Read chopi Valamuli 4 Bible Online

Valamuli 4 - chopi bible

Valamuli 4

¹Aniko vanana va ka Israyeli, va to simama va maha kubiha masoni ka MKOMA, msana ka kufa ka Ewudhi.

²Se MKOMA a to va ningela manzani ka Jabhini, mfumeli wa Kanana, a nga ti fumela Hazori; se Sisera i ti ti nduna ya dibutho da kona, awule a nga ti akile Haroseti-wa vamatiko.

³Sekoko vanana va ka Israyeli va to peka huwa ka MKOMA, nguko Jabhini a ti ti ni 900 wa sikotxikani sa tisimbi, kambe a xuphile vanana va ka Israyeli mndani ka magumi mambidi a malembe.

⁴Se Dhebhora, mprofeti wa txisikati, kata Lapidhoti, i ti ti mlamuli wa ka Israyeli ka yona yile mbimo.

⁵Kambe a ti ti zumba hahatshi ka mitxhese ya Dhebhora, hagari ka Rama ni Bheteli, mimangoni ka Efrayime, se vanana va ka Israyeli va ti ti ya kwakwe kasi kuya lamulwa ngu ngene.

⁶Se a to rumela kuya dhana Bharake, mwana Abhinowami, wa Kedhesi ka va ka Naftali, a txi m'gela ku khene: “Ina MKOMA, Txizimu txa ka Israyeli, kha kuruma a txi khene: Tsula u ya sengeleta vathu mmangoni ka Tabhori, kambe teka 10.000 wa vavamna, hagari ka vanana va ka Naftali ni vanana va ka Zebhuloni kani?

⁷Se Sisera, mthangeli wa dibutho da Jabhini ni na mndindela kwako, kumweko ni sikotxikani sa kona, ni dibutho da kona, txinambwanani ka Kixoni, kambe ni txi mningela manzani kwako.”

⁸Sekoko Bharake a mxamute ku khene: “Ngako u txi tsula ni nani, ni na tsula; aniko ngako u si tsuli ni nani, na mbi tsula.”

⁹Se Dhebhora a to khene: “Kha ditshuri, ni na tsula ni nawe, aniko nduma kha yi na mbi va yako ka nzila yi u yi tekako; nguko MKOMA a na ningela Sisera manzani ka wamsikati.” Se Dhebhora a to khukha e tsula ni Bharake, va txi ya Kedhesi.

¹⁰Sekoko Bharake a to ramba va ka Zebhuloni ni va ka Naftali, va txi ya Kedhesi, kumweko ni 10.000 wa vavamna; se Dhebhora a to tsula kumweko nayo.

¹¹Se Hebheri, mkeni, a ti ti hambanisile ni Vakeni-kulowe, i ku vanana va Hobhabhe, tate wa Mosi ngu ka msikati wakwe, kambe a ti ti gwimbile matenda akwe, kala mkusuni ka Zahananimi, hafuhi ni Kedhesi.

¹²Va to womba va txi zivisa Sisera, va txi kha vona: Bharake mwana Abhinowami, a kwete mmangoni ka Tabhori.

¹³Se Sisera a to tshanganisa sotshe sikotxikani sakwe sa 900, sa tisimbi, e ramba votshe vathu vakwe va yimbi, kukhukhela Heroseti-wa-vamatiko, kala mlongani ka Kixoni.

¹⁴Sekoko Dhebhora a to khene ka Bharake: Ti lulamisele nguko nyamsi ngu dona ditshiku di MKOMA a no ningela Sisera manzani kwako. Ina MKOMA hi nga ene a thangelako masoni kwako kani? Konaho Bharake a to relela ngu mangoni ka Tabhori ni 10.000 wa vavamna.

¹⁵MKOMA a to hangalasa Sisera ni sotshe sikotxikani sakwe, ni votshe vathu vakwe va yimbi masoni ka Bharake. Sisera a to ndaka a txi jatama ngu ka txikotxikani txakwe, e tutuma ngu mikondo.

¹⁶Bharake a to tutumisa vathu va yimbi kala Heroseti-wa-vamatiko. Dotshe dibutho da yimbi da Sisera di to xulwa, di txi khoziswa ngu ditxhari, ni wammweyo asi huluki.

¹⁷Sisera a to thava a txi tutuma ngu mikondo, a txi ya ditendani ka Jayeli, msikati wa Hebheri, mkeni, nguko ku ti ti ho kudikha hagari ka Jabhini mfumeli wa Hazori, ni nyumba ya ka Hebheri, mkeni.

¹⁸Jayeli a to huma a txi hingeta Sisera, a txi khene kwakwe: “Wulela nyamne wangu u nga thave, zumba kumweko ni nani!” Sisera a to wulela ditendani kumweko nayo, se Jayeli a to mfenengeta ngu didhamba.

¹⁹Sisera a to womba ka wamsikati a txi khene: “Ni he mati amadotho o sela na ku kombela ngutu ni pfa ditora.” Ene a to tula msava wa didhowo, wu nga ti ti ni masi, a txi mninga e sela, e tshumela a txi mfenengeta kambe.

²⁰Se Sisera a m'gete a txi khene: Ema ha txikeni ka ditenda, se ngako ku txi ta m'thu a txi ta ku wotisa a txi khene: Waho m'thu wokari hawa kani? U na xamula u txi khawe ahim-him.

²¹Aniko Jayeli, msikati wa Hebheri, a to dula txikhongwani txa ditenda, a txa teka hamela, e tshuketa hafuhi ngu kumbzingamela, e txi gogotela hambanza ka Sisera, txi txi dhoda kala txi zima hahatshi ha mafuni. Nguko ene a ti ti otete wukohe wa hombe, ngu kukarala, a so fisa toneto.

²²Konako ku to humelela Bharake a txi londisa Sisera. Jayeli a to huma a txi m'hingeta a txi m'gela tiya: Ngono ni ta kukomba wamwamna wu u mlavako. Ene a to ta kwakwe, e ta wona ti to Sisera a fite, ni txikhongwani txi nga gogotelwa hambanza kwakwe.

²³Txizimu txi khozisile Jabhini, mfumeli wa Kanana, masoni ka vanana va ka Israyeli.

²⁴Vanana va ka Israyeli va to simama va txi lwa ni Jabhini, mfumeli wa Kanana ditshiku ni ditshiku veza ve mfuvisa.