Read chopi 1 Johani 3 Bible Online

1 Johani 3 - chopi bible

1 Johani 3

¹Wonani lirando la kuxamalisa la Tata; a nga hi ninga mathomo a ku hi maha vanana va Txizimu! Hi vanana va txona ngu ditshuri. Ngu toneto, ditiko kha di hi zivi; nguko ni Txizimu kha da txi ziva.

²Vorandeka, konkuwa hi vanana va Txizimu, kambe kha zivaneki ati hi no va hi di txona. Ha tiziva ti to mbimo yi a nota Kristu, hi nata fana nayo, nguko hi nata muwona ngu wutumbu wakwe.

³Wuhi ni wuhi a ku ni txithembo txiya ni nene, wa ti sawulekisa apune, nga ti nene Jesu i ku wo sawuleka.

⁴Wuhi ni wuhi a mahako txionho, a ndaka mlayo, nguko txionho ngu kundaka mlayo.

⁵ Aniko anu ma tiziva ti to ene a ti wonekisile kasi ku ta thavisa sionho; kambe kwakwe kuwalo txionho.

⁶Votshe va va zumbako kwakwe kha va onhi. Votshe va va onhako kha va mu wona, kambe kha va m'ziva.

⁷Sivananananu, m'thu a nga thuke e mi timeta. Awu a mahako to lulama, a lulamile kufana ni nene Jesu a nga lulama.

⁸Awule a mahako txionho mbwa Sathani nguko Sathani, njionhi kukhukhela makhatoni. Mwanana wa Txizimu a ti wonekisile, kasi ku ta fuvisa mithumo ya Sathani.

⁹Votshe va va nga velekwa ngu Txizimu, kha va mahi txionho, nguko mbewu ya Txizimu yi mite kwawe. Vona kha va na kuonha, nguko va velekilwe ngu Txizimu.

¹⁰Txikombiso txa vanana va Txizimu, ni txa vanana va Sathani ngu txiya: Votshe vale va si mahiko to lulama ni vale va si randiko vanawe kha va lumbi Txizimu.

¹¹ Txiziviso txi hi nga txi engisa kukhukhela makhatoni ngu txiya: Ti to hi randana.

¹² Hi nga faneni ni Kayini; awuwa, ngukuva i di m'bihi, a date mnanda wakwe. Se a m'dayete txani kani? Mithumo yakwe i ti yo biha, kasi mithumo ya mnanda wakwe i ti yo lulama.

¹³Mi nga xamaleni, vanathu, ngako ditiko di txi mi vengela.

¹⁴ Athu ha tiziva ti to hi humile kufani hi txi ya wutomini, nguko ha randa vanathu. Awu asi randiko a ngadi zumbile kufani.

¹⁵Votshe va va vengelako vanawe mbadayi va vathu; se ma tiziva ti to kuwalo wu i ku m'dayi, awu wutomi wo mbi guma wu sikotako kuzumba kwakwe.

¹⁶Lirando hi li zivisa tiya: Jesu a ningete wutomi wakwe ngu mhaka yathu; se nathu hi fanete kuningela wutomi wathu ngu mhaka ya vanathu.

¹⁷Ngako m'thu a di ni tithomba ta ha mafuni hawa, a txi wona mwanawe a si nga naso, se asi mkhataleli, li nga zumbisa kutxani kwakwe lirando la Txizimu kani?

¹⁸Sivananananu sangu, hi nga randeni ngu txisofu ni lidimi, aniko he randaneni ngu mithumo ni ditshuri.

¹⁹Ngu kona hi no tiziva ti to hi vathu va ditshuri, se timbilu tathu ti na ka tsana Txizimu.

²⁰Ngako yona mbilu yathu yi txi hi mangala, Txizimu nja hombe kupinda timbilu tathu, kambe Txizimu txa ziva totshe.

²¹Vorandeka, ngako mbilu yi si hi mangali, hi na ni txithembo ka Txizimu;

²²se txihi ni txihi hi no kombela hi na ningwa ngu Txizimu; nguko ha veketa sirumo sa txona ni kumaha ati ti txi tsakisako.

²³ Txirumo txa Txizimu ngu txiya: Kukholwa ka ditina da Mwanana wa txona Jesu Kristu, ni kurandana nga ti a nga hi rumisa tona.

²⁴Awule a veketako sirumo sa Txizimu, a zumba ka Txizimu, se Txizimu ni txona txi zumba kwakwe. Ha tiziva ti to Txizimu txi zumba ni nathu; ngu Moya wu txi nga hi ninga.