhalela anu vatate nguko ma m'ziva awule i ku ene kukhukhela makhatoni. Ni bhalela anu vavaphya, nguko mi xute m'bihi. Ni mi bhalete anu, vanavangu nguko ma m'ziva Tate.

¹⁴Ni mi bhalete anu vatata, nguko ma m'ziva awule i ku ene kukhukhela makhatoni. Ni mi bhalete anu, vavaphya, nguko mi na ni mtamo, ni Dipswi da Txizimu di kwanu, kambe mi xute m'bihi.

¹⁵Mi nga randeni ditiko, hambi ni si si ku ha mafuni. Awu a randako mafu, lirando lo randa Tate kha li nga ho kwakwe.

¹⁶Nguko sotshe si si kuho ha ditikoni, kunavela ka mmidi, kunavela ka maso ni kutikulisa ngu tithomba, hi nga si si tsakelwako ngu Tate, aniko si tsakelwa ngu vathu va ha ditikoni.

¹⁷Kasi ditiko da pinda ni kunavela ka dona, kambe awu a mahako kuranda ka Txizimu, a zumba ngu ha ku si gumiko.

¹⁸Sivananananu sangu, txi hokile txikhati txo gwitisa; mi ti engisile ti to wata Mkaneti wa Kristu, na kasi vaho vavangi va ti maha vakaneti va Kristu; ngu konaho hi ti zivako ti to txi hokile txikhati txo gwitisa.

¹⁹Vona va humete hagari kwathu, aniko i ti si nga va ka kwathu. Idiku i ti va ka kwathu, nga va di zumbile ni nathu; aniko va humile, kasi ku ti txi woneka ti to hi nga votshe i nga ti va ka kwathu.

²⁰Se anu mi totilwe ngu kusawuleka, ma tiziva totshe.

²¹Kha na mi bhalela ngukuva mi si zivi ditshuri, aniko ni mi bhalete ngu kuwa mi di zivako, nguko kuwalo makuhu awa ma humako ngu ka ditshuri.

²²I mani i ku wa makuhu, i si nga wule a kanetako ti to Jesu i Mesiya, kani? M'thu wo ngeto, ngeneyo Mkaneti wa Kristu, a lambako Tate ni Mwanana.

²³Wuhi ni wuhi a lambako Mwanana, Tate kha nga ni nene; se awu a fakazelako Mwanana, ni Tate waho kwakwe.

²⁴Aniko, anu khutalani, kasi ku ti txi zumba kwanu ati mi nga tiengisa, kukhukhela makhatoni. Ngako ti txi zumba kwanu ati mi nga tiengisa kukhukhela makhatoni, nanu mi na zumba ka Mwanana ni ka Tate.

²⁵Txithembiso txi a nga hi mahela ngu txiya: Wutomi wo mbi guma.

²⁶Ni mi bhalela timhaka tiya ngu mhaka ya vale va lavako ku mi timeta.

²⁷Se anu, kutotwa ku mi nga kuamukela kwakwe, wu zumbile kwanu, se kha mi ngadi mi txi fanela kugondiswa ngu m'thu; nguko kutotwa ka ditshuri, kha ku wombi makuhu, ngu konaho, zumbani kwakwe Kristu, nga ti ku nga mi gondisa tona.

²⁸Se kona kuwa anu sivanananana, zumbani kwakwe Kristu, kasi ku mbimo yi a no ti wonekisa, hi nava ni kuthemba ka hombe, hi si vi ni tingana, kuwuyani kwakwe.

²⁹Ngako mi ti zivako ti to ene a lulamile, ti ziveni ti to wuhi ni wuhi a mahako to lulama, a velekilwe ngu ngene.