Read chopi Valamuli 10 Bible Online

Valamuli 10 - chopi bible

Valamuli 10

¹Se msana ka Abhimeleki, ku to humelela Tola, mwana Puwa, mwana Dhodha, wamwamna wa ka Isakari, kasiku a txi ta hulukisa va ka Israyeli; a ti ti akile Samira, mmangoni ka Efrayime.

²Se a to lamula va ka Israyeli, amu ka magumi mambidi a malembe ni mararu. Se a to fa eya tshotshwa Samira.

³Se msana kwakwe, ku to humelela Jayiri, Mugileyadhi, awule a nga maha mlamuli wa va ka Israyeli, amu ka magumi mambidi a malembe ni mambidi.

⁴Kambe a ti ti ni magumi mararu a vanana, avale va nga txi gadha timbongola ta magumi mararu; se va ti ti ni magumi mararu a madhoropa, aale ma dhanwako ku i Havhote-Jayiri, kala ka ditshiku da nyamsi; aale ma ku ditikoni ka Gileyadhi.

⁵Se Jayiri a to fa, a txi ya tshotshwa Kamoni.

⁶Sekoko vanana va ka Israyeli va to khateta kambe kumahetela kubiha masoni ka MKOMA. Se va to thumela Vabhahali, ni Vaastarote, ni sizimu sa Vasiriya, ni sizimu sa Vasidhoni, ni sizimu sa Vamowabhi, ni sizimu sa Vaamoni, ni sizimu sa Vafilista, kambe va to tshuralela MKOMA, va si mkhozeli.

⁷Se txiviti txa MKOMA txi to tura txi wukela Vaisrayeli, kambe a to va ningela manzani ka Vafilista, ni manzani ka vanana va ka Amoni.

⁸Se ka dona edo dilembe, va to xupha ni kuxanisa vanana va ka Israyeli; va va xanisile mndani ka digumi da malembe ni mtxhanu ni mararu, votshe vanana va ka Israyeli, avale va nga ti akile mtxhatuko ka Jordhani, ditikoni ka Vaamori, kona Gileyadhi.

⁹Hambi vanana va ka Amoni va to txhatuka Jordhani, va txi yalwa ni va ka Judha, ni va ka Bhenjamini, ni va nyumba ya ka Efrayime; aha ka kuza Israyeli e mana kuxaniseka ka hombe.

¹⁰Sekoko vanana va ka Israyeli va to peka huwa ka MKOMA, va txi kha vona: “Hi kuonhete, nguko hi tshuralete Txizimu txathu, hi thumela va ka Bhahali.”

¹¹Ngu konaho, MKOMA a to khene ka vanana va ka Israyeli: “Ina kha na mi hulukisa manzani ka Vaegipta, ka Vaamori, ka Vaamoni, ka Vafilista,

¹²ka Vasidhoni, ka Vaamaleki, ka Vamawoni, va nga ti ti mi xanisa mbimo yile mi nga dila kwangu kani?

¹³Hambi keto, anu mi ni tshuralete, mi thumela simwani sizimu; ngu mhaka yeto kha ni na mbi mi hulukisa kambe.

¹⁴Tsulani mi txi ya dila ka sizimu sile mi nga si sawula; si na mi hulukisa sona, ka mbimo ya kuxaniseka kwanu!”

¹⁵Aniko vanana va ka Israyeli va to kha vona ka MKOMA: Hi onhile! Maha ngu ngathu ati u ti wonako i di tinene masoni kwako; aniko ha kukombela ti to u txi hi hulukisa ka ditshiku da nyamsi.

¹⁶Se va to thavisa sizimu sa vamatiko hagari kwawe, ve thumela MKOMA; sekoko MKOMA a to pandiseka dihikani kwakwe ngu mhaka ya kuxaniseka ka va ka Israyeli.

¹⁷Se vanana va ka Amoni va to rambana va txi ya gova Gileyadhi. Ni vona va ka Israyeli va to sengeletana va txi ya gova Misipa.

¹⁸Sekoko, vathu ni vathangeli va Gileyadhi, va to wotisana va txi kha vona: “I mani wamwamna wu a no khata ene a txi lwa ni va ka Amoni kani? Eneyo a na va i di mthangeli hagari ka votshe vaaki va Gileyadhi.”