Read chopi Valamuli 17 Bible Online

Valamuli 17 - chopi bible

Valamuli 17

¹Se a ti tiho wamwamna wokari mmangoni ka Efrayime, awu ditina dakwe i nga ti Mika,

²Awu a nga khene ka mame wakwe: 1.100 wa male ya silivhela, yile u nga honyolwa, eyo u ngaza u womba-womba kubiha ngu mhaka ya yona, ni txi tipfa tinzeveni kwangu, wona taku maleyo yi ni nani, ngani ni nga teka yona. Sekoko mame wakwe a to khene: “MKOMA a na ku katekise mwanangu!”

³Ngu kumaha keto, a to tshumeta male ya 1.100 ya silivhela ka mame wakwe; aniko mame wakwe a to khene: “Na ningela male yiya ngu dianza dangu ka MKOMA, kasi ku mwanana wangu a na mvatela txithombe ni ku txi wumba; se konkuwa, na yi tshumetela kwako.”

⁴Ngu kumaha keto, ene a to ningela male yile ka mame wakwe, se mame wakwe, a to teka male ya 200 ya silivhela, e yi ningela ka mkhandi, awu a nga maha ngu yona txithombe txo vatwa, ni txa kuwumbwa, kambe txi ti ti maneka nyumbani ka Mika.

⁵Se wamwamna wuwa Mika, a ti ti ni nyumba ya sizimu, se a to maha efodhe ni titerafime, a to sawula mmweyo ka vanana vakwe, kasi ku a na va mphaxeli wakwe.

⁶Ka masiku ale, ku ti si nga ni mfumeli kona Israyeli, mmwani ni mmwani a txo ti mahela ati a nga txi ti wona i di ta tinene kwakwe.

⁷Se ku ti tiho dijaha dokari da Bhetlehema ka Judha, wa lihunzu la ka Judha, i nga ti ti Mulevhi, na i ti muluveli.

⁸Se wamwamna wuwa a to rura didhoropani ka Bhetlehema wa Judha, kasi kuya luvela ni hani a no mana kuamukeleka; ngako a di hokile koko mmangoni ka Efrayime, a to tsimbila kala m'tini ka Mika,

⁹se Mika a to mu wotisa a txi khene: “U ta ngu hani kani?” Se ene a to xamula a txi khene: “Ni Mlevhi wa Bhetlehema ka Judha, se ni na luvela ni hani ni no mana kuamukeleka.”

¹⁰Sekoko Mika a to m'gela ku khene: “Zumba ni nani, u maha tate wangu ni mphaxeli wangu; se dilembe ni dilembe ni na kuninga male ya digumi da tisilivhela, ni so ambala, ni sakudya.” Se Mlevhi a to wulela.

¹¹Se Mulevhi a to tsaka ngu kuzumba nayo wamwamna wule, se dijaha diya ti mahile ku nga ova mmweyo wa vanana vakwe.

¹²Se Mika a to veka dijaha dile da Mlevhi, ku va mphaxeli wakwe; se zumba nyumbani ka Mika.

¹³Sekoko Mika a to khene: “Konkuwa na tiziva ti to MKOMA a na ni mahela ta tinene, nguko ni ni mphaxeli wa Mlevhi.”