Read chopi Valamuli 19 Bible Online

Valamuli 19 - chopi bible

Valamuli 19

¹Ku to maheka kambe ka ona masiku ale, ku nga ti si nga ni mfumeli ka Israyeli, taku ku txi maneka wamwamna wa Mlevhi, a nga ti ti luvela madhawani ka mmango wa ka Efrayime, a to ti tekela wamsikati wa txikaba, wa Bhetlehema ka Judha.

²Aniko awule wa txikaba a to maha wugango, se a txi thava, e tshumelela m'tini ka tate wakwe, kona Bhetlehema ka Judha, eyo a nga ya zumba kona masiku okari, a kudingana mune wa mitxima.

³Se mwamna wakwe a to khukha a txi mlondeta, kasi ku a txi ya womba-womba nayo mapswi a ku mkhongotela, ni kutshumela a txi wuya nayo; se a ti ti tekile dijaha dakwe ni timbongola timbidi, se awule wamsikati a to mteka a txi wulela nayo nyumbani ka tate wakwe, se mbimo yile tate wa kona a nga mmona, a to m'hingeta ngu kutsaka.

⁴Se tate wa msikati wakwe, a to mñola, a txi zumba nayo masiku mararu; se va to dya ni kusela, va txi otela koneho.

⁵Se ku to maheka taku ka ditshiku da wumune, ve phindula, se Mlevhi e wuka kasi ku a txi khukha, sekoko tate wa dihorana a to khene ka mwane wakwe: “Susula ngu txikhwemu txa dipawu, se msana keto mi na tsula.”

⁶Se va to khalahatsha, vedya ni kusela ngu wumbidi wawe. Se tate wa dihorana a to khene ka wamwamna wule: “Na ku kombela, tumela, ti to u zumba kambe wusiku wuwa, kasiku mbilu yako yi txi tsaka.”

⁷Aniko awule wa dijaha a to khukha a txi lava kutsula, kambe tate wa msikati wakwe a to mkurumeta ku a txi otela kambe ka wusiku wonewo.

⁸Se a di phindute ka ditshiku da wutxhanu kasi ku a txi tsula, tate wa dihorana a to khene: Na kukombela: “Susula.” Se va to zumba kala kugumani ka ditshiku, na va txi dya ngu wumbidi wawe.

⁹Sekoko wamwamna wule a to khukha kasi ku a txi tsula, ene, ni txikaba txakwe, ni dijaha dakwe; se tate wa msikati wakwe, a to m'gela ku khene: “Wona taku ditambo diya kuswani, se wusiku wa hoka, na ku kombela taku u txi otela kambe kona hawa wusiku wuwa; nguko se ditshiku da guma, otela kona hawa wusiku wuwa, niku mbilu yako yi na tsake; se mangwana ni mabimbi-kutxa, mi na wuka mi txi tsula ditendani kwanu.”

¹⁰Aniko wamwamna wule kha tumela kuotela kambe hale wusiku wule, se a to khukha a txi tsula, kala eya hoka hafuhi ka Jebhusi (i ku Jerusalema), kumweko ni timbongola takwe tatimbidi ti di lulamisetwe, ni txikaba txakwe.

¹¹Ngako koko, va ti hafuhi ni Jebhusi, na se ditambo di di swite ngutu, dijaha di to kha dona ka nyamne wa dona: “A hi tsimbileni konkuwa, hi txi ya wulela ka didhoropa diya da Vajebhusi, hi otela kona wusiku wuwa.”

¹²Aniko nyamne wakwe a to mxamula a txi kha ene: “Lambi, hi nga wuleleni ka didhoropa ni da dimwedo da vane, daku va i si nga da vanana va ka Israyeli, aniko hi na pindelela kala Gibheya.”

¹³A to khene kambe ka dijaha dakwe: “A hi tsimbileni, hi txi hoka ka wumwewo wa makhalo ale, hi txi ya otela Gibheya mwendo Rama wusiku wuwa.”

¹⁴Va to pinda koko va txi tsimbila veya masoni, va di hokile hafuhi ka Gibheya, i ku didhoropa da ka Bhenjamini, ditambo se di ti swite.

¹⁵Se va to khukha va txi ya otela kona Gibheya, wona wusiku wule; se ngako Mulevhi a di wulete, a to ya khalahatsha ha mtendelani ka didhoropa, nguko kha ka maneka ni wammweyo wa ku va amukela m'tini kwakwe, kasiku va txi ya otela kona wusikuwo.

¹⁶Se wona taku wamwamna wokari wo kumba a ti ti wuya ngu kuthumani thembweni kwakwe; se wamwamna wuwa i ti ti wa mmangoni ka va ka Efrayime, aniko i ti ti muwuyi wa Gibheya; sekoko vavamna va wukhalo wuwa i ti ti vanana va ka Bhenjamini.

¹⁷Mbimo yile ene a nga gula maso, a to wona m'thu wule ha mtendelani ka didhoropa; se txikosana txi nje kha txona: “Uya hani, niku uta ngu hani kani?”

¹⁸Se ene a to mxamula a txi khene: Hita ngu Bhetlehema ka Judha, hi ya madhawani ka mmango wa ka Efrayime, eyo ni nga velekelwa kona; nguko ni ti ko ya Bhetlehema ka Judha; kambe konkuwa ni ya Nyumbani ka MKOMA, nguko kha ku nga ni wammweyo wa ku ni amukela m'tini kwakwe,

¹⁹hi ni mwasi ni lihawu lo dyisela ka lona timbongola tathu, se ni dipawu ni vhinya sa kudingana ani, ni sa txithumi txako txa txisikati, ni sa dijaha di di tako ni sithumi sako; kha ku pwateki txilo ni txa tximwetxo.

²⁰Sekoko txikosana txile txi to kha txona: “Kudikha ku nave ni nawe; totshe ti ti no ku kelelela ni na ku mahela, aniko mi nga oteleni hamtendelani wusiku wuwa.”

²¹Se a to wuya navo nyumbani kwakwe, a txi ni nga lihawu ka timbongola; se vona va di sambile mikondo, va to dya ni kusela.

²²Nga ti va di ha kutsakani timbiluni kwawe, wona taku ku to humelela migewu ya didhoropani (vavamna va i nga ti ti vanana va Bheliyali), yi randela nyumba, yi txi peketela ditimba; yi txi womba ka txikosana txile txa nyamne wa nyumba, yi txi kha yona: “Humisa hahanze m'thuyo a nga wulela nyumbanimo kwako, kasiku hi ta m'ziva.”

²³Se wamwamna wule wa nyamne wa nyumba a to va hingeta, a txi va gela ku kha ene: “Ahim-him vanathu! Na mi kombela, mi nga maheni kubiha ka ku nga eto; nguko m'thu wuwa ku a nga wulela nyumbani kwangu, mi nga maheni kubiha ka ku nga eto.

²⁴Wonani taku ni na humisa hahanze dihorana dangu da mbiri, ni txikaba txa wamwamna wule, mahani kubiha, ni kuranda kwanu ngu vona; aniko ka wamwamna wuwa, mi nga maheni kubiha ka ku nga eto.”

²⁵Aniko vavamna vale kha va lava ku mu engisa; sekoko Mulevhi wule a to teka txikaba txakwe a txi txi humisa hahanze; se vona va to txi ziva ni ku txi mahela wubihi ka wotshe wusiku kala di txi txa, se ngu kugwimba ka wuronga, va to mleka.

²⁶Se di txi ya kutxani, awule wamsikati a to ta wa ha txikeni ka nyumba ya txikosana txile a nga ti ti ka yona nyamne wakwe, a txi zumba kona kala di txi txa.

²⁷Se nyamne wakwe a di wukile ni mixo, a txi tula matimba a nyumba, e huma e londeta nzila yakwe, a to wona msikati wakwe wa txikaba a di txotxowolo ha txikeni ka nyumba, manza akwe ma di hamtshunzutini.

²⁸Se ene a to m'gela ku kha ene: “Khukha hi txi tsula.” Aniko wamsikati kha xamula txilo. Sekoko a to m'veka txitimwi ka mbongola, se a txi khukha wule wa dijaha e tsula m'tini kwakwe.

²⁹Ngako a di hokile koko m'tini kwakwe, a to teka mesa, se a txi teka txikaba txakwe, e txi wilela ngu digumi da sihango ni simbidi, a txi si rumela ka totshe tihunzu ta ka Israyeli.

³⁰Se ku to maheka taku, ni wihi wu a nga txi ti wona, a ti ti khene: “Kha ti zivi kumaheka to nga tiya, kambe kha ti zivi kuwonwa, kukhukhela ka ditshiku dile vanana va ka Israyeli, va nga huma ngu ditikoni ka Egipta, kala ka ditshiku da nyamsi; vekisani mhaka yiya timbiluni kwanu, mi txi wila mhaka ya kona.”