Read chopi Valamuli 5 Bible Online

Valamuli 5 - chopi bible

Valamuli 5

¹Se ka dona ditshiku dile, Dhebhora ni Bharake, mwana Abhinowami, va to embelela ndando va txi kha vona:

²“Nguko vathangeli va nga sikota kuthangela Israyeli, ni vona vathu va nga ti ningela ngu kuranda kwawe va txi yalwa, ngu mhaka yeto, dhumisani MKOMA,

³Anu vafumeli engisani! Anu vathangeli engisani! Ani ni na dhumisa MKOMA ngu kuembelela, Ni na embelela tindando, ni dhumisa MKOMA, Txizimu txa Israyeli!

⁴Awe MKOMA, mbimo yi u nga huma ngu Seyiri, mbimo yi u nga ta ngu libalani ka Edhomi, mafu ma to zinginika nzuma yi to nisa mati, se marefu ma to wisa mati.

⁵ Mimango yi nyivilikile masoni ka MKOMA, ni wona mmango wa Sinayi, masoni ka MKOMA, Txizimu txa ka Israyeli.

⁶Ka masiku a Samigari, mwana Anate ka masiku a Jayeli, tinzila ti ti mahile mapfhela, vatsimbili va ti ti tsimbila ngu tinzila to gombonyeka.

⁷Ku to pwateka vathangeli hagari ka Israyeli, kala kuza ani Dhebhora ni txi khukha, ni txi khukha kota mame wa va ka Israyeli!

⁸Va ka Israyeli va to ti sawulela simwani sizimu sasiphya, se koneko yimbi yi to wulela tinyumbani kwawe. Hagari ka 40.000 wa vavamna va va ka Israyeli, ku ti si nga ho ni wammweyo a nga ti ñote txitxhavangu mwendo ditxhari.

⁹Mbilu yangu yi bonga vathangeli va ka Israyeli, a vale va nga ti ningela ngu kuranda kwawe kasi kuthumela ditiko. Dhumisani MKOMA!

¹⁰Anu mi gadhako timbongola to basa, anu mi khalahatshako ha matahoni, ni nanu mi tsimbilako ngu tinzila, embelelani!

¹¹Engisani diguwa da vale va abanako thomba yo yi mana yimbini, va di ha sisimani ka mati. Va dhumisa mithumo yo lulama ya MKOMA. Mithumo yakwe yo lulama hagari ka va ka Israyeli. Sekoko vathu va MKOMA va ti ya ema ha txikeni ka didhoropa.

¹²Wuka, wuka awe Dhebhora, wuka, wuka u txi thula ndando; khukha, awe Bharake, u txi thangela ava va nga ti ku ñote, awe mwana Abhinowami!

¹³Sekoko MKOMA a to ni maha ni fuma, txitimwi ka vahombe, hagari ka vathu vale va nga sala; MKOMA a to ni maha ni fuma txitimwi ka tindena.

¹⁴Nguko Efrayime a relete ka vaaki va Amaleki; se msana kwako, wata Bhenjamini a hagari ka vathu vako; manganakana ma relela ma txi ta ngu Makiri ni Zebhuloni, va pinda va di ñote ndonga ya mabhalani.

¹⁵Vathangeli va Isakari va ti kumweko ni Dhebhora; se Isakari a to londeta Bharake, va to tsula veya hoka mkovani, hafuhi ka milonga ya ka Rubheni, kumahilwe makungo a hombe a mbilu.

¹⁶Ngu kutxani u txi zumba hagari ka mitxhambi, u txi engisela maswati a vadyisi, kani? Hafuhi ka milonga ya Rubheni, kumahilwe makungo a hombe a mbilu.

¹⁷Gileyadhi a zumbile mtxhatuko ka Jordhani, Dhani ngu kutxani u txi zumbela tingalavani kani? Aseri a ti ti zumbile mambambe ka linene, e ti zumbela sithoni kwakwe.

¹⁸Zebhuloni ditiko da vathu vale va si thaviko lifo, kufana ni Naftali, txitimwi ka mimango ya txiwulani.

¹⁹Vafumeli va tile va txi ta lwa, vafumeli Vakanana va lwite ditikoni ka Tahanaki, mabambe ka mati a Megidhu, aniko, kha va teka simaha sa kuhonyola sa silivhela.

²⁰Tinyeleti ti lwite, txitimwi nzumani, amu tinzilani ka tona ti lwite, ti txi wukela Sisera.

²¹Txinambwana txa Kixoni txi va kukuletile, mnambo wule wa kale, mnambo wa Kixoni. Awe moya wangu, tsimbila u di tsani!

²²Sekoko sitsendo sa mahantxhi si to pfala kukandetela ka sona hahatshi na mahantxhi ma txi tutuma ni vagadhi va ona va mtamo.

²³Ruketelani Merozi, kuwomba Ngelozi ya MKOMA, ruketelani, ruketelani, vaaki va kona! Nguko, kha vata ku ta lamulela MKOMA, ku ta lamulela MKOMA, kumweko ni tindena.

²⁴Jayeli, a katekile hagari ka vavasikati, ene msikati wa Hebheri, mkeni. Ene a katekile hagari ka vavasikati, vale va zumbako matendani kwakwe!

²⁵Sisera a mkombete mati, se Jayeli a to mtisela masi; a txi m'wuyisela masi a diwomba, amu ka digombe da wukoma.

²⁶A tekile txikhongwani ngu dianza dakwe, ngu dianza dakwe da txinene a ñote hamela yo nemela ya vatshuli. A gogotete txikhongwani ha msungo ka Sisera, a txi wu dhoda, a txi bhandisela msungo mbimo yi a nga gogotela txikhongwani e wu dhoda.

²⁷Sisera a to nama mikondoni kwakwe a txiwa, a towa a txi naka-naka; a to nama hagari ka mikondo, a txi wa; ahale a nga nama kona, koneho a fete kona.

²⁸Mame wa Sisera a to solela ngu ha difasitelani e wona, se a txi dila a di hadifasitelani, a txi khene: Txikotxikani txakwe txi swela ngu txani kuwuya kani? Ngu kutxani mahantxhi akwe ma txi swela kubwaka kani?

²⁹Vasikati vo txariha va m'zinda va to mxamula; se nene apune a to ti xamula a txi khene:

³⁰Va nava va di kuphakelani ka si va nga handa kani? Wamwamna wammweyo, ina kha ningwa dihorana dimwendo mwendo mahorana mambidi, kani? Tinguwo to rungelwa ngu kutshuriselwa, nda Sisera, tinguwo to rungelwa ngu kutshuriselwa to bombisa thamo ya msikati wakwe.

³¹Valala vako va na fuvise tona eto, awe MKOMA! Aniko, avale va kurandako, va na fanane ni ditambo, ngako di txi sisimuka ngu wotshe mtamo wa dona.” Se ditiko di to dikha, amu ka mune wa magumi a malembe.