Read chopi Valamuli 2 Bible Online

Valamuli 2 - chopi bible

Valamuli 2

¹Se Ngelozi ya MKOMA yi to khukha Giligali yi kwelela Bhokimi, se yi txi kha yona: Ni mi humisile Egipta, ni txi mi tisa ka ditiko di, ni nga xambanya kuninga vatate vanu, ni txi khani: “Kha ni na mbi thuka ni fuvisa txitumelelano txangu ni nanu.

² Se anu koko, mi nga maheni txitumelelano ni vaaki va ditiko diya; aniko khundumuselani siluvelo sawe.” Kambe anu, kha ma engisa dipswi dangu. Ngu kutxani mi nga mahetela toneto kani?

³Ngu mhaka yeto nani ni nga khani: Kha ni na mbi va tutumisa masoni kwanu; aniko va na va txitimwi kwanu, se sizimu sawe si na va milawu kwanu.

⁴Se ku to maheka taku yi txi ngadi yi womba-womba mapswi awa Ngelozi ya MKOMA, ka votshe vanana va ka Israyeli, vathu va to guleta mapswi awe ve dila.

⁵Se wukhalo wule wi to dhanwa ku i Bhokimi;[2] se konaho va to maha mphaxo ka MKOMA.

⁶Se ngako Joxuwa a di tsulisile vathu, vanana va ka Israyeli va to khukha, mmwani ni mmwani e tsula ka thomba yakwe, kasi kuya teka ditiko.

⁷Se vathu va to thumela MKOMA, ka otshe masiku a kuhanya ka Joxuwa, ni ka otshe masiku a madhota ale ma nga simama me hanya msana ka kufa ka Joxuwa, kambe va nga wona wotshe mthumo wule wa hombe wa MKOMA, awule a nga wu maha ka Israyeli.

⁸Joxuwa koko, mwana Nune, txithumi txa MKOMA, a fite a di ni tanga ya 110 wa malembe.

⁹ Se va to mtshotsha m'hinganoni ka thomba yakwe, kona Timinati-Heresi, mmangoni ka Efrayime, ngu wuphemba ka mmango wa Gahasi.

¹⁰Kambe li to sengeletwa lotshe liveleko lile ka vatate va lona, se msana ka kufa ka Joxuwa, ku to humelela limwani liveleko, li nga si zivi MKOMA, hambi kuziva ni ka kudotho mthumo wu a nga wu maha ka Israyeli.

¹¹Sekoko, vanana va ka Israyeli va to maha kubiha masoni ka MKOMA; se va to thumela va ka Bhahali.

¹²Se va to leka MKOMA, Txizimu txa vatate vawe, awu a nga va humisa ditikoni ka Egipta, ve londetela simwani sizimu, sa vathu vale va nga ti ti va ranganyetile, se va to khizama ka sona, veza ve wusa kuhenya ka MKOMA.

¹³Nguko va lekile MKOMA, se ve thumela Bhahali ni Axitaroti.

¹⁴Ngu kumaha keto, kuhenya ka MKOMA ku to wukela va ka Israyeli, se e va ningela manzani ka makhamba, ma txi va pela; kambe a to va ningela manzani ka valala vawe vale va nga ti ti va ranganyetile; se kha va nga sikota kukhukha va txi ema kambe masoni ka valala vawe.

¹⁵Ni hani mu va nga txi humela kona, dianza da MKOMA di ti va wukela ngu wubihi, nga ti MKOMA a nga ti ti wombile, ni ti MKOMA a nga ti xambanyile; se va ti ti kuxuphekani ka hombe.

¹⁶Se MKOMA a to va wusela valamuli, ava va nga va hulukisa manzani ka vale va nga ti ti va handa.

¹⁷Aniko ni ka kudotho kha va engisa valamuli; va to maha wugango wo londeta simwani sizimu, kambe va txi si khizamela; va to kuluveta kuleka nzila yi va nga tsimbila ngu yona vatate vawe, yo engisa sirumo sa MKOMA; se vona kha va mahisa eto.

¹⁸Se mbimo yile MKOMA a nga ti ti va wusela valamuli, MKOMA a ti ti ema ni mlamuli, a txi va hulukisa manzani ka valala vawe, ka otshe masiku a mlamuliyo; nguko MKOMA a ti ti ti laya ngu tihuwa tawe, ngu mhaka ya vale va nga ti ti va xupha, ni ku va xanisa.

¹⁹Aniko ku txi maheka taku, ngako a txi fa mlamuli, va ti ti tshumela va txi ti nyenyezisa, kupinda vatate vawe, va txi londetela simwani sizimu, va txi si thumela ni ku si khizamela; va si leki ni txa tximwetxo ka simaho sawe, hambi txieyiso txawe.

²⁰Ngu kumaha keto, kuhenya ka MKOMA a to wukela va ka Israyeli; se a txi khene: “Ngako vathu vava va nga leka txitumelelano txangu, atxi ni nga ti leletete vatate vawe, va si engisi dipswi dangu.

²¹Ni ka kudotho, kha ni na mbi tutumisa ni da dimwedo ditiko masoni kwawe, ale Joxuwa a nga ma siya kufani kwakwe.

²²Kasi ku ngu ona ni duka Israyeli, mwendo va na xayisa nzila ya MKOMA, kufana ni vatate vawe va nga yi xayisa, kasi kuve tsimbila ngu yona, mwendo ku yi leka.”

²³Ngu kumaha keto, MKOMA a to ma leka me zumba matiko ale, kha kuluveta ku ma tutumisa, hambi ku ma ningela manzani ka Joxuwa.