Read chopi Mtuletelo 13 Bible Online

Mtuletelo 13 - chopi bible

Mtuletelo 13

¹ Konako, ni to wona txikalani txi nga pfukula ngu lineneni, txi di ni digumi da titxheho ni mtxhanu wa misungo ni mimbidi. Txitimwi ka titxheho ku ti ni digumi da mibhoti, se txitimwi ka misungo, ku ti ni ditina do ruketela Txizimu.

²Txikalani txi ni nga txi wona txi ti fana ni yingwe, kambe minenge ya txona yi ti fana ni ya txingwingwi; m'dhonvu wa kona wu txi nga didomu da ngonyamo. Mwamilambo a to txi ninga mtamo wakwe, txikhalo txakwe txa wukoma, ni wukoma wa hombe.

³Wumwewo ka misungo ya txona wu to woneka nga wo bhaywa wu txi nga wolava kufa, kambe txilonda txile txa lifo txi to holiswa. Otshe mafu ma to londetela txikalani, ma di tate ngu kuxamala,

⁴vathu ve khozela mwamilambo, nguko a nga ningela wukoma ka txikalani, ngu msana ve khozela txikalani, va txi kha vona: “I mani a fanako ni txikalani kani, i mani a sikotako kulwa natxo kani?”

⁵ Txi to ningwa txisofu kasi kuwomba mapswi o eyisa ni o ruka Txizimu, ni mtamo wo thuma mbimo ya kudingana mune wa magumi a mitxima ni mitxima yimbidi.

⁶Txona txi to tula txisofu txi ruketela Txizimu, txi ruketela ditina da txona, ni ditenda da txona, ni va va zumbako nzumani.

⁷Txi ningilwe mtamo kambe wo lwa ni vasawuleki, txi va xula; txi ningilwe wukoma wotshe txitimwi ka totshe tixaka, matiko, tidimi ni mifumo.

⁸ Votshe vaaki va ha mafuni va na txi khozela, avava matina awe ma nga mbi bhalwa, kukhukhela makhatoni ka ditiko, amu ka dibhuku da wutomi da Txinvutana, atxi txi nga bhaywa.

⁹Awu a ku ni tinzeve a na engise.

¹⁰Awu a nga sikelwa ku khotelwani, a na ya ku khotelwani; awu a nga sikelwa kudawa ngu ditxhari, a na fa ngu dona ditxhari. Atiya ngu tona ti tsanisako kuhonisela ni kukholwa ka vasawuleki.

¹¹Msana keto, ni to wona tximwani txikalani txi txi huma ngu mafuni: Txi ti ni titxheho timbidi nga txinvutana, kambe txi ti womba-womba nga mwamilambo.

¹²Txona txi thumisa wotshe mtamo wa txikalani txo khata, madingano ni kuruma ka txona, txi txi kurumeta mafu ni votshe va va nga aka kona ti to ve khozela txikalani txo khata, atxiya txilonda txa txona txa lifo, txi nga ti holisitwe.

¹³Txona txa maha sixamaliso sa hombe: Ahawa koza txi sikota kumaha ti to mndilo wu txhika ngu nzumani, wu txi wa ha mafuni, wu wonwa ngu vathu.

¹⁴Txona txa kanganyisa vaaki va ha mafuni, ngu mhaka ya sixamaliso si txi nga ningwa kumaha, madingano ni kuruma ka txikalani txo khata. Txona txi va kurumeta kumaha txithombe txo dhumisa txikalani txile, txi nga ti bhayilwe ngu ditxhari, aniko txi nga tshumela txi hanya.

¹⁵Txi ningilwe kambe ku wuleta moya mndani ka txithombe txa txikalani txo khata, ahawa koza txithombe txi sikota kuwombawomba ni kumaha ti to ve fa votshe vale va lambako ku khizamela txithombe txa txikalani.

¹⁶Txi maha kambe ti to votshe vathu, vavadotho ni vahombe, vanyatithombe ni sisiwana, vathuseki ni tikhumbi ve vekwa txixambanyo amu ka dianza da txinene mwendo ha mbanza.

¹⁷Kasiku ni mmweyo asi sikoti kuxava mwendo kuxavisa, ngako a si nga ni txixambanyo, ditina da txikalani mwendo txibalo txa ditina da txona.

¹⁸Ahawa kulaveka wutxhari! Awu a ku ni kupfisisa a na tumbule txibalo txiya txa txikalani, nguko txibalo txiya txi womba ditina da m'thu: Txibalo txa kona i 666.