Read chopi Valamuli 8 Bible Online

Valamuli 8 - chopi bible

Valamuli 8

¹Sekoko vathu va ka Efrayime va to womba ka Gidhiyoni va txi kha vona: “I mhaka muni u nga mbi hi ramba mbimo yi u nga huma u txi yalwa ni Vamidhiyani kani?” Va to kanetisana nayo ngu mtamo ngutu.

²Ene a to va xamula a txi khene: “Njitxani txa hombe ni nga maha ani, txo pala ti anu mi nga maha, kani? Ina kani sizangwa sa sidotho mi nga hapha anu va ka Efrayime, hi nga sa lisima kupinda mauvha otshe hi nga elula athu va ka Abhiyezeri, kani?

³ Txizimu txi ningete manzani kwangu vathangeli va Vamidhiyani, i ku Orebhi ni Zehebhe. Mthumo muni ani ni nga wu maha, wo fana ni wu anu mi nga wu maha kani?” Se ngako va di engisile mapswiyo, txiviti txawe txi to relela.

⁴Se Gidhiyoni a to hoka Jordhani a ha a nga ya txhatuka, kumweko ni vavamna vale a nga ti navo va 300, va txi hinga Vamidhiyani, hambi ku va nga ti karate.

⁵Se Gidhiyoni a to gela vavamna va Sukote, a txi kha ene: “Na mi kombela ti to mi txi ha sikhwemu sa mapawu vathu vava ni ku navo, nguko va karate kasi ku hi mana kututumisa Zebha ni Salmuna, vafumeli va Vamidhiyani.”

⁶Aniko vathangeli va Sukote va to xamula, va txi kha vone: “Ina se ma mtamoni kwako manza a Zebha ni a Salmuna, eko u ku khawe, hi na ninge sakudya dibutho dako da yimbi kani?”

⁷Sekoko Gidhiyoni a to va gela a txi khene: Ina, ngu tona! Ngako MKOMA a di ningete manzani kwangu Zebha ni Salmuna, ni nata vharulela mimidi yanu ngu mipa ni txi kayi txa txiwulani.

⁸A di khukhile konaho, a to kwela a txi ya Penuweli, ahawa a nga ya va mahela kona txikombelo txile. Vathu va Penuweli ni vona va mxamute ngu mapswi o fana ni ya vathu va Sukote.

⁹Ngu kumaha keto, Gidhiyoni a to gela vathu va Penuweli, a txi khene: Ngako ani ni txi wuya ni di xute, nata khundumusela txitezi txiya.

¹⁰Se Zebha ni Salmuna va ti ti manekela Karikori, kumweko ni mabutho awe a yimbi aku dingana vavamna va 15.000, ava va nga ti sate ka otshe mabutho a wutxani; mtengo wa masotxhwa awa ma nga fa i ti 120.000 wa vale va nga txi tiziva kundiwita matxhari.

¹¹Se Gidhiyoni a to kwela ngu nzila ya vale va zumbako matendani, ngu didhawa da wutxani ka Nobha ni Jagobheya, a txi ya dayela vathu vale va nga ti pimisile ti to kuthuthile.

¹²Se Zebha ni Salmuna va to tutuma, aniko ene a to va londeta, a txi ya va ñola ngu wumbidi wawe vafumeli vale va Vamidhiyani, i ku Zebha ni Salmuna, se a to hangalasa dotshe dibutho.

¹³Ngako Gidhiyoni, mwana Jowasi, a txi wuya ngu kulwani, na di se huma ditambo,

¹⁴a to ñola dijaha dimwedo ka vavamna va Sukote, a txi di maha siwotiso; edo di nga wombetela matina a vathangeli ni madhota a Sukote, mtxhanu wa magumi ni mambidi ni mtxhanu wa vavamna ni vambidi.

¹⁵Sekoko Gidhiyoni a to hoka ka vathu va Sukote, a txi ya va gela tiya: Zebha ni Salmuna hi nga vona vava mi nga ni xowokisa ngu mhaka yawe, mi txi khanu: “Ina se ma mitamoni kwako manza a Zebha ni a Salmuna, eko u ku khawe hi na ninge sakudya dibutho dako da yimbi di nga karala kani?”

¹⁶Se Gidhiyoni a to ñola madhota a didhoropani, e teka mipa ni sikayi sa txiwulani, a txi vharulela ngu sona vathu va Sukote.

¹⁷Kambe a to khundumusa txitezi txa Penuweli, e dayela vaaki va didhoropani.

¹⁸Msana ka tona eto Gidhiyoni a to womba ka Zebha ni ka Salmuna, a txi khene: “I ti vo txani vathu vale mi nga dayela vona Tabhori, kani?” Va to mxamula va txi kha vona: “Va ti ti fana ni nawe mmwani ni mmwani a ti ti fana ni mwanana wa mfumeli.”

¹⁹Gidhiyoni a to va xamula kambe a txi khene: “I ti vanathu, vanana va mame wangu! Na xambanya ngu MKOMA a hanyako tito, i di ku mi ti ti va lekile ve hanya, ani nga ni si mi dayi.”

²⁰Konako a to womba ka Jeteri mwanakwe wa matiwula, a txi khene: “Khukha! U txi va daya!” Aniko mfana kha swomola ditxhari dakwe ngu dizowa nguko i ti ti ngadi wam'dotho.

²¹Sekoko Zebha ni Salmuna, va to kha vona ka Gidhiyoni: “Khukha awe u txi hi daya nguko mtamo wa m'thu wu dingana ni m'thu wa kona.” Se Gidhiyoni a to khukha e daya Zebha ni Salmuna, ngu msana e thavisa sigelebete si si nga ti tshurisa makamelu awe.

²²Sekoko vavamna va ka Israyeli va to womba ka Gidhiyoni, va txi kha vona: “Hi fumele awe, ni mwanako ni mtukulu wako, nguko u hi hulukisile manzani ka Vamidhiyani.”

²³Aniko Gidhiyoni a to xamula a txi khene: “Hi nga ani ni no mi fumela, hambi mwanana wangu, nguko MKOMA ngene a no mi fumela.”

²⁴Se Gidhiyoni a to engeta a txi khene: “Ni tumeleleni ni txi mi mahela txikombelo txokari. Ni kombela a ti to mmwani ni mmwani e niha phera ya nzalama, ya tile mi nga handa.” Vamidhiyani va ti ti ambala tiphera ta nzalama, nguko i ti ti va ka Israyeli.

²⁵Vona va to xamula va txi kha vona: “Hi na kuninga hi di tsakile.” Se va to ateta nguwo, aha mmweyo ni mmweyo a nga veka kona phera yakwe, ayile a nga handa.

²⁶Se kunemela ka tiphera ta nzalama, ati ene a nga kombela, ku ti ti hoka ka magumi mambidi a makilu a nzalama, ku si balwi ni masinda, tiketani ni syambalo sa masilika, asile vafumeli va Vamidhiyani va nga ti ambate, na ku si balwi kambe ni tiketani ta tithamoni ka makamelu awe.

²⁷Se Gidhiyoni a to teka nzalama yile a txi maha txithombe txa efodhe ngu yona e txi veka didhoropani ka Ofira. Votshe va ka Israyeli va to leka Txizimu ve khozela txithombe txileya, se eto kambe ti to maha txikhuvekiso ka Gidhiyoni, ni ka yotshe nyumba yakwe.

²⁸Ti di nga eto Vamidhiyani va khozisilwe ngu va ka Israyeli, va si ngadi kambe ve guleta msungo; ditiko ni dona di zumbiseka amu ka malembe a mune wa magumi, ka mbimo yotshe ya kuhanya ka Gidhiyoni.

²⁹Se Jerubhahali, mwana Jowasi, a to khukha e tsula, a txi ya zumba m'tini kwakwe;

³⁰Gidhiyoni a ti ni mtxhanu wa magumi ni mambidi a vanana va vafana, nguko a ti ti tekile vasikati votala.

³¹Se txikaba txakwe, a txile txi nga ti zumbile Sikemi ni txona txi to m'velekela mwanana wa mfana, awule a nga mraya ditina daku i Abhimeleki.

³²Se Gidhiyoni, mwana Jowasi, a fite a di kumbile ngutu, se a ti ya tshotshwa diyivani ka Jowasi, tate wakwe, didhoropani ka Ofira, wa ka Abhiyezeri.

³³Se ku to maheka taku, msana ka kufa ka Gidhiyoni, vanana va ka Israyeli va to tshumela va txi ti nyenyezisa ngu kulondetela va ka Bhahali, ve teka Bhahali-Bheriti va txi mmaha txizimu txawe.

³⁴Se vanana va ka Israyeli kha va nga alakanya kambe MKOMA Txizimu txawe, ka otshe madhawa;

³⁵kambe kha va nga ninga kubonga ka nyumba ya ka Jerubhahali, i ku ene Gidhiyoni, ngu wotshe wunene wule a nga va mahela wona va ka Israyeli.