Read chopi Valamuli 7 Bible Online

Valamuli 7 - chopi bible

Valamuli 7

¹Sekoko, Jerubhabheli (i ku Gidhiyoni), a to wuka ni mabimbi-kutxa, e tsula a txi ya gova ni vathu votshe vale a nga ti ti navo, hafuhi ni txisima txa Harodhi; se wugovelo wa Vamidhiyani wu ti ti maneka wuphemba, ka libala li li ku hahatshi ka mmango wa More.

²Se MKOMA a to womba ka Gidhiyoni a txi khene: “Vathu vava u ku navo mbangi gutu, kasiku ani ni txi ningela Vamidhiyani manzani kwawe.” Nguko va ka Israyeli va nga ti guleta va txi kha vona: “Ngathu hipune hi nga ti hulukisa ngu manza athu.”

³Konkuwa tsula u txi ya gela vathu ku khawe: Awu a ku ni dizowa i ku dipwembwe, a na khukhe mmangoni ka Gileyadhi e tshumelela msana. Konako ku to khukha 22.000 wa vavamna, ve tshumela, kusala 10.000 dwe.

⁴Se MKOMA a to engeta e gela Gidhiyoni a txi khene: Vathu vava i ngadi vangi ngutu. Relela navo u txi ya matini, koneyo ni na ya duka kasi ku u txi sawula a va u no tsula navo: Awule ni no womba ni txi khani “Awuwa a na tsule ni nawe,” eyo u na tsula nayo. A awule ni no khani: Awuwa kha na mbi tsula ni nawe, eyo khu na mbi tsula nayo.

⁵Se ti di nga eto, Gidhiyoni a to relela ni vathu vava a txi ya hawa ku ku ni mati, se MKOMA a to gela Gidhiyoni a txi kha ene: “Votshe vale va no kapitela mati, nga tile yi mahako yimbwa, evo u na va veka didhawa. Aniko votshe vale va no khizama kasiku ve mana kusela mati, evo u na va veka ka dimwani didhawa.”

⁶Se mtengo wa vale va nga khadamutela mati ngu manza, va txi ma yisa mkanani i ti ti 300. Votshe vamwani va to khizama kasi kuve mana kusela mati.

⁷Se MKOMA a to gela Gidhiyoni a txi kha ene: “Ni na mi hulukisa, ni ningela Vamidhiyani manzani kwako, ngu vona vathu vava va 300 dwe, avale va nga kapitela mati ngu manza awe. Ani votshe va na tshumele ve tsula mitini kwawe.”

⁸Se vathu to teka timbuva tawe ni mipundu yawe, se ene a to rumela votshe vamwani vavamna va ka Israyeli, mmwani ni mmwani ka ditenda dakwe, aniko a to sala ni 300 wa vavamna; se wugovelo wa Vamidhiyani wu ti ti maneka mkovani.

⁹Se ka wona ewo wusiku, MKOMA a to gela Gidhiyoni a txi khene: “Khukha, u txi relela wugoveloni, nguko wugovelo ni na wu ningela manzani kwako.

¹⁰Aniko, ngako u txi thava kurelela wekha, tsula ni Pura txithumi txako.

¹¹U na ya engisa a ti va wombawombako; konako manza ako ma na tsaniswa, se na nawe u na relela wugoveloni kwawe.” Se Gidhiyoni a to tsula ni Pura, dijaha dakwe, kala hafuhi ka wugovelo wawe.

¹²Vamidhiyani ni Vaamaleki ni votshe vanana va wutxani, va ti ti mbambamete mkovani, na i di vavangi nga humbi, ni mtengo wo mbi balwa wa makamelu awe, ma txi nga mtxhefa wa likasani ka linene.

¹³A di hokile koko Gidhiyoni, mmweyo wawe a ti ti xawutela, mloro wakwe ka mngana wakwe, a txi kha ene: Mloro wu ni nga lora ngu wuwa: “Ni woni dipawu da sevhadha, di txi rindilikela hagari ka wugovelo wa Vamidhiyani, adile di nga ya gumula ditenda di txi di wisa dotshe hahatshi.”

¹⁴Mngana wakwe a to xamula a txi kha ene: “Eto kha ti wombi yimwani mhaka, hahanze ka ditxhari da Gidhiyoni mwana Jowasi, Muisrayeli. Ngu ti to Txizimu txi ningete manzani kwakwe Vamidhiyani ni dotshe dibutho di ku wugoveloni.”

¹⁵Se a di gwitile kuengisa kuxawutelwa ka mloro ni txhamuselo ya kona, Gidhiyoni a to khizama e khozela, se e tshumelela wugoveloni ka va ka Israyeli, a txi ya kha ene: “Khukhani! Nguko MKOMA a ningete manzani kwanu yotshe yimbi ya Vamidhiyani.”

¹⁶Sekoko Gidhiyoni a to abanisa vathu vakwe va 300 ngu mitxawa yiraru. Ka votshe a abanisete manzani kwawe, mipundu ni tidhuwa ta maphanga, ni misanje yo tura, ka tona.

¹⁷Se a to va gela a txi khene: Ni woneteleni, mi maha ti ni no maha. “Mbimo yi ni no hoka wugoveloni, ati mi no ni wona ani na ni txi maha, mahani nanu tona eto.

¹⁸Ngako mi txi ni engisa na ni txi veta mpundu wu ni ku nawo manzani, na nanu mi na veta mipundu yanu ka makhalo otshe a wugovelo wotshe, na mi txi kwangula mi txi khanu: Matxhari a MKOMA, ni a Gidhiyoni!”

¹⁹Gidhiyoni a to hoka hale ka libhiyo la wugovelo, kumweko ni vathu vakwe va dizana. I ti ti mbimo ya kupilela dhina ya wusiku, na vawoneleli va di ngadi ku txitxana. Sekoko va to veta mipundu, va txi faya tidhuwa tile va nga ti ti nato manzani.

²⁰Ngu kumaha keto, vathu va mitxawa yile ya yiraru, va to veta mipundu ni vona, va txi faya tidhuwa; manzani ka txibhabha va ti ti ñote misanje yi nga txi tura, ani ka dianza da txinene va ti ti ni mipundu va txi veta, ni kuhuwelela, va txi kha vona: “Ditxhari da MKOMA, ni da Gidhiyoni.”

²¹Se mmwani ni mmwani a to maneka ha wukhaloni kwakwe, va txi randela wugovelo. Ngu tona eto votshe va yimbi ya Vamidhiyani va to dhuka, va txi tutuma ve thava, va txi pekeletela tihuwa.

²²Ngako avale va 300 va nga ti veta mipundu, MKOMA a to maha a tito, wugoveloni kotshe ka Vamidhiyani mmwani ni mmwani va txi bhayana ngu matxhari ni mkwawe. Votshe vathu va yimbi va to thava kala Bheti-Sita, hafuhi ni Zerera, kala m'hinganoni ka Abhele-Mawola, masoni ka Tabhati.

²³Sekoko vavamna votshe va ka Israyeli, va ka Naftali, va ka Aseri, ni votshe va ka Manasi, va to patana va txi tutumisa Vamidhiyani.

²⁴Se Gidhiyoni a to rumela mitumi ka yotshe mimango ya ka Efrayime, a txi kha ene: Relelani mi txi ta dayela Vamidhiyani; mi txi tshinga mabeloni kala Bheti-Bhara ni Jordhani. Va di rambilwe koko votshe vavamna va ka Efrayime, va to tshinga mabeloni kala Bheti-Bhara, ni Jordhani.

²⁵Se va to ñola vafumeli vambidi va Vamidhiyani, Orebhi ni Zehebhe; va to daya Orebhi dirigwini ka Orebhi, va txi daya Zehebhe nzekani ka Zehebhe. Va to hinga Vamidhiyani, va txi neha msungo wa Orebhi ni wa Zehebhe, va txi ta nayo ka Gidhiyoni, mitxhatuko ka Jordhani.