Read chopi Valamuli 6 Bible Online

Valamuli 6 - chopi bible

Valamuli 6

¹Aniko vanana va ka Israyeli, va to engeta ve maha kubiha masoni ka MKOMA; se MKOMA a to va ningela manzani ka Vamidhiyani, amu ka mtxhanu wa malembe ni mambidi.

²Se Vamidhiyani va to xanisa ngutu vanana va ka Israyeli. Se vanana va ka Israyeli va to tutumela maphalani ka mimangoni ni mu tiphakoni ni mu mibhalani.

³Nguko ku ti ti maheka taku, mbimo yi va ka Israyeli va nga ti ti phaya, Vamidhiyani, Vaamaleki ni vathu va wutxani, va ti ti ta va txi ta va lwisa.

⁴Va ti ti bwaka ve gova hafuhi navo, va txi handa timbewu tawe ta mu tithembweni ka mihinganoni ni Gaza, va si siyi ni txo ve hanya ngu txona va ka Israyeli, hambi tinvuta, hambi tihomu, mwendo timbongola.

⁵Nguko va ti ti kwelela ni mitxhambi yawe ni matenda awe; i ti ti vavangi ngutu nga direfu da humbi, votala aha ka kuva ti si koteki ku va bala, vona, hambi makamelu awe; se va to wulela, kasi kuonhetela ditiko.

⁶Ngu mhaka ya eto, va ka Israyeli va to maha sisiwana ngutu, ngu mhaka ya Vamidhiyani, se vanana va ka Israyeli, va to peka huwa va txi dila ka MKOMA.

⁷Se ngako vanana va ka Israyeli va di dite ka MKOMA, ngu mhaka ya Vamidhiyani,

⁸MKOMA a to rumela vaprofeti ka vanana va ka Israyeli, a txi ya va gela ku khene: “MKOMA, Txizimu txa ka Israyeli, a khene: Ani ni mi humisile ditikoni ka Egipta, ni mi thavisile nyumbani ka wukhumbi.

⁹Ni mi hulukisile manzani ka Vaegipta, ni manzani ka votshe vale va nga ti ti mi xanisa. Ni va tutumisile masoni kwanu, ni txi mi ninga ditiko dawe.

¹⁰Ni wombile kambe kwanu ni txi khani: Ani ngani MKOMA, Txizimu txanu, mi nga thaveni sizimu sa Vaamori, avale mi nga zumba ditikoni kwawe. Aniko anu kha ma ni engisa.

¹¹Sekoko Ngelozi ya MKOMA, yi to ta yi txi ta zumba hahatshi ka mkusu wu wu ku Ofira ka Jowasi, wa lihunzu la ka Abhiyezeri. Gidhiyoni, mwanana wakwe, a ti ti hula fulaho amu dipipani, kasi ku yi hulukisa ka Vamidhiyani.

¹²Ngelozi ya MKOMA yi to ta ti wonekisa kwakwe, yi txi kha yona: MKOMA ana ni nawe wamwamna wa ndena!”

¹³Gidhiyoni a to xamula a txi khene: O nyamne wangu! Ngako MKOMA a di ni nathu, tita ngu hani totshe ti ti hi humelelako kani? Si hani sotshe sidiwukiso sakwe, asiya vatate vathu va hi xawutelako, va ku kha vona: Kasi MKOMA kha hi humisa ditikoni ka Egipta kani? Kambe kona kuwa, MKOMA a hi tshotshile, aniko a hi ningete manzani ka Vamidhiyani.

¹⁴Sekoko MKOMA a to tshembereka e mu wona a txi khene: “Tsula ngu wotshe mtamo wu u ku nawo, u txi ya hulukisa va ka Israyeli, manzani ka Vamidhiyani. Ina hi nga ani ni kurumako kani?”

¹⁵Se Gidhiyoni a to xamula a txi khene: “MKOMA wangu, ni na sikotisa kutxani kuhulukisa Israyeli kani? Nyumba yangu nja wusiwana ngutu hagari ka va ka Manasi, ni nani kambe ni tshole amu nyumbani ka tate wangu.”

¹⁶Se MKOMA a to mxamula a txi kha ene: “Ani ni na va ni nawe, kambe awe u na va xula Vamidhiyani, ku txi nga u to xula m'thu wammweyo.”

¹⁷Se Gidhiyoni a to m'gela a txi kha ene: Ngako ni di mani dithomo masoni kwako ni mahele txikombiso, kasiku ni txi tiziva ti to ngawe u wombawombako ni nani.

¹⁸U nga khukhe hawa, na ku kombela kala kuza ni txi wuya ni mningelo wangu, ni txi ta wu veka masoni kwako. MKOMA a to xamula a txi kha ene: “Ngu tona, ni na rinzela kala u txi wuya.”

¹⁹Se Gidhiyoni a to huma a txi ya lulamisa phongo, ni mpimo wa efa wa mpupu, a to maha mapawu o mbi tshumbelwa. E veka nyama amu ka thavangu, e thela mro amu ka khadi, a txi si tisa sotshe hahatshi ka mkusu, e ta si ningela ka ngelozi, ayi yi nga ti mrinzete.

²⁰Ngelozi ya MKOMA yi m'gete yi txi kha yona: Teka nyama ni mapawu o mba tshumbelwa, u txi si veka txitimwi ka dirigwi diya, u txi thela mro ngu txitimwi ka kona. Gidhiyoni a mahile totshe eto.

²¹Ti ndi ngeto, konako, Ngelozi ya MKOMA yi to xungameta ngu tshoka ya ndonga yi nga ti ti nayo manzani, yi gwesa ngu yona nyama ni mapawu o mbi tshumbelwa. Mndilo wu to huma ngu ha ka dirigwi wu txi tura, wu txi hisa nyama ni mapawu o mbi tshumbelwa, se Ngelozi ya MKOMA yi to mwalala, yi si woneki masoni kwakwe.

²²Sekoko Gidhiyoni a ti woni ti to i Ngelozi ya MKOMA. Se a to womba a txi khene: “Yowe! MKOMA Txizimu! Ni woni Ngelozi ya MKOMA, khohe ni khohe!”

²³Aniko MKOMA a m'gete a txi kha ene: “Kudikha ku nave ni nawe! U nga thave nguko khu na mbi fa.”

²⁴Sekoko Gidhiyoni a to aka konaho txiluvelo txa MKOMA, se a txi txi raya ku MKOMA i kuthutha, txiluvelo txiya txi nga diho kala ni nyamsi kona Ofira, ka Abhiyezeri.

²⁵Se ka wona ewo wusiku MKOMA a gete Gidhiyoni a txi kha ene: “Teka didhuna da tate wako adile i ku didhuna, da mtxhanu wa malembe, u txi khundumusa txiluvelo txa Bhahali, atxile txi lumbako tate wako, u txi khundumusa kambe txithombe txa Aseri, atxi txi ku hafuhi ka kona.

²⁶Ngu msana u na aka txiluvelo txa MKOMA, Txizimu txako, ngu txitimwi ka dirigwi diya, msana ka kuva u di lulamisile. U na teka didhuna da wumbidi u txi maha ngu dona mhamba yo hiswa ngu tikhuni ta txithombe, a txi u nova u di txi gangete.”

²⁷Sekoko Gidhiyoni a to teka digumi da vavamna, a txi maha nga ti MKOMA, a nga m'gelisa tona. Aniko, ngako a nga ti ti thava vathu va hamwayani ka tate wakwe ni va hadidhoropani, kha ti lava kumaha totsheto ni mitshikari a to maha totshe ni wusiku.

²⁸Mangwanani ka kona, ni mixo ngutu, mbimo yi vathu va didhoropa va nga wuka, va to wona ti to txiluvelo txa Bhahali txi khundumusilwe, txithombe txi nga ti ti hafuhi ka kona txi gangetwe, ni didhuna da wumbidi di mahile mhamba yo hiswa txitimwi ka txiluvelo txo ngadi kuakwa.

²⁹Se va to wombawombisana vona mmwani ni mmwani, va txi kha vona: “I mani a nga maha tiya kani?” Msana ka kuva va di wotisisile, va to gelwa ti to i Gidhiyoni, mwana Jowasi, a wu a nga maha tona.

³⁰Vaaki va didhoropa va to womba ka Jowasi va txi kha vona: Hi tisele mwanako hahanze, kasiku a txi ta dawa, nguko a khundumusile txiluvelo txa Bhahali, ni kugangela txithombe txa Aseri, txi nga ti ti ngu hafuhi ka kona.

³¹Jowasi a to xamula votshe vale va nga ti ti mu wukela a txi khene: “Nganu mi lwelako Bhahali kani? Nganu mi m'vhikelako kani? Awule a no lwela Bhahali a na dawa konakuwa, nyamsi. Ngako Bhahali i di Txizimu a na ti vhikele ene apune a txi lwa ni wule a nga khundumusela txiluvelo txakwe.”

³²Kukhukhela ka konako Gidhiyoni a to dhanwa ku i Jerubhahali, ngu kule Jowasi a nga khene: “Bhahali a na tivhikele ene apune, a txi lwa ni wule a nga khundumusela txiluvelo txakwe.”

³³Se votshe Vamidhiyani, Vaamaleki, ni vanana va wutxani, va to sengeletana ka wukhalo wumwewo, ve txhatuka Jordhani, va txi ta gova libalani ka Jezrayeli.

³⁴Sekoko Moya wa MKOMA, wu to ta ka Gidhiyoni; ene a to veta mpundu, a txi ramba va ka Abhiyezeri kasi kuve tshangana kwakwe.

³⁵Se Gidhiyoni a to rumela mitumi ka votshe va ka Manasi, yi va dhana va txi ta tshangana kwakwe, kasi kuve mlondeta. A to rumela kambe mitumi ka tinyumba ta ka Aseri, ni ta ka Zebhuloni, ni ta ka Naftali, kasi ku votshe ni vona va txi ta ti patanisa kwakwe.

³⁶Se konako, Gidhiyoni a to womba ka Txizimu, a txi khene: “Ngako ngu ditshuri u txi lava kuhulukisa va ka Israyeli ngu dianza dangu madingano ni ti u nga womba;

³⁷ni na veka didhowo di ku ni matoya wuhuleloni; ngako mwando wu txi wa txitimwi ka dona dwe, kotshe hahatshi ku txi maneka ku di omile, ni na tiziva ti to u na hulukisa Israyeli ngu dianza dangu, nga ti u nga womba.”

³⁸Se ku to maheka tona eto. Ngako Gidhiyoni a di wukile mangwanani ka kona ni mabimbi-kutxa, a to teka didhowo a txi di kama, ku so huma mati a mwando, e tata muhindo ngu mati a wona mwandowo.

³⁹Se Gidhiyoni a to engeta e womba ka Txizimu a txi khene: “U nga ni henyele ngako ni txi engeta ni txi womba! Ni kombela tximwani txikombiso txa tximwetxo ngu dona didhowo diya. Ni kombela ti to didhowo di si nakani, kambe, mafu otshe ma txi nakana ngu mwando!”

⁴⁰Txizimu txi mahile tona eto ka wona wusikuwo; didhowo dokha, ngu dona di nga maneka di di omile, na kuve ha mafuni kotshe, ku manekile ku txi nakana ngu mwando.