Read chopi Valamuli 20 Bible Online

Valamuli 20 - chopi bible

Valamuli 20

¹Sekoko votshe vanana va ka Israyeli va to huma, se msengeletano wu patana nga m'thu mmweyo, kukhukhela Dhani kala Bherisebha, kumweko ni ditiko da Gileyadhi, kona Misipa, masoni ka MKOMA.

²Se vathu va kuta ngu ka otshe madhawa, va totshe tihunzu ta va ka Israyeli, va to maneka msengeletanoni ka vathu va Txizimu, na i di 400.000 wa vavamna, vale va tsimbilako ngu mikondo, na va di xomile matxhari.

³(Va to tiengisa koko vanana va ka Bhenjamini taku, vanana va ka Israyeli va kwete va txi ya Misipa.) Se vanana va ka Israyeli va to kha vona: “Hi txhamuseleni, yi mahekisile kutxani mhaka ya kona kubiheko kani?”

⁴Sekoko wamwamna wule wa Mulevhi, i ku mwamna wa wule wamsikati a nga dawa, a to xamula a txi khene: Ni hokile Gibheya ni txikaba txangu, ka didhoropa da ka Bhenjamini, kasi kuya otela kona;

⁵Se vaaki va Gibheya va to ni wukela, va txi randela nyumba ni wusiku, se va lavile ku ni daya, va txi kurumeta txikaba txangu, kala kuza txi fa.

⁶Sekoko ni to teka txikaba txangu, ni txi txi wilela ngu sihango, ni txi si rumela ka dotshe ditiko di i kuthomba ya ka Israyeli, nguko va mahile mhaka yo biha yo nga yoneyo, i ku txiruko ka va ka Israyeli.

⁷Wonani taku motshenu mi vanana va ka Israyeli; ahawa, wombani dipswi danu ni txileleto txanu.

⁸Sekoko votshe vathu va to ema ngu dipswi dimwedo, va txi kha vona: Ni wammweyo kwathu kha na mbi tshumelela ditendani kwakwe, hambi ni wammweyo kwathu kha na mbi tshumelela nyumbani kwakwe.

⁹Aniko ati hi no maha ka Gibheya ngu tiya: Hi na peka tixolo, hi txi mlwisa.

¹⁰Se hi na teka digumi da vavamna ka dizana, ka totshe tihunzu ta va ka Israyeli, ni 100 ka 1.000, ni 1.000 ka 10.000, va txi ya teka timbuva ta ku ta ninga vathu, kasiku ngako va txi na hoka Gibheya ka Bhenjamini, va na yalwa madingano ni wotshe wubihi, wule wu nga mahelwa va ka Israyeli.

¹¹Ngu kumaha keto va to tshangana votshe vavamna va ka Israyeli, va txi wukela didhoropa diya, va di patanile nga m'thu mmweyo dwe.

¹²Se tihunzu ta va ka Israyeli, ti to rumela vavamna ka totshe tihunzu ta va ka Bhenjamini, ti txi kha tona: “Wubihi muni wona wuwa wu nga maheka hagari kwanu kani?

¹³Hi ningeni koko kona kuwa vavamna vale, i ku vanana va Bheliyali, va manekako Gibheya, kasi ku hi txi va daya, hi txi fuvisa wubihi ka Israyeli”; aniko vanana va ka Bhenjamini kha va tumela kuengisa dipswi da vanawe, i ku vanana va ka Israyeli.

¹⁴Kukhata vanana va ka Bhenjamini va to patana ve huma ngu madhoropani ka Gibheya, va txi yalwa ni vanana va ka Israyeli.

¹⁵Se ka ditshiku dile, ku to balwa 26.000 wa vanana va ka Bhenjamini, va kuta ngu madhoropani, avale va sikotako kundiwita ditxhari, ku si balwi ni vaaki va Gibheya, va 700 wa vavamna, va nga sawulwa.

¹⁶Hagari ka votshe vathu vava, ku ti ti ni 700 wa vavamna va nga sawulwa, vo thumisa txibhabha, avale votshe va nga txi khwinza dirigwi ngu txibhalakaza, va si hosi ni msisi ni wumwewo.

¹⁷Se hahanze ka va Bhenjamini, ku to balwa 400.000 wa vavamna va ka Israyeli, avale va nga txi ndiwita ditxhari, aniko votshe i ti ti vavamna va yimbi.

¹⁸Se vanana va ka Israyeli va to khukha, va txi kwelela Bheteli, veya wotisa ka Txizimu, va txi kha vona: “I mani hagari kwathu a no thangela e kwela ku yalwa ni va ka Bhenjamini kani?” Se MKOMA a to khene: “I Judha a no khata ene e kwela.”

¹⁹Va to khukha koko vanana va ka Israyeli ni mixo, va txi ya gova ve wukela Gibheya.

²⁰Se vavamna va ka Israyeli va to huma va txi lwa ni va ka Bhenjamini; kambe vavamna va ka Israyeli va to fola ngu litxhatxha va txi lwa navo, hafuhi ni Gibheya.

²¹Sekoko vanana va ka Bhenjamini va to huma ngu Gibheya, ka donedo ditshiku va date 22.000 wa vavamna va ka Israyeli.

²²Aniko vavamna va ka Israyeli, va to tsanisela va txi engeta ve xoma yimwani yimbi, ka wukhalo wule va nga lwa ka wona ditshiku do khata.

²³Se vanana va ka Israyeli va to kwelela, va txi ya dila masoni ka MKOMA kala ni minova, va txi wotisa ka MKOMA, va txi kha vona: “Ina hi nga tshumela kambe hi yalwa ni vanana va ka Bhenjamini, vona va i ku vanathu kani?” Se MKOMA a to kha ene: “Tsulani mi txi yalwa navo!”

²⁴Sekoko vanana va ka Israyeli va to tshangana mangwanani ka kona, ni vanana va ka Bhenjamini.

²⁵Ni vona va ka Bhenjamini, va to huma va txi va hingeta hahanze ka Gibheya, va txi wisa hahatshi 18.000 wa vavamna, votshe vale va nga txi ndiwita ditxhari.

²⁶Sekoko votshe vanana va ka Israyeli, ni votshe vathu, va to kwelela va txi ya Bheteli, veya dila masoni ka MKOMA, se va to ti tona ka dotshe ditshiku dile kala minova; kambe va to ningela miphaxo yo hiswa, ni miningelo ya kudikha, masoni ka MKOMA.

²⁷Se vanana va ka Israyeli va to wotisa ka MKOMA (ngako dibhokiso da txitumelelano txa Txizimu di nga ti ti ho koneho ka masiku ale;

²⁸se Finiyasi, mwana Eleyazari, mwana Aroni, a ti ti masoni ka dona, ka masiku ale), va txi kha vona: Ina hi nga tshumela kambe hi txi yalwa ni vanana va ka Bhenjamini, vona va i ku vanathu, mwendo hi txi ema kani? Se MKOMA a ti khene: “Tsulani, nguko mangwana ni na va ningela manzani kwanu.”

²⁹Sekoko Israyeli a to randela Gibheya.

³⁰Se vanana va ka Israyeli va to kwelela, ngu ditshiku da wuraru, va txi wukela vanana va ka Bhenjamini, va txi lwa navo hafuhi ni Gibheya, kufana ni simwani sikhati.

³¹Sekoko vanana va ka Bhenjamini va to huma va txi hingeta vathu, va txi vayilela didhoropa; se va to khata kudyela vathu vokari, va txi tholetela mtengo wo dingana magumi mararu a vavamna va ka Israyeli, kufana ni simwani sikhati, amu tinzilani (yimwani yi yako Bheteli, yimwani yi ya Gibheya ngu mu thembweni.)

³²Sekoko vanana va ka Bhenjamini va to kha vona: “Hi va xute kambe ku nga kukhatani.” Aniko vanana va ka Israyeli va to kha vona: “A hi tutumeni, kasi ku va ndindela tinzilani, kule ni didhoropa.”

³³Sekoko votshe vavamna va ka Israyeli, va to khukha ka makhalo awe, va txi yalwa kona Bhahali-Tamari; se va ka Israyeli, ava va nga ti baramela, va to huma ngu maphali ka Gibheya.

³⁴Se 10.000 wa vavamna, vo sawulwa ka votshe va ka Israyeli, va to wukela Gibheya, se yimbi yi to kula; aniko vona va ti si ti zivi taku va na welwa ngu dikhombo.

³⁵Sekoko MKOMA a to khozisa va ka Bhenjamini masoni ka va ka Israyeli, se vanana va ka Israyeli va to daya 25.100 wa vavamna va ka Bhenjamini, votshe vale va nga txi ndiwita ditxhari.

³⁶Se vanana va ka Bhenjamini va ti woni ti to va xutwe, nguko vavamna va ka Israyeli va ningete wukhalo ngu kututuma va txi thava va ka Bhenjamini, nguko va ti ti themba vavamna va va nga ti va vekile ve baramela Gibheya.

³⁷Se vabarameli va to kuluveta ve randela Gibheya; va txi va dayela ngu matxhari ka dotshe didhoropa.

³⁸Se vavamna va ka Israyeli, va ti ti ni txikombiso txokari ni vale va nga ti baramile, txa ku tuvikisa direfu da hombe da wutshi didhoropani.

³⁹Sekoko vavamna va ka Israyeli, va to xexa kulwani kwawe, se va ka Bhenjamini va to khata kudayela vavamna va ka Israyeli, hafuhi ka magumi mararu a vavamna; nguko va ti ti kha vona: “Se hi va xute do gwita, ku nga dile do khata.”

⁴⁰Sekoko direfu da wutshi di to khata kutuvika ngu didhoropani, di txi nga phande ya wutshi; se va ka Bhenjamini va to tshembereka va txi wona msana, ve wona wutshi wa didhoropani wu txi kwela nzumani.

⁴¹Aniko vavamna va ka Israyeli va to tshembereka, se va ka Bhenjamini va to xamala, ngu kuwona taku dikhombo di va wete.

⁴²Se va to tshurara masoni ka vavamna va ka Israyeli, ve teka nzila ya kuya txiwulani; aniko yimbi yi to va manela, vale va nga ti ti madhoropani, va to dayela vale va nga ya wulela hagari kwawe.

⁴³Kambe va to randela va ka Bhenjamini, va txi va tutumisa ni ku va dayela, kala hafuhi ni Gibheya, ngu didhawa da wutxani.

⁴⁴Se ka va ka Bhenjamini ku to dawa 18.000 wa vavamna, votshe vava i ti ti vavamna va tindena.

⁴⁵Sekoko va to tshurara, va txi tutuma veya txiwulani, ka dirigwi da Rimoni; se kwawe ku to manwa 5.000 wa vavamna amu tinzilani ve dawa, va txi va tutumisa ngu hafuhi kala Gidhomi, ku txi dawa ka vona 2.000 wa vavamna.

⁴⁶Se votshe va ka Bhenjamini avale va nga dawa ka ditshiku dile, i ti ti 25.000 wa vavamna, avale va nga txi ziva kundiwita ditxhari, votshe i ti ti vavamna va tindena.

⁴⁷Aniko 600 wa vavamna va to tshurara va txi tutumela txiwulani, ka dirigwi da Rimoni; se va to ya zumba dirigwini ka Rimoni mune wa mitxima.

⁴⁸Se vavamna va ka Israyeli va to tshumela va txi yela vanana va ka Bhenjamini, veya dayela votshe ngu matxhari, kukhukhela ka vathu va didhoropani, kala ka sihari, ni sotshe si si nga ti ti maneka, ve hisetela ni otshe madhorpa aale va nga ma mana.