Read chopi 2 Johani 1 Bible Online

2 Johani 1 - chopi bible

2 Johani 1

¹Ani Didhota ni bhalela khosikazi yo sawulwa ngu Txizimu, ni vanana va yona, ava ni va randako, ngu ditshuri, hi nga ani nokha ni va randako, aniko ni votshe va va zivako ditshuri va va randa,

²ngu mhaka ya ditshuri di di zumbako kwathu, adi di no va ni nathu yotshe mbimo,

³kateko ni wumbilu ni kudikha, si txi huma ngu ka Txizimu Tate ni ka Jesu Kristu, Mwanana wa txona, si nave ni nathu, si txi hi tsanisa amu ka ditshuri ni mu ka lirando.

⁴Na tsaka ngutu, nguko ni nga mana vamwani ka vanana vako va txi hanya mu ka ditshuri, madingano ni txirumo txi hi nga txi amukela ka Tate.

⁵ Se konkuwa, awe khosikazi, na ku kombela, i si nga ti to no kubhalela txirumo txa txiphya, aniko ni womba ti hi nga rumwa kukhukhela makhatoni: Ti to hotshe hi randana.

⁶Lirando la kona ngu liya: Kuhanya ngu kuveketa sirumo sakwe. Se txirumo txo khata, nga tiya mi nga gondisa tona kukhukhela makhatoni, ngu ti to mi hanya lirandoni.

⁷Nguko va hangalakile ni ditiko vaxengeteli vavangi, ava va si fakaziko ti to Jesu Kristu a tile ngu didhawa da nyama. M'thu wo ngeto, ngene mxengeteli ni mkaneti wa Kristu.

⁸Ti woneleni kasi ku mi si mwalati mihando ya kutikarata kwanu; aniko mi fanete kumana hakhelo yi yi dinganako.

⁹Votshe va va yako masoni ni tawe, va si londeteliko gondo ya Kristu, kha va na Txizimu. Kasi awu a simamelako gondo ya Kristu, eyo ngene a ku kumweko ni Tate ni Mwanana.

¹⁰Ngako m'thu a txi ta kwanu, na asi nehi gondo yiya, mi nga mu amukeleni mitini kwanu, hambi ku mlosa mi nga mloseni.

¹¹Awu a mlosako a sengela nayo ka mithumo yakwe yo biha.

¹²Hambiko ni ku ni ta tingi ta ku mi bhalela, kha na ti lava ku mi rumela tona ngu kuthumisa dipapilo ni tinta. Kambe na themba ti to ni nata kheyo kwanu, ni ta womba-womba ni nanu ngu txisofu, na hi txi wonana khohe ni khohe, kasi ku litsako lathu li txi hetiseka.

¹³Va kudingula vanana va ndiyako yo sawulwa ngu Txizimu.