Read chopi Valamuli 3 Bible Online

Valamuli 3 - chopi bible

Valamuli 3

¹Ayiya koko, ngu yona mifumo yi MKOMA a nga yi siya, kasi ku ngu yona e duka Israyeli, i ku votshe vale va nga mbi ziva totshe tiyimbi ta Kanana.

²Ku mahela ku tiveleko ta vanana va ka Israyeli, ngu tona ti na gonda kulwa yimbi, ngutu-ngutu tilveleko tile ti nga si yi zivi yimbi.

³Mtxhanu wa vathangeli va Vafilista, ni votshe Vakanana, ni Vasidhoni, ni Vahevhi, vale va nga ti akile mmangoni ka Libhanoni, kukhukhela mmangoni ka Bhahali-Hermoni kala ka txike txa Hamati.

⁴Avava koko, va sate kasi ku ngu vona MKOMA e duka va ka Israyeli, kasi kuziva ti to mwendo va na engisa sirumo sakwe, sile a nga ti leletete vatate vawe, ngu txisofu txa Mosi.

⁵Se vanana va ka Israyeli va di akile hagari ka Vakanana, ni Vaheti, ni Vaamori, ni Vaferezi, ni Vahevhi, ni Vajebhusi,

⁶va to teka vanana vamahorana va vamatiko va txi maha vasikati vawe, se ni vona ve ningela vanana vawe vamahorana ka mazambi a vamatiko; aniko va to khozela sizimu sawe.

⁷Se vanana va ka Israyeli va to maha kubiha masoni ka MKOMA, ve divala MKOMA, Txizimu txawe, aniko ve thumela Vabhahali ni Asterote.

⁸Sekoko kuhenya ka MKOMA ku to wukela Israyeli, aniko ene a to va xavisa ngu dianza da Kuzani-Rezatayimi, mfumeli wa Mesopotamiya; se vanana va ka Israyeli va to thumela Kuzani-Rezatayimi, mndani ka mtxhanu wa malembe ni mararu.

⁹Se vanana va ka Israyeli va to peka huwa ka MKOMA, se MKOMA a to wusa mtxhatxhisi ka vanana va ka Israyeli, ene a to va txhatxhisa: I ku Otoniyeli, mwana Kenazi, mnanda wa Kalebhi.

¹⁰Se Moya wa MKOMA wu to ta txitimwi kwakwe, se a to maha mlamuli wa Israyeli, a txi huma eya yimbini; se MKOMA a to ningela Kuzani-Rezatayimi, mfumeli wa Siriya, manzani kwakwe; se dianza dakwe di to simama di wukela Kuzani-Rezatayimi.

¹¹Sekoko ditiko di to humula mune wa magumi a malembe; se Otoniyeli, mwana Kenazi, a to fa.

¹²Hambi keto, vanana va ka Israyeli va to engeta kumahetela kubiha masoni ka MKOMA; sekoko MKOMA a to ninga mtamo ka Egloni, mfumeli wa Mowabhi, wo wukela va ka Israyeli, nguko va nga maha kubiha masoni ka MKOMA.

¹³Se Egloni a to patana ni vanana va ka Amoni ni Vaamaleki, ve tsula ve yalwa ni va ka Israyeli, ve teka didhoropa da Mitxhese.

¹⁴Se vanana va ka Israyeli va to thumela Egloni, mfumeli wa Vamowabhi, digumi da malembe ni mtxhanu ni mararu.

¹⁵Sekoko vanana va ka Israyeli va to peka huwa ka MKOMA, se MKOMA a to va wusela mtxhatxhisi, i ku Ewudhi, mwana Gera, wa ka Bhenjamini, wamwamna wa libhabha. Se vanana va ka Israyeli va to rumela txiningo ngu dianza da Ewudhi ka Egloni, mfumeli wa Vamowabhi.

¹⁶Se Ewudhi a to tshula ni ditxhari do lotwa madhawa mambidi, da mpimo wa hafu ya metru kulapha ka dona, a txi di khweketa ngu hahatshi ka syambalo sakwe, ka nyonga yakwe ya txinene.

¹⁷Se a to heleketa txiningo txile ka Egloni, mfumeli wa Vamowabhi; kambe Egloni i ti ti wamwamna wo ena ngutu.

¹⁸Se ku to maheka taku, a di gwitile kuningela txiningo, a to tshumeta vathu vale va nga ti rwate txiningo.

¹⁹Hambi keto, a to tshumela ngu wukhalo wu ku ku ni sithombe so vatwa, hafuhi ni Giligali, a txi khene: “Ni na ni mhaka yi ni lavako ku ku lengela, awe mfumeli. Egloni a to womba a txi khene: Malala. Se votshe vale va nga ti ti wonetela, va to khukha masoni kwakwe.”

²⁰Se Ewudhi a to wulela nyumbani mu mfumeli Egloni a nga ti khalahatshile kona ekha, a txi pepa, se Ewudhi a txi khene: “Ni na ni dipswi da Txizimu do kugela.” Se mfumeli a to khukha a txi ema.

²¹Sekoko Ewudhi a to nawuluta dianza dakwe da txibhabha, e teka ditxhari di nga ti ti ka nyonga yakwe ya txinene, a txi mthola ngu dona hamrumbu,

²²aha koza di wulela ni txiti txa kona, se mafura ma to fenengeta ditxhari (nguko kha thavisa ditxhari hamrumbu); se ku to huma ni nzambwa.

²³Sekoko Ewudhi a to huma eya mu ka m'hubhe, se a to msekela matimba a nyumba, a txi ma khota.

²⁴Se ngako ene a di humile, sithumi sa Egloni si to ta mmona, se si wona ti to matimba a nyumba ma sekilwe; si txi kha sona: “Mwendo ene o ti ruma amu txibhiyani kwakwe ko pepela kona.”

²⁵Se va to rinzela veza ve karala, aniko mfumeli a ti si tuli matimba a nyumba ya txitimwi; sekoko va to teka khiya va txi tula, aha va nga wona mfumeli wawe a di kwapa-kwapa hahatshi, a di fite.

²⁶Se Ewudhi a to huluka, vona va txi ngadi ve verela, nguko ene a pindile ngu hagari ka sithombe so vatwa, a txi tutumela kuya Seyira.

²⁷Se ku to maheka taku mbimo yi ene a nga wulela, a to veta mipundu a di mimangoni ka Efrayime; se vanana va ka Israyeli va to relela kumweko nayo ngu mimangoni, na ene a di masoni kwawe.

²⁸Se a to va gela tiya: “Ni londeteni, nguko MKOMA a ningete valala vanu Vamowabhi, manzani kwanu”; va to relela va txi mlondeta, se ve tsiva mabelo a kukhukhela Jordhani kuya Mowabhi, va si tumeli ni wammweyo a txi txhatuka ngu kona.

²⁹Se ka mbimo yoneyo, va to daya 10.000 wa vavamna, votshe i ti ti vo ena ngutu, kambe votshe i ti ti vavamna va tindena; kha ka huluka ni wammweyo.

³⁰A khozisisilwe eto Mowabhi kedo ditshiku, hahatshi ka dianza da Israyeli; se ditiko di to dikha mndani ka mtxhanu wa magumi ni magumi mararu a malembe.

³¹Msana ka Ewudhi ku to londeta Samigari, mwana Anate, a nga daya 600 wa vavamna va Vafilista, ngu tshoka ya simbi yo gola ngu yona tihomu; kambe a txhatxhisile Israyeli.