Read chopi 1 Johani 4 Bible Online

1 Johani 4 - chopi bible

1 Johani 4

¹Vorandeka, mi nga kholweni ka yotshe mimoya, aniko, wonisisani mimoya kasi kuziva ti to mwendo nja Txizimu, nguko mbavangi vaprofeti va makuhu va nga hangalaka ni ditiko.

²Moya wa Txizimu mi na wu zivisa tiya: Wotshe moya wu wu fakazako ti to Jesu Kristu a tile ha mafuni ngu wutumbu wakwe, mbwa Txizimu.

³Se wotshe moya wu wu si fakazeliko Jesu, hi nga wa Txizimu; awuwa ngu wona moya wa mkaneti wa Kristu, mi ti engisile ti to wu nata, se konkuwa wa hoha ditikoni.

⁴Sivananananu, anu mi va Txizimu, se mi xute vaprofeti va makuhu. Nguko Moya wu wu ku kwanu mbwa hombe kupinda wule wu ku ka vathu va ha ditikoni.

⁵Vona mba ha ditikoni, ngu toneto va womba-womba ngu ta ha mafuni, se mafu ma va engisa.

⁶Athu hi va ka Txizimu, awu a zivako Txizimu wa hi engisa. Awu i si nga wa Txizimu kha hi engisi. Ngu toneto, hi wu zivisako tona Moya wa ditshuri, ni moya wa makuhu.

⁷Vorandeka, he randaneni, nguko lirando lita ngu ka Txizimu, votshe va vo randeka, va velekilwe ngu Txizimu, se va txi ziva Txizimu.

⁸Awu asi randiko, kha txi zivi Txizimu, nguko Txizimu, Lirando.

⁹Lirando la Txizimu li ti wonekisisile tiya kwathu: Txizimu txi rumete Mwanana wa txona wammweyo ekha ha mafuni, kasi ku athu hi hanya ngu ngene.

¹⁰Lirando la Txizimu ngu liya: Hi nga athu hi nga randa Txizimu, txona ngu txona txi nga hi randa, txi hi rumela Mwanana wa txona, ku ta maha mhamba ya kudihela sionho sathu.

¹¹Vorandeka, ngako Txizimu txi nga hi randisa tiya, nathu hi fanete kurandana.

¹² A walo wu a nga wona Txizimu ni ditshiku ni da dimwedo, aniko, ngako hi txi randana, Txizimu txi zumba ni nathu, se lirando la txona li hetisekile kwathu.

¹³Hi tiziva ti to athu hi zumba ka Txizimu, ni ti to txona txi zumba kwathu, ngu kuwa txi nga hi ninga Moya wa txona.

¹⁴Se athu hi ti woni, kambe ha fakaza ti to Tate a rumete Mwanana wakwe ku ta maha Muhanyisi wa ditiko.

¹⁵Awu a fakazako ti to Jesu Mwanana wa Txizimu, Txizimu txi zumba kwakwe, se nene a zumba ka Txizimu.

¹⁶Se athu hi li zivile ni ku li tumela lirando li Txizimu txi ku nalo ni nathu. Txizimu lirando; awu a zumbako lirandoni, a zumba ka Txizimu, se Txizimu txi zumba kwakwe.

¹⁷Ngako lirando li di hetisekile kwathu, hi nava ni kutsana ka ditshiku da kulamulwa, nguko atiya Kristu a ku ngu tona, nathu hi zumbisile toneto ha ditikoni.

¹⁸Ku walo kuthava amu ka lirando, nguko lirando la kuhetiseka li tovela kuthava. Kuthava kutsimbilelana ni kutsayiswa; se awu a thavako kha nga ni lirando lo hetiseka.

¹⁹Athu hi na ni lirando, nguko txi khatile Txizimu txi hi randa.

²⁰Ngako m'thu a txi khene: “Ani na randa Txizimu,” na a txi vengela mwanawe, mthuyo ana ni makuhu: Nguko awu asi randiko mwanawe, awu a mu wonako, kha na kusikota kuranda Txizimu txi asi txi woniko.

²¹Txirumo txi hi nga txi amukela kwakwe Jesu Kristu ngu txiya: Awu a randako Txizimu, a na rande ni mwanawe.